Engulhu Yuwene Ngoku Yahandikawa na Matayo 26:1-75
-
Abahereri bakaya embitha y’eritha Yesu (1-5)
-
Amaghutha awakakumba ndeke akuthibawa oku Yesu (6-13)
-
Erikyuruka ly’erighunzerera n’erighoberibwa (14-25)
-
Eritsukisya Ekihulho ky’Omukama ky’Erigholho (26-30)
-
Eriyighana lya Petero likalhaghulhawa (31-35)
-
Yesu akasaba iniane e Getesemane (36-46)
-
Yesu akahambawa (47-56)
-
Erithondesibwa embere sy’Eribuyiro (57-68)
-
Petero akayighana Yesu (69-75)
26 Neryo Yesu abere aghunza erikania emyatsi eyosi eyi, mwabwira abigha biwe athi:
2 “Munasi ku hamasighalha biro bibiri Erikyuruka iryahika, n’Omughalha w’omundu iniahirwa omwa byalha by’abakendi muhanika okwa muthi.”
3 Neryo abahereri bakulhu n’abakulhu b’abandu mubahindana omwa buthalha bw’omuhereri mukulhu oyukahulhawamo Kayafa,
4 neryo mubaya embitha y’eriyahamba Yesu omwa menge n’erimwitha.
5 Aliwe babya ibanemubugha bathi: “Butsira okwa mukonga, nuku sihabye akasasamaro.”
6 Yesu abere ane e Betania omwa nyumba ya Simoni omuhagha,
7 omukali oyuli n’etsupa ye alabbasta eyiri mw’amaghutha aw’obughuli bunene awakakumba ndeke mwamuhikako, neryo Yesu abere anemulya,* omukali oyo mwatsuka eryuthagho okwa muthwe wiwe.
8 Abigha babere balhangira ekyo, mubahithana n’eribugha bathi: “Busana naki amaghutha aya akakwira busa?
9 Kundi anganaghulibirwe esyosente nene isyawathikya abanakwa.”
10 Yesu abere aminya eki, mwababwira athi: “Busana naki mukaghunza okwa mukali kw’obuholho? Mwakanyikolera ekindu kibuya.
11 Kundi mughulhu wosi mukabya imune n’abanakwa, aliwe ingye simwendisyabya naghe mughulhu wosi.
12 Omughulhu alyahira amaghutha awakakumba ndeke okwa mubiri waghe, alyanyitheghekera eritsikwa.
13 Kwenene ngababwira, ehosi-hosi eyo engulhu yuwene eyi yikathulhughanibawa omwa kihugho kyosi, ekya omukali oyu amakolha nakyo kikendi syakanibwako busana n’erimw’ibuka.”
14 Neryo omughuma w’okwa bigha Ikumi n’Ababiri, oyukahulhawamo Yuda Iskariota, mwaghenda eyiri abahereri bakulhu
15 n’eribugha athi: “Mukendimbaki namaghoberya Yesu nuku muthoke erimuhamba?” Mubabugha bathi ebihandi 30 eby’efeza.
16 Neryo eritsuka-tsukana n’aho, Yuda mwabera erisondekania akaghisa k’erimughoberyamo.
17 Okwa kiro ky’erimbere eky’Omuggati Owathemo Kihamya, abigha mubahika oku Yesu, n’erimubulya bathi: “Wanzire ithwakutheghekera Erikyuruka lyo hayi?”
18 Mwabugha athi: “Mughende omwa tawuni ewa Lebe, mumubwire muthi, ‘Omukangirirya athi: “Obuthuku bwaghe obwabirihirwaho buli hakuhi; ngend’ibuka Erikyuruka n’abigha baghe omwa nyumba yawu.”’”
19 Neryo abigha mubakolha ngoku Yesu anabalhaghira, mubathegheka Erikyuruka.
20 Erigholho lyabere lyahika, Yesu abya inian’ikere okwa meza n’abigha 12.
21 Babere banemulya, mwababwira athi: “Kwenene ngababwira, omughuma w’okw’inywe akendi nyighoberya.”
22 Ekyo mukyab’itha obulighe bunene, neryo obuli mughuma mwatsuka eribugha athi: “Mukama, mbwino n’ingye?”
23 Mwasubirya athi: “Oyukakolhaya naghe omwa kibindi yukendi nyighoberya.
24 Ni kwenene, Omughalha w’omundu akayaghenda, ngoku ebihandikire bikamubughako, aliwe obulighe oko mulhume oyukaghoberaya Omughalha w’omundu! Kyangabere kibuya omulhume oyo kw’athabuthwa.”
25 Yuda, oyuwabya iniakayamughoberaya, mwabugha athi: “Mbwino n’ingye Rabbi?” Yesu mwamusubirya athi: “Iwe iwuwene-wene wamabiribughakyo.”
