Engulhu Yuwene Ngoku Yahandikawa na Matayo 25:1-46
25 “Neryo Obwami bw’elhubulha bwangana linganisibwa n’abasika ikumi abathebathabana mulhume, abaheka esyotara syabo eriyalindirira mwira w’omuheruki.
2 Abathano b’okw’ibo babya bakiru, n’abandi bathano babya b’amenge.
3 Kundi abakiru mubaheka esyotara syabo aliwe mubathaheka amaghutha,
4 aliwe ab’amenge mubaheka esyotara syabo n’esyotsupa esiri mw’amaghutha.
5 Mwira w’omuheruki abere asibayo, abosi mubatsuka eriyitsingirako neryo bamaghotsera.
6 Neryo omwakathi k’ekiro abandu mubabirikira bathi: ‘Mwira w’omuheruki amahika! Mughende muyamuthangirire.’
7 Neryo abasika bosi abathebathabana mulhume abo mubahangana n’eritsuka eryakya esyotara syabo.
8 Abakiru mubabwira ab’amenge bathi, ‘Muthuhe okwa maghutha wenyu, kundi esyotara syethu sikayalima.’
9 Ab’amenge mubasubirya bathi: ‘Alinga amaghutha wethu ni make, sithwendi thoka eribaha kugho. Mughende eyo bakaghulirayagho muyayighulire.’
10 Babere banemuyaghulha amaghutha, mwira w’omuheruki mwasa. Abasika abathebathabana mulhume ababya ibanayitheghekire mubingira omwa bugheni bw’eriherukya haghuma nayu, n’olhuyi mulhwakingwa.
11 Enyuma waho, abandi b’okwa basika abathebathabana mulhume mubasa n’eribugha bathi, ‘Mukulhu, Mukulhu, thukyungulire!’
12 Mwabasubirya athi, ‘Ngababwira okwenene, singabasi.’
13 “Busana n’ekyo, mulhole embere eribya imunatheghirye, kundi simwasi ekiro kutse esaha.
14 “Kandi Obwami bw’elhubulha bwangana linganisibwa n’omulhume oyuwaghenda omwa kindi kihugho, amasighira abaghombe biwe b’ebindu biwe.
15 Mwaha omughuma y’esyotalanta* ithano, owundi ibiri, n’owundi nguma, obuli mundu erikwamana n’amaaka wiwe, neryo mwaghenda omwa kindi kihugho.
16 Aho n’aho oyuwahebawa esyotalanta ithano mwayasisuburamo amaghoba esindi ithano.
17 Kuthya n’oyuwahebawa ibiri mwaghoba esindi ibiri.
18 Aliwe omughombe oyuwahebawa etalanta nguma nyisa mwaghenda amayathakulirayo n’eribisayo omwa kithaka.
19 “Habere halhaba buthuku buuli, omukama w’abaghombe abo mwasa neryo amabarirana nabo.
20 Neryo oyuwahebawa esyotalanta ithano mwasa n’amaghoba w’esindi talanta ithano, n’eribugha athi, ‘Mukama, muwanyiha esyotalanta ithano; lebaya, nabirighoba esindi ithano.’
21 Mukama wiwe mwamubwira athi: ‘Wasingya kutsibu, omughombe mubuya kandi muthaleghulha! Wabiribya muthaleghulha okwa bindu bike. Ngendikuyira mwamutheya w’ebindu bingyi. Ingira omwa butseme bw’omukama wawu.’
22 N’oyuwahebawa esyotalanta ibiri mwasa n’eribugha athi, ‘Mukama, muwanyiha esyotalanta ibiri; lebaya, nabirighoba esindi ibiri.’
23 Mukama wiwe mwamubwira athi: ‘Wasingya kutsibu, omughombe mubuya kandi muthaleghulha! Wabiribya muthaleghulha okwa bindu bike. Ngendikuyira mwamutheya w’ebindu bingyi. Ingira omwa butseme bw’omukama wawu.’
24 “Erighunzerera, omughombe oyuwahebawa etalanta nguma mwasa n’eribugha athi: ‘Mukama, munaminya ku wuli mundu oyukalire, wukahulhulha aho wuthahera n’erisongya-songya aho wuthaghulhukiraya.
25 Neryo munasagha, namayabisa etalanta yawu y’omwa kithaka. Imaya etalanta yawu y’eno.’
26 Omukama wiwe mwamusubirya athi: ‘Iwe mughombe mubi kandi mughatha, muwaminya ngoku ngahulhulha aho ndahera n’erisongya-songya aho ndaghulhukiraya, kwa bithe?
