Engulhu Yuwene Ngoku Yahandikawa na Matayo 24:1-51
-
EKIMINYIKALHO KY’ERIBYAHO LYA KRISTO (1-51)
24 Neryo Yesu abere anemulhua omwa hekalhu, abigha biwe mubamuhikako erisyamukangania amanyumba w’ehekalhu.
2 Mwababwira athi: “Mbwino simuli lhangira emyatsi yosi eyi? Kwenene ngababwira, sihali n’eribwe erikendi syasighalha hano endatha oko lindi lithethahimbulhwa.”
3 Abere anikere okwa Kithwe ky’Emizaituni, abigha mubamuhikako ahathe abandu, n’erimubulya bathi: “Thubwire, emyatsi eyi yikendisyabya mughulhu wahi, kandi ni kyahi ekikendi syabya kiminyikalho ky’eribyaho* lyawu n’eky’erihwererera ly’emighulhu?”
4 Yesu mwabasubirya athi: “Muyitheghaye sihabye oyukabathebaya,
5 kundi abangyi basyasa omwa lina lyaghe, bathi, ‘Ningye Kristo,’ kandi basyathebya abandu bangyi.
6 Mukendisyowa esyonyuhi n’engulhu y’esyonyuhi. Simuhahukaye emithima, kundi emyatsi eyi yitholere iyabya, aliwe enduli isiyiriyahika.
7 “Kundi ekihugho kikendi syalhwa n’ekindi kihugho n’obwami bukendisyalhwa n’obundi bwami, kandi hasyabya erikeherera ly’ebyalya n’emisiki ehandi n’ehandi.
8 Ebyosi ebi ni nzuko y’obulhumi bunene.*
9 “Neryo abandu bakendi syabaghalya n’eribitha, n’ebihanda byosi bikendi syabapona busana n’erina lyaghe.
10 N’abangyi bakendi syathwikalha, erighoberania, n’eriponangana.
11 Abaminyereri bangyi b’amabehi bakendi syahulhuka n’erithebya abangyi;
12 kandi busana n’erikanyirira ly’obubi, olhwanzo lhw’abangyi lhukendi syaholhoka.
13 Aliwe oyukendi syayiyinia* erihika okwa nduli akendi syalhamibwa.
14 Kandi engulhu yuwene y’Obwami eyi yikendi syathulhughanibwa omwa kihugho kyosi busana n’eriha obwema okwa bihanda byosi, neryo enduli iyahika.
15 “Busana n’ekyo, omughulhu mukalhangira ekik’itha esyonye ekikaheraya, ekya omuminyereri Danieli akanayako, ikin’imene ahabuyirire (omusomi akolesaye obuyitheghererya),
16 neryo abali e Yudea batsuke erithibitha okwa bithwe.
17 Kandi oyuli okwa nyumba kw’endatha isyakima eriya omwa nyumba yiwe athi akayenda mw’ebindu,
18 n’oyuli omw’irima isyasuba eka eriyenda olhukimba lhw’eriyithomekako.
19 Obulighe okwa bakendi syabya ini bakule n’abakongaya omwa biro ebyo!
20 Mulhole embere erisaba nuku ekiro kyenyu ky’erithibitha kileke erisyabya omwa buthuku bw’eritsuko kutse okwa Sabato;
21 kundi hakendi syabya obulighe bunene obuthe bwathabya eritsuka aho ekihugho kikathahangikirwa erihika nalino, kandi sibwendi syathasyabya.
22 Omo kwenene, ebiro ebyo byamathendi syakehibwa, isihali n’oyukendi syalhama; aliwe busana n’abasombolhwa, ebiro ebyo bikendi syakehibwa.
23 “Neryo omundu amababwira athi, ‘Lebaya! Kristo ane hano,’ kutse, ‘Ane erya!’ isimw’ikiriraya.
24 Kundi abakayahulhamo Kristo ab’amabehi n’abaminyereri b’amabehi bakendi syahulhuka kandi bakendi syakolha ebiminyikalho by’amaaka n’ebikaswekaya busana n’erithebya, nibya kyamathokekana bakendi syathebya n’abasombolhwa.
25 Lebaya! namabiribaghusako akasali.
26 Busana n’ekyo, abandu bamababwira bathi, ‘Lebaya! Yesu ane omo mbwarara,’ isimwayayo; ‘Lebaya! Ane omwa bisenge,’ isimw’ikiriraya.
27 Kundi ngoku akarabyo kakanasira ebulhua lyuba ikakolerya ebulengera lyuba, neryo eribyaho* ly’Omughalha w’omundu ku likendi syabya lithya.
