Engulhu Yuwene Ngoku Yahandikawa na Matayo 23:1-39
23 Neryo Yesu mwakania n’abandu bangyi haghuma n’abigha biwe athi:
2 “Abakangirirya b’emighambo n’Abafarisayo babiriyikalya omwa kithumbi kya Musa.
3 Neryo ebyosi ebya bakababwira, mubikole kandi mubighendereko, aliwe isimwakolha erikwamana n’emikolere yabo, kundi bakabugha aliwe sibalikolha ebyo bakabugha.
4 Bakaboha emisiko eyirithohire n’erihirayo okwa bithigho by’abandu, aliwe ibo ibobene-bene sibalyanza n’erithulyako n’omunwe wabu.
5 Ebyosi ebya bakakolha, bakabikolha nuku abandu babalhangire, kundi bakakanyaya ehisanduko hy’amasako ehyo bakambalha busana n’eriyitheya n’erikolha emisike y’esyongyimba syabu mwa miri-miri.
6 Banzire emyanya y’ekitsumbi okw’irya inene n’ebithumbi by’embere-mbere* omwa syosinagogi
7 kandi banzire eriramukibwa omwa hithali n’abandu eribahulhamo Rabbi.*
8 Aliwe inywe, isimwahulhawamo Rabbi, kundi Omukangirirya wenyu ni mughuma, inywe bosi, owundi ni mulikyabu wundi.
9 Kandi isimwahulha owosi-wosi okwa kihugho mwa thatha wenyu, kundi Thatha wenyu ni mughuma, oyuli elhubulha.
10 Kutse isimwahulhawamo basondoli, kundi Omusondoli wenyu ni mughuma ya Kristo.
11 Aliwe omukulhu omw’inywe atholere iniabya mughombe wenyu.
12 Oyukayihamaya akendi syakehibwa, n’oyukayikehaya akendi syahamibwa.
13 “Obulighe okw’inywe, abakangirirya b’emighambo n’Abafarisayo, abathebya! kundi mukakingira abandu ibath’ingira omo Bwami bw’elhubulha; nenyu inywibene-bene simulingiramo, kutse erilighira abakanza eryingiramo.
14 ——
15 “Obulighe okw’inywe, abakangirirya b’emighambo n’Abafarisayo, abathebya! kundi mukalhaba okwa ngetse n’okwa kithaka ekyumire mukasondya ow’erihindulira omwa dini yenyu, omundu amabirihinduka, mukaleka iniatholera e Gehena* kabiri kwilhaba inywe.
16 “Obulighe okw’inywe, abasondoli ndimethime, abakabugha bathi, ‘Omundu amalhahirya omwa lina ly’ehekalhu, akabya isyaliko kibi; aliwe omundu amalhahirya omwa lina ly’ehoro y’ehekalhu, atholere iniakiberererya.’
17 Inywe bakiru kandi ndimethime! Ekikulhu ky’ekyahi, ehoro kutse ehekalhu eyabirileka ehoro iyabya eyibuyirire?
18 Kandi muthi, ‘Omundu amalhahirya omwa lina ly’ekiherero, akabya isyathakolha kibi; aliwe omundu amalhahirya omwa lina ly’ekihembo ekiriko, atholere iniakiberererya.’
19 Inywe ndimethime! Ekikulhu ky’ekyahi, ekihembo kutse ekiherero ekikaleka ekihembo ikyabya kibuyirire?
20 Busana n’ekyo, oyukalhahiraya omwa lina ly’ekiherero akalhahiraya omwa lina lyakyo n’ebyosi ebiriko;
21 n’oyukalhahiraya omwa lina ly’ehekalhu akabya iniamalhahirya omwa lina lyayu n’ery’Oyuwikeremo;
22 n’oyukalhahiraya omwa lina ly’olhubulha akalhahiraya omwa lina ly’ekithumbi kya Nyamuhanga n’ery’Oyuwikere kukyo.