27 Neryo wangathwere esyosente* syaghe sy’omwa bbanka, neryo nangabere ingasa nangasihiremo n’amaghoba.
28 “‘Busana n’ekyo, mumulhusayeko etalanta eyo, muheyo ow’esyotalanta ikumi.
29 Kundi oyuwithe akendisyongerwa bingyi, neryo iniabya n’ebingyi. Aliwe oyuthawithe akendi syalhusibwako nibya n’ebyawithe.
30 Neryo mughuse omughombe oyuthawithe mughaso oyu y’omwa mwirimya mw’eyihya. Eyo yakendilirira n’erikereghetha ameno wiwe.’
31 “Omughalha w’omundu akendisyabya akasa omwa lhukengerwa lhwiwe haghuma n’abamalaika biwe abosi, akendi sy’ikalha okwa kithumbi kiwe ky’obwami eky’olhukengerwa.
32 Ebihanda byosi bikendi syahindanibwa embere siwe, kandi akendi syaghabulha abandu, ngoku omulisya akanaghabulha esyombuli omwa syombene.
33 Kandi akendi syahira esyombuli okwa lhuhandi lhwiwe lhw’amali, n’esyombene okwa lhw’amalembe.
34 “Neryo Omwami akendi syabugha n’abali okwa mali wiwe athi: ‘Mwase, inywe Thatha waghe abiritsumulha, musighalhaye Obwami obwatheghekanibawa busana nenyu erilhua okw’itsuka ly’ekihugho.*
35 Kundi munakwa enzalha, nenyu mumwanyiha eky’erirya; munakwa enyotha, mumwanyiha aw’erinywa. Munabya mugheni, mumwanyikokya;
36 munabya ndumbu* mumwamba eky’eriambalha. Munalhwalha mumwanyitsomana. Munahirwa omwa ngomo mumwayanyilebya.’
37 Neryo abathunganene bakendi syamusubirya bathi: ‘Mukama, thwakulholhako mughulhu wahi iwunakwire enzalha thwamakuha eky’erirya, kutse iwunakwire enyotha thwamakuha aw’erinywa?
38 Thwakulholhako mughulhu wahi iwune mugheni thwamakukokya, kutse iwuli ndumbu, thwamakuha eky’eriambalha?
39 Thwakulholhako mughulhu wahi iwunalhwere kutse iwune omwa ngomo thwamayakulebya?’
40 Omwami akendi syabasubirya athi, ‘Kwenene ngababwira, ngoku mwakolhakyo okwa mughuma w’okwa bake-bake b’okwa baghalha bethu aba, mumwakolhakyo okw’ingye.’
41 “Neryo akendi syabwira abali okwa malembe wiwe athi: ‘Mulhue aho ngali, inywe mwabirithakirwa, mughende omwa muliro wa kera na kera owabiritheghekwa busana na Diabolo n’abamalaika biwe.
42 Kundi munakwa enzalha, aliwe mumuthamba eky’erirya; kandi munakwa enyotha, aliwe mumuthamba aw’erinywa.
43 Munabya mugheni, aliwe mumuthanyikokya; munabya ndumbu, aliwe mumuthamba eky’eriambalha; munalhwalha n’erihirwa omwa ngomo, aliwe mumuthanyitsomana.’
44 Neryo nabo bakendi syamusubirya bathi: ‘Mukama, thwakulholhako mughulhu wahi iwunakwire enzalha kutse enyotha kutse iwune mugheni kutse iwuli ndumbu kutse iwulhwere kutse iwune omwa ngomo, thwamaghana erikutsomana?’
45 Neryo akendi syabasubirya athi: ‘Kwenene ngababwira, ngoku muthakolhakyo okwa mughuma w’okwa bake-bake aba, mumuthakolhakyo okw’ingye.’
46 Aba bakendi syaheribwa kera na kera, aliwe abathunganene bakendi syabana engebe y’erikotha.”
Emyatsi Ahikwa
^ Etalanta nguma y’Abagiriki yingene n’esyokilo 20.4.
^ Kinywe okwa kinywe, “efeza.”
^ Kilhangirikire eki kikamanyisaya eributhwa ly’abaana ba Adamu na Eva.
^ Kutse “erithendibya n’esyongyimba esikaghunza.”
