Engulhu Yuwene Ngoku Yahandikawa na Matayo 27:1-66
27 Bwabere bwabya ngyakya, abahereri bakulhu abosi n’abakulhu b’abandu mubahindana haghuma eriya embitha y’eritha Yesu.
2 Babere babirimuboha, mubamuthwalha ewa gavana ya Pilato.
3 Neryo Yuda oyuwaghoberaya Yesu, abere alhangira ngoku Yesu abiritswerwa olhw’erikwa, mwayikubyabwomo neryo amasubulirya abahereri bakulhu n’abakulhu b’ebihandi 30 by’efeza,
4 n’eribugha athi: “Nabirihalya ingaghoberya oyutheko lhubanza.” Mubamusubirya bathi: “Ekyo kikathuhambako kithi? Ebyo ni byawu!”
5 Neryo mwaghusa ebihandi by’efeza by’omwa hekalhu n’eriyighendera. Neryo mwaghenda amayayihanika.
6 Aliwe abahereri bakulhu mubimya ebihandi by’efeza ebyo n’eribugha bathi: “Sikirilighirawa erihirabyo ahabuyirire ahakabikawa ebikahebawayo, kundi ni syosente sy’omusasi.”*
7 Babere babirilighirana, mubakolesya esyosente esyo erighulha eririma ly’omubumbi nuku abye mwanya w’eritsikamo abagheni.
8 Busana n’ekyo, eririma eryo lyabiryahulhwamo Eririma ly’Omusasi erihika namunabwire.
9 Neryo ebyabughawa erilhabira omo muminyereri Yeremia mubyabererera, ebikabugha bithi: “Kandi mubimya ebihandi 30 by’efeza, ebbeyi y’esyosente eyo abaghuma b’okw’abaana be Israeli bahira okwa mulhume,
10 neryo mubabihayo erighulha eririma ly’omubumbi, erikwamana n’ebya Yehova abya iniabirinyilhaghira.”
11 Neryo Yesu mw’imana embere sya gavana, na gavana oyo mwamubulya athi: “Niwe Mwami w’Abayuda?” Yesu mwasubirya athi: “Iwe iwuwene-wene wamabughakyo.”
12 Aliwe abahereri bakulhu n’abakulhu babere banemumuhandikirira, mwathabasubirya.
13 Neryo Pilato mwamubulya athi: “Siwowire emyatsi mingyi eya banemukubughako?”
14 Aliwe Yesu mwathamusubirya n’ekinywe n’ekighuma, neryo gavana mwasweka kutsibu.
15 Neryo okwa buli kiro ky’erikyuruka, gavana iniakaboholera abandu b’omunya ngomo oyo banzire.
16 Okwa buthuku obo babya ibanabohire omundu oyuwabya asibwe ku ni mubi kutsibu oyukahulhawamo Baraba.
17 Babere banahindene haghuma, Pilato mwababulya athi: “Mwanzire ngababoholere wahi, Baraba kutse Yesu oyukayahulhamo Kristo?”
18 Kundi Pilato abya inianasi ngoku eritsuru ly’erilyaleka ibamuhambisya.
19 Neryo abere an’ikere okwa kithumbi ky’eritswera, mukali wiwe mwamulhaghirako, athi: “Siwuyingiraye omo mwatsi w’omuthunganene oyo, kundi munabwire mungaghalhawa kutsibu omwa bilhotho busana nayu.”
20 Aliwe abahereri bakulhu n’abakulhu mubahongererya ekingungu ky’abandu bathi babughe bathi Baraba yuboholhawe, aliwe Yesu ithawe.
21 Neryo gavana mwababulya athi: “Okwa babiri, mwanzire ingababoholera wahi?” Mubasubirya bathi: “Baraba.”
22 Pilato mwababulya athi: “Neryo Yesu oyukayahulhamo Kristo ngamukolereki?” Abosi mubasubirya bathi: “Ahanikawe okwa muthi!”*
23 Mwababulya athi: “Busana naki? Ni kibi kyahi eky’akolire?” Mubongera eribirikira bathi: “Ahanikawe okwa muthi!”
24 Pilato abere alhangira ngoku eki sikithakolha, aliwe ku kyamaleka abandu ibatsurumira ighuma, mwimya amaghetse n’erinaba okwa byalha embere syabu n’eribugha athi: “Sindiko omusasi w’omundu oyu. Olho ni lhubanza lhwenyu.”