26 Babere banemulholha embere n’erirya, Yesu mwimya omuggati, neryo abere abirisaba, mwatsutsangagho, mwahagho abigha, n’eribugha athi: “Mwimaye mulye. Oyu akimanira omubiri waghe.”
27 Kandi mwimya ekikopo, mwasaba neryo amabahakyo, n’eribugha athi: “Inywe bosi munywe kukyo,
28 kundi eki kik’imanira ‘omusasi waghe ow’endaghane,’ owakendyuthika busana n’abangyi nuku baghanyirawe ebibi byabo.
29 Aliwe ngababwira: Sinendi syasanywa okwa vini eyi erihika okwa kiro ngendi syanywira kuyo ini nyihya-nyihya haghuma nenyu omo Bwami bwa Thatha waghe.”
30 Erighunzerera, babere baghunza eriimba esyonyimbo sy’eripipa, mubahethukira okwa Kithwe ky’Emizaituni.
31 Neryo Yesu mwababwira athi: “Omwa kiro muno inywe bosi mukendithwikalha busana naghe, kundi kihandikire kithi: ‘Nasyaswirya omulisya, n’ekihangulho ky’esyombuli kyasyapanzikana.’
32 Aliwe ngendisyabya nabirilhubukibwa, ngendi syabatsuka e Galilaya.”
33 Aliwe Petero mwamusubirya athi: “Abosi nomubangathwikalha busana nawu, ingye singendi syathwikalha!”
34 Yesu mwamubwira athi: “Kwenene ngakubwira, omwa kiro muno, engoko-lhome yitheyabika, wukendi nyighana mirundi isathu.”
35 Petero mwamusubirya athi: “Nibya nomunangabya w’eriholha haghuma nawu, singendi syakughana nahake.” N’abandi bigha bosi mubabugha ikyan’ekyo.
36 Neryo Yesu mwasa nabo omwa mwanya owakahulhawamo Getesemane, neryo mwabwira abigha biwe athi: “Mwikale hano, naghe ngaghenda erya ngayasaba.”
37 Mwaghenda haghuma na Petero n’abaghalha ba Zebedayo babiri, mwatsuka eribya omwa bulighe n’erikwa engitsi nene.
38 Neryo Yesu mwababwira athi: “Ngakwire obulighe bunene, nibya bwangana nyitha. Mwikale hano, mutheghaye haghuma naghe.”
39 Abere aghenda bisandu bike, mwathulhama ahisi n’erisaba athi: “Thatha waghe, kyamathokekana, leka ekikopo eki kinyilhabeko. Aliwe butsira busana n’erisonda lyaghe, aliwe eryawu.”
40 Yesu abere asuba eyiri abigha, mweya ibanaghotsere, neryo mwabwira Petero athi: “Mwabirilemwa eritheya haghuma naghe hakiri ahabw’esaha nguma?
41 Mulhole embere eritheya kandi musabe buthumbya, nuku simuwe omw’ilengwako. Ni kwenene omuthima anzire aliwe omubiri akalemererawa.”
42 Kandi mwaghenda amayasaba omurundi wakabiri athi: “Thatha waghe, kyamabya isikyanga thokekana ekikopo eki erilhaba isingathakinywako, leka erisonda lyawu likoleke.”
43 Kandi mwasa ameya ibanaghotsere, kundi babya bakwire othulho thunene.
44 Neryo kandi mwalhua aho bali amayasaba omurundi wakasathu, amasuba omwa binywe ibyan’ebyo.
45 Neryo mwasuba eyiri abigha n’eribabwira athi: “Okwa ndambi ng’eno mukinaghotsere n’erilhuhuka! Lebaya! Esaha yamabirihika hakuhi Omughalha w’omundu erighoberibwa omwa byalha by’abakolha-nabi.
46 Muhangane thughende. Lebaya! Oyukendi nyighoberya amabirihika hakuhi.”
47 Yesu abere akinabugha, lebaya! Yuda, omughuma w’okwa bakwenda Ikumi n’Ababiri mwasa iniane n’ekingungu ky’abandu ibane n’emiyali n’emigho, abo abahereri bakulhu n’abakulhu b’abandu bathuma.
48 Neryo oyukendi mughoberya abya iniabiribaha ekiminyikalho athi: “Oyo ngendilyatsirira,* akendibya iy’oyo; mumuhambe mumubohe.”
49 Yuda mwalhabira ahali Yesu, n’erimubwira athi: “Namakuramukya, Rabbi!” neryo mwamulyatsirira.
50 Aliwe Yesu mwamubwira athi: “Thahye, ni kyahi ekikakuletha hano?” Neryo mubasa hakuhi na Yesu bamamuhamba n’erimuboha.
51 Aliwe lebaya! omughuma w’okwa babya na Yesu mw’ihayo omuyali wiwe amathema omughombe w’omuhereri mukulhu n’erimuthwako okuthwe.
