Engulhu Yuwene Ngoku Yahandikawa na Matayo 22:1-46
22 Kandi Yesu mwakania nabo omwa mikya* athi:
2 “Obwami bw’elhubulha bwangana linganisibwa n’omwami oyukatheghekanaya obugheni bw’eriherukya obwa mughalha wiwe.
3 Neryo mwathuma abaghombe biwe athi babirikire abakokibirwe, aliwe mubathasa.
4 Kandi mwathuma abandi baghombe n’eribabwira athi, ‘Mubwire abakokibirwe muthi: “Lebaya! Nabiritheghekania eby’erirya eby’erithungyi, nabirikera esyonume sy’esyonde n’ebisoro byaghe ebinenehire, obuli kindu kyabiritheghekanibwa. Mwase okwa bugheni bw’eriherukya.”’
5 Aliwe mubathatsomana, abandi mubaghenda omwa malima wabo, n’abandi okwa mibiiri yabo;
6 n’abandi mubahamba abaghombe biwe, bamabakolha nabi, n’eribitha.
7 “Omwami mwahithana kutsibu, amathuma abasirikali biwe, bamayitha abithi abo n’erihisya etawuni yabu.
8 Neryo mwabwira abaghombe biwe athi, ‘Obugheni bw’eriherukya bwabiritheghekwa, aliwe abakokibirwe sibalhue batholere.
9 Busana n’ekyo, mughende omwa syonzira esikalhua omwa tawuni, mukokaye obuli mundu oyo muk’eghaya ase okwa bugheni bw’eriherukya.’
10 Abaghombe mubaghenda okwa syonzira ngoku bahanawa n’erisorokya abosi abo babana, ababi n’ababuya; n’ekisenge eky’abyamo obugheni bw’eriherukya mukyusulhamo abakalya.*
11 “Omwami abere akasyalebya abagheni, mwalhangira omulhume oyuthabya ambere olhukimba lhw’obugheni.
12 Neryo mwamubulya athi, ‘Thahye, wuly’ingira muno mwa wuthi isiwambere olhukimba lhw’obugheni?’ Mwabulha eky’erimusubirya.
13 Neryo omwami mwabwira abaghombe biwe athi, ‘Mumubohe okwa byalha n’okwa bisandu kandi mumughuse omwa mwirimya mw’eyihya. Eyo y’akendilirira n’erikereghetha ameno wiwe.’
14 “Kundi abakokibirwe ni banene, aliwe abasombwerwe ni bake.”
15 Neryo Abafarisayo mubaghenda bamayaya embitha nga bangamuthegha bathi omwa by’akabugha.
16 Neryo mubamuthumako abigha babo, haghuma n’ab’omwa kyama kya Herode bathi: “Mukangirirya, thunasi ku wukabugha okwenene kandi ebya wukakangiriraya oku Nyamuhanga ni kwenene, kandi siwuli sondaya omwa bandu mw’erisimwa, kundi siwuli samalira emisosere y’abandu ey’eyihya.
17 Neryo, thubwire, wukalengekanaya wuthiki? Mbwino kinahikire eriliha Kaisari y’omusolho kutse sikihikire?”
18 Aliwe kundi Yesu mwaminya amalengekania wabo mabi, mwabasubirya athi: “Busana naki mukanyirengako, inywe bathebya?
19 Munyikanganaye ekinusu ky’omusolho.” Mubamulethera edinari.
20 Mwababulya athi: “Ekisasani n’ebihandikireko ebi ni byandi?”
21 Mubamusubirya bathi: “Ni bya Kaisari.” Neryo mwababwira athi: “Busana n’ekyo, mulihe Kaisari ebindu bya Kaisari, na Nyamuhanga ebindu bya Nyamuhanga.”
22 Babere bowa ekyo, mubasweka kutsibu, neryo mubamusigha, bamaghenda.
23 Okwa kiro ekyo, Abasadukayo abakabugha bathi sihali erilhubuka, mubasa n’erimubulya bathi:
24 “Mukangirirya, Musa mwabugha athi: ‘Omundu amaholha isyali abutha abaana, mughalha wabo atholere iniasighalya mukali wiwe n’erimubuthira abaana.’
25 Neryo habya abalhume musanju ababuthenwe haghuma. Ow’okubanza mwathahya neryo amaholha, aliwe isyali abutha abaana, mughalha wabo mwasighalya mukali wiwe.
26 Mubyabya bithya oko wakabiri n’owakasathu erihika okw’ow’omusanju.
27 Erighunzerera, n’omukali mwaholha.
28 Kundi omukali mwabya w’abosi, okw’ilhubuka, akendi syabya wandi okwa balhume musanju?”
29 Yesu mwabasubirya athi: “Simwasi ebya mukabugha, kundi simwasi Amasako kutse obuthoki bwa Nyamuhanga;
30 kundi okw’ilhubuka, abalhume sibendi syathahya, kutse abakali erithahibwa, aliwe bali ng’abamalaika omwa lhubulha.
31 Bikahika okw’ilhubuka ly’abaholi, simwethasoma ebya Nyamuhanga ababwira, athi:
32 ‘Ingye indi Nyamuhanga wa Abrahamu, Nyamuhanga wa Isaka, na Nyamuhanga wa Yakobo’? Iyo si Nyamuhanga w’abaholi, aliwe ni Nyamuhanga w’abaliho.”
33 Abandu babere bowa ekyo, mubakukubalha busana n’erikangirirya liwe.
34 Abafarisayo babere babiriowa ngoku Yesu abirihunia Abasadukayo, abosi mubasa haghuma ng’egurupu.
35 Neryo omughuma w’okw’ibo oyuwasi ndeke Emighambo mwamulengako omw’imubulya athi:
36 “Mukangirirya, ekilhaghiro kikulhu omwa Mighambo ky’ekyahi?”
37 Mwamusubirya athi: “‘Wutholere iwanza Yehova Nyamuhanga wawu n’omuthima wawu wosi n’engebe yawu yosi n’obulengekania bwawu bwosi.’
38 Eki ky’ekilhaghiro kikulhu kandi eky’okubanza.
39 Ekyakabiri ekiri ng’eki, kithi: ‘Wutholere iwanza omuliranwa wawu ngoku wuyanzire.’
40 Emighambo eyosi n’esyongangirirya sy’abaminyereri biseghemere okw’eki.”
41 Neryo Abafarisayo babere bakinahindene haghuma, Yesu mwababulya athi:
42 “Muwithe malengekaniaki oku Kristo? Ni mughalha wandi?” Mubamusubirya bathi: “Ni mughalha wa Dawudi.”
43 Mwababulya athi: “Neryo busana naki, Dawudi omw’isondolibwa n’omulimu mwamwahulha mwa Mukama, athi,
44 ‘Yehova mwabugha n’Omukama waghe athi: “Wikale okwa lhuhandi lhwaghe lhw’amali erihika aho nasyahirira esyonzighu syawu sy’ahisi sy’ebisando byawu”’?
45 Neryo Dawudi amabya iniakamwahulha mwa Mukama, angabya athi mughalha wiwe?”
46 Neryo muhathabya oyukamusubiraya, n’eritsuka ekiro ekyo, muhathabya oyukathasyamubulhaya.