28 Aho ekinda kiri h’amasamba akayisorokeraya.
29 “Obulighe bw’ebiro ebyo bukendisyabya bukanahwa, eryuba likendi syabya mwirimya, n’okwezi sikwendi syakolerya, n’esyongununu sikendi syathoghonga erilhua elhubulha, n’eby’amaaka eby’elhubulha bikendi syasuka-sukana.
30 Neryo ekiminyikalho ky’Omughalha w’omundu kyasyalhangirika omwa lhubulha, n’ebihanda byosi by’ekihugho bikendi syayihumbanga okwa kikuba busana n’obulighe, kandi bikendi syalhangira Omughalha w’omundu akasira omwa bithu by’omwa kyanya iniawithe obuthoki n’olhukengerwa lhunene.
31 Neryo akendi syathuma abamalaika biwe omwa mulenge munene w’engubi,* nabo basyahindania abasombolhwa biwe b’ahaghuma erilhua okwa mahunga ani, eritsuka okwa ngunzerero nguma y’ekyanya erihika okwa yindi.
32 “Neryo mwighire okwa mukya* ono ow’omuthi w’omuthini: Ehithahi hyagho ehirere-hirere hikabya hikanalhasa n’eryasako ebikoma, mukaminya ngoku obuthuku bw’omwisi buli hakuhi.
33 Kuthya nenyu, omughulhu mukalhangira emyatsi yosi eyi, muminye ngoku Omughalha w’omundu ali hakuhi okwa lhukyo.
34 Kwenene ngababwira, olhulengo olhu silhwendi syahwaho emyatsi yosi eyi yitheyabya.
35 Olhubulha n’ekihugho bikendi syahwaho, aliwe ebinywe byaghe sibyendi syahwaho n’ahake.
36 “Sihali oyuwasi ekiro ekyo n’esaha, nomubangabya bamalaika b’elhubulha kutse Omughalha, aliwe ni Thatha musa.
37 Ngoku ebiro bya Noa byanabya, n’eribyaho* ly’Omughalha w’omundu ku likendi syabya lithya.
38 Kundi ngoku kyanabya omwa biro ebyo Eribogha ly’Amaghetse lithe lyabya, abandu babya bakalya n’erinywa, abalhume ibakaherukaya n’abakali ibaheruka, erihika okwa kiro Noa ingirira omwa bwathu,
39 mubathatsomana erihika aho Eribogha ly’Amaghetse lyasira n’eriherya abosi, n’eribyaho ly’Omughalha w’omundu ku likendisyabya lithya.
40 Neryo abalhume babiri bakendi syabya ibane omw’irima; omughuma asyathwalhwa n’owundi asyasighalha.
41 Abakali babiri bakendi syabya ibanemuswa okwa lhuso; omughuma asyathwalhwa n’owundi asyasighalha.
42 Busana n’ekyo, mulhole embere eritheya, kundi simwasi ekiro ekya Omukama wenyu asyasiramo.
43 “Aliwe muminye kino: Omwinye nyumba alyaminya ekisisimuko* ekya omwibi akendyasiramo, isyendi ghotsera nuku enyumba yiwe siyithwibawe.
44 Busana n’omwatsi oyu, nenyu mukanganaye ku munayitheghekire, kundi Omughalha w’omundu akendi syasira okwa saha eya muthalengekenie.
45 “Omo kwenene, omughombe oyutheleghulha kandi ow’amenge nindi oyo omukama wiwe asighira ab’enyumba yiwe, eribaha ebyalya okwa buthuku obutholere?
46 Obutseme buli oko mughombe oyo, mukama wiwe amamweya inianemukolha ekyo!
47 Kwenene ngababwira, akendi syamuyira mwamutheya w’ebindu biwe byosi.
48 “Aliwe omughombe oyo amabya mubi n’eriyibwira omo muthima wiwe athi, ‘Mukama waghe amasibayo,’
49 neryo akatsuka eriswirya abaghombe balikyabo n’erirya n’erinywa haghuma n’abathamiri,
50 omukama w’omughombe oyo akendi syasa okwa kiro athayitsulirye n’okwa saha eyo athasi,
51 kandi akendi syamusuyira kutsibu n’erimughusa eyiri abathebya. Eyo yakendi syalirira n’erikereghetha ameno wiwe.
Emyatsi Ahikwa
^ Kinywe okwa kinywe, “erikunda ly’omukule.”
^ Kutse “oyukayiyinaya.”
^ Kutse “w’engunga.”
^ Kutse “eky’erileberyako.”
^ Kutse “saha singahi esy’ekiro.”