52 Neryo Yesu mwamubwira athi: “Subaya omuyali w’omwa mwanya wagho,* kundi abosi abak’itha omwa muyali basyakwa omwa muyali.
53 Kutse wukalengekanaya wuthi sinangasaba Thatha waghe okwa ndambi eno indi anyihe esyolijoni* esilhabire oku 12 esy’abamalaika?
54 Neryo, Amasako angabererera athi awakabugha athi kitholere ikyabya omwa nzira eyi?”
55 Okwa saha eyo Yesu mwabwira ekingungu ky’abandu athi: “Mukasyanyihamba imune n’emiyali n’emigho ng’omwibi? Obuli kiro ining’ikalha omwa hekalhu ingakangirirya, aliwe mumuthanyihamba.
56 Aliwe ebyosi ebi byamabya nuku ebyo abaminyereri bahandika* bibererere.” Neryo abigha abosi mubamusighania, bamathibitha.
57 Abahamba Yesu mubamuthwalha ewa Kayafa, omuhereri mukulhu, eyo abakangirirya b’emighambo n’abakulhu babya bahindene haghuma.
58 Aliwe Petero mwabya inianamukwamire, aliwe iniane haali, mwahika omwa buthalha bw’omuhereri mukulhu. Abere abiringiramo, mwikalha haghuma n’abatheya b’enyumba nuku alhangire ebikendibya.
59 Neryo abahereri bakulhu n’ab’omw’Ibuyiro abosi babya bakasondya oku Yesu kw’omwatsi w’amabehi nuku bamwithe.
60 Aliwe mubathamubanako n’omughuma, nomwakine indi abema bangyi b’amabehi mubasa. N’enyuma waho abandi babiri mubasa
61 n’eribugha bathi: “Omulhume oyu mwabugha athi, ‘Nangana thoka eritherya ehekalhu ya Nyamuhanga kandi ingahimbayo omwa biro bisathu.’”
62 Busana n’ekyo, omuhereri mukulhu mwahangana n’eribwira Yesu athi: “Busana naki siwuli subiraya? Wukabugha wuthiki okwa ebya bandu bakakubughako ebi?”
63 Aliwe Yesu mwathasubirya. Neryo omuhereri mukulhu mwamubwira athi: “Ngakulhahirisaya embere sya Nyamuhanga oyuliho wuthubwire kwenene nga wuli Kristo, Mughalha wa Nyamuhanga!”
64 Yesu mwamubwira athi: “Iwe iwuwene-wene wamabughakyo. Aliwe ngababwira: Eritsuka na lino mukendi lhangira Omughalha w’omundu inian’ikere okwa lhuhandi lhw’amali olhw’amaaka kandi akasira omwa bithu.”
65 Neryo omuhereri mukulhu mwasathya esyongyimba siwe, n’eribugha athi: “Amabiritsuma! Thukinayithagha obundi bwema? Lebaya! Mwamabiriyowira kw’amabiritsuma.
66 Mukabugha muthiki?” Mubasubirya bathi: “Atholere iniakwa.”
67 Neryo mubathwira omwa busu bwiwe mw’amathande n’erimuha esyongumi. Abandi mubamumathulha omwa busu,
68 n’eribugha bathi: “Iwe Kristo, thaminyerera nga nindi oyo wamakumathulha?”
69 Petero abya inian’ikere eyihya omwa buthalha, neryo omughombe w’obukali mwasa n’eribugha athi: “Nawu wunalhue na Yesu Omugalilaya!”
70 Aliwe Petero mwayighana embere sy’abosi athi: “Ebya wukabugha ebyo singabyasi.”
71 Petero abere akahulhuka omwa buthalha, owundi musika mwamulhangira n’eribwira ababya aho athi: “Omulhume oyu analhue na Yesu Omunazareti.”
72 Kandi Petero mwayighana, amalhahirya athi: “Omulhume oyo singamwasi!”
73 Enyuma w’akathambi kake, ababya bimene aho mubasa n’eribwira Petero bathi: “Omo kwenene, nawu wuli mughuma w’okw’ibo, emibughire yawu yiri ng’eyabu.”
74 Neryo mwatsukiraho eritsuma n’erilhahirya athi: “Omulhume oyo singamwasi!” Aho naho engoko-lhome muyabika.
75 Neryo Petero mwibuka ebya Yesu abugha, athi: “Engoko-lhome yitheyabika, wukendi nyighana emirundi isathu.” Neryo mwaya eyihya amayalira kutsibu.
Emyatsi Ahikwa
^ Kutse “anikere okwa meza.”
^ Kutse “eriha ekisi.”
^ Kutse “Olhubu lhwagho.”
^ Erisoborera, “Elijoni nguma muli abasirikali nga 4,000 erihika 6,000, hano kikakolesibawa erimanyisya omughanzo munene kutsibu, owathebarika.”
^ Kutse “amasako.”