25 Busana n’ekyo, abandu bosi mubamusubirya bathi: “Leka omusasi wiwe abye okw’ithwe n’okwa baana bethu.”
26 Neryo mwababoholera Baraba, aliwe amahamulha athi Yesu aswiribawe kandi amamulhwikira abakayamuhanika okwa muthi.
27 Neryo abasirikali ba gavana mubathwalha Yesu y’omwa kikali kya gavana n’erihindania abasirikali bosi erimuthimbako.
28 Babere babirimulhusya ekanzu yiwe, mubamwambalya olhukimba lhw’erangyi y’olhusasi-sasi,
29 kandi mubalhuka embiitha y’amahwa n’erihirayo okwa muthwe wiwe n’erimuhambya olhuseke omwa byalha biwe by’amali. Neryo mubakukama embere siwe erimusekererya, bathi: “Thwamakuramukya,* iwe Mwami w’Abayuda!”
30 Kandi mubamuthwira kw’amathande n’erimya olhuseke n’eritsuka erimuswirya okwa muthwe.
31 Erighunzerera, babere babirimusekererya, mubamulhusya olhukimba n’erimwambalya ekanzu yiwe bamamuthwalha, bamayamukongomerera okwa muthi.
32 Babere banemughenda, mubeya omulhume we Kurene oyukahulhawamo Simoni. Mubabwira omulhume oyo bathi ahekere Yesu y’omuthi* wiwe w’amaghali.
33 Babere bahika omo mwanya owakahulhawamo Gologota, ni bugha ambu, Omwanya w’Akahangarara,
34 mubamuha evini eyitswangene mw’ebindu ebikalihire tsutsutsu; aliwe abere abirirozya kuyo, mwaghana erinywayo.
35 Babere babirimukongomerera okwa muthi, mubaghabana esyongyimba siwe omw’ighusa ehithuli,
36 neryo mub’ikalha aho erimutheya.
37 Kandi mubahanika ahighulhu okwa muthwe wiwe h’akapa akali kw’ebinywe bino: “Oyu ni Yesu Omwami w’Abayuda.”
38 Neryo abibi babiri mubahanikwa hakuhi nayu, owundi okwa lhuhandi lhw’amali n’owundi okwa lhw’amalembe.
39 N’ababya bakalhabaho ibakatsingaya emithwe yabu n’erimutsuma
40 bathi: “Iwe wabugha wuthi wanganatherya ehekalhu n’erihimbayo omwa biro bisathu, yilhamaye! Wamabya iwuli mughalha wa Nyamuhanga, yikimaye okwa muthi w’amaghali!”*
41 Kandi omwa nzira iyan’eyo, abahereri bakulhu n’abakangirirya b’emighambo n’abakulhu mubatsuka erimusekererya, bathi:
42 “Mwalhamya abandi; aliwe syangathoka eriyilhamya! Ni Mwami we Israeli; leka athayikimya okwa muthi w’amaghali* thwanamw’ikirirya.
43 Abiriyikethera Nyamuhanga; leka Nyamuhanga amulhamaye amabya inianamwanzire, kundi iniakabugha athi, ‘Indi Mughalha wa Nyamuhanga.’”
44 Nibya n’abibi ababya bahanikire okwa mithi hakuhi nayu kubanamusekereraya bathya.
45 Eritsuka saha mukagha sy’erithungyi erihika saha mwenda, muhabya omwirima omwa kihugho kyosi ekyo.
46 Okwa saha nga mwenda, Yesu mwabirikira omwa mulenge munene athi: “Eli, Eli, lama sabaktani?” ni bugha ambu, “Nyamuhanga waghe, Nyamuhanga waghe, busana naki wabirinyisighania?”