23 “Obulighe okw’inywe, abakangirirya b’emighambo n’Abafarisayo, abathebya! kundi mukaha ekighuma ky’omw’ikumi eky’esyonyinyi esy’omunana n’ebizari n’ejira, aliwe simulitsomana emyatsi mikulhu-mikulhu y’Emighambo, ni bugha ambu, obulingirirania, obughanyiri, n’obuthaleghulha. Emyatsi eyi yabya yitholere iyakolhwa, aliwe butsira erilekererania eyindi.
24 Inywe basondoli ndimethime, abakagheghena akakundu aliwe ibamera engamia!
25 “Obulighe okw’inywe, abakangirirya b’emighambo n’Abafarisayo, abathebya! kundi muk’oghaya ekikopo n’ekibindi by’eyihya, aliwe omwakathi ibyoswiremo omururu* n’esyongumbu nyibi.
26 Inywe Bafarisayo ndimethime, mutsuke eryoya ekikopo n’ekibindi omwakathi, nuku byangahenia n’eyihya.
27 “Obulighe okw’inywe, abakangirirya b’emighambo n’Abafarisayo, abathebya! kundi musosire amasinda awahakireko erangyi nyeru-nyeru, aw’akalhangirika in’uwene eyihya, aliwe omwakathi imwoswire amakuha w’ababiriholha n’obuli mulingo w’ebithisirire.
28 Kuthya nenyu, eyihya abandu bakabalhangira ng’abathunganene, aliwe omwakathi imwoswiremo obuthebya n’obubi.
29 “Obulighe okw’inywe, abakangirirya b’emighambo n’Abafarisayo, abathebya! kundi mukahimba amasinda* w’abaminyereri n’eripamba amasinda w’abathunganene,
30 kandi mukabugha muthi, ‘Kuthwabyaho omwa biro bya bathatha-kulhu bethu, sithwanga bayiyungireko omw’iutha omusasi w’abaminyereri.’
31 Busana n’ekyo, mukayikanganaya ku muli baana b’ab’itha abaminyereri.
32 Neryo mughunzerere ebyo abathatha-kulhu benyu batsuka.
33 “Inywe syonzoka, abaana b’esyonzoka, mwanga lhama muthi okw’itswerwa ly’erighuswa omwa Gehena?*
34 Busana n’eki, ngabathumira abaminyereri, abandu b’amenge, n’abakangirirya. Mukendisyitha abandi n’eribahanika okwa mithi, n’abandi imwabaswirirya omo syosinagogi syenyu n’eribendererya omwa buli tawuni,
35 nuku mwangabyako omusasi w’abathunganene abosi owuthikira okwa kihugho eritsuka okwa musasi w’omuthunganene Abeli erihika okwa musasi wa Zakaria mughalha wa Berekia, oyo mwithira ahakathi-kathi k’ehekalhu n’ekiherero.
36 Kwenene ngababwira, emyatsi yosi eyi yikendi syahika okwa lhulengo olhu.
37 “Yerusalemu, Yerusalemu, omwithi w’abaminyereri kandi oyuk’itha abakathumawa ey’ali omo mabwe—mirundi mingahi munanza erikuma-kumira abaana bawu ba haghuma ngoku engoko yikakuma-kumira ehyana hyayu hy’omwa bipupa byayu! Aliwe muwuthanza.
38 Lebaya! Mwabirisighirwa enyumba yenyu.*
39 Kundi ngababwira, eritsuka lino simwendi syasanyilholhako erihika aho mukendi syabughira muthi, ‘Omughisa ali oko yukasa omwa lina lya Yehova!’”
Emyatsi Ahikwa
^ Kutse “ebyuwene kutsibu.”
^ Kutse “Mukangirirya.”
^ Kutse “ebiryanyeghawa.”
^ Kutse “amasinda w’eryibukwa.”
^ Kutse obundi, “mwabirisighirwayo mwa kihuma.”