47 Abaghuma b’okwa babya bimene aho babere b’owa eki mubatsuka eribugha bathi: “Omulhume oyu alikubirikira Eliya.”
48 Aho n’aho omughuma w’okw’ibo mwathibitha n’eriy’imya embuhuma n’erihirayo omwa vini eyipakere amahirayo okwa lhuseke athi anywe.
49 Aliwe abandi mubabugha bathi: “Mumuleke! Thulebaye Eliya ng’anemwendyasa erisyamulhamya.”
50 Kandi Yesu mwabirikira omwa mulenge munene neryo amathwa omuthima.*
51 Neryo lebaya! ekisukuliryo ky’omwa hekalhu mukyasathika kabiri, eritsuka endatha erihika ekabunu, kandi muhalhaba omusiki, n’esyonguka musyathulhangika.
52 N’amasinda* mwakyungukalha, n’ebinda by’ababuyirire bangyi ababya ibabirighotsera mubyalhuamo
53 (n’abandu abalhua eyiri amasinda Yesu abilhubukibwa mub’ingira omwa tawuni eyibuyirire), n’abandu bangyi mubabalhangira.
54 Aliwe omukulhu mughuma w’abasirikali n’abo abya nabo bakatheya Yesu, babere balhangira omusiki n’ebyamabya, mubakwa obuba bunene n’eribugha bathi: “Omo kwenene, oyu alhue Mughalha wa Nyamuhanga.”
55 Kandi habya abakali bangyi ababya basamalire ibane haali, ababya bakakwama Yesu erilhua e Galilaya bakamuwathikya;
56 abaghuma b’okw’ibo ni Maria Magdalene na Maria mama wa Yakobo na Yose na mama w’abaghalha ba Zebedayo.
57 Neryo bwabere bwabya igholho-gholho, omulhume omugaga owe Arimatea oyukahulhawamo Yozefu, oyuwabya iniabiribya mwigha wa Yesu, mwasa.
58 Omulhume oyu mwahika oku Pilato n’erimusaba omubiri wa Yesu. Neryo Pilato mwahamulha athi bamuhegho.
59 Yozefu mw’imya omubiri, amalingira kugho kw’olhukimba lhw’ekitani olhuwene kandi olhuhenirye
60 neryo amahiragho omw’isinda* embyaka, eyo abya iniabirithakulha omwa lhukuka. Abere abirikumbaghalirya okwa bw’ingira bw’eyisinda* kw’eribwe linene, mwaghenda.
61 Aliwe Maria Magdalene n’owundi Maria mubasighalhaho, iban’ikere ahali eyisinda.
62 Ekiro ekyakwamako, ni bugha ambu okwa kiro kye Sabato,* abahereri bakulhu n’Abafarisayo mubayihindania embere sya Pilato,
63 n’eribugha bathi: “Mukulhu, thuk’ibuka ebya omuthebya oyu abugha iniakineho, athi, ‘Enyuma w’ebiro bisathu nasyalhubukibwa.’
64 Busana n’ekyo, hamulha wuthi eyisinda yitheghibawe erihika okwa kiro kyakasathu, nuku abigha biwe sibase bakasyamw’iba n’eribwira abandu bathi, ‘Abirilhubukibwa okwa baholi!’ Neryo amabehi w’erighunzerera aya iniakendi kalha kutsibu kwilhaba aw’erimbere.”
65 Pilato mwababwira athi: “Mwimaye abatheya. Mughende muyatheghayeyo ngoku mwangathoka.”
66 Neryo mubaghenda bamayatheya eyisinda omw’ihomeka mw’eribwe n’erihirako abatheya.
Emyatsi Ahikwa
^ Kutse “esyosente esyabanika busana n’eryutha omusasi.”
^ Kutse “Ithibawe okwa muthi.”
^ Kutse “wupipawe.”
^ Kutse “erilekulha.”
^ Kutse “amasinda w’eryibukwa.”
^ Kutse “eyisinda y’eryibukwa.”
^ Kutse “eyisinda y’eryibukwa.”
^ Kutse “eritheghekania lyabilhaba.”
