Engulhu Yuwene Ngoku Yahandikawa na Matayo 28:1-20
28 E Sabato yabere yabirihwa, engyakya y’ekiro ekikatsuka ewiki, Maria Magdalena n’owundi Maria mubasyalebya eyisinda.
2 Neryo lebaya! omusiki munene abya iniabirilhaba, kundi omumalaika wa Yehova abya iniabiryandaghalha erilhua elhubulha erisyalhusyaho eribwe. Neryo mubamweya inianalikereko.
3 Abya akakangabasania ng’akarabyo, n’esyongyimba siwe syabya nzeru ng’esyonzururu.
4 Neryo busana n’erimusagha, abatheya mubathithimana, bamabya ng’ababiriholha.
5 Aliwe omumalaika mwabwira abakali athi: “Simubahe, kundi nganasi ngoku mukasondaya Yesu oyuwahanikawa okwa muthi.
6 Syali hano, abirilhubukibwa ngoku anabugha. Mwase mulebaye ahalhue aghotsere.
7 Neryo mughende mwanguhe, mubwire abigha biwe ngoku abirilhubukibwa okwa baholi, kundi lebaya! akendi batsuka e Galilaya. Mukendi mweyayo. Lebaya! Namabiribabwira.”
8 Aho naho mubalhua eyiri eyisinda y’eryibukwa ibanakwire obuba kandi ibanatsemire kutsibu, erithibitha eyiri abigha biwe eriyababwira.
9 Neryo lebaya! Yesu mwabeya n’eribabwira athi: “Obuholho bubye nenyu!” Mubamuhikako, bamathulha okwa bisandu biwe n’erimunamira.
10 Neryo Yesu mwababwira athi: “Simubahe! Mughende muyabwire baghalha bethu nuku baye e Galilaya, eyo yabakendi nyilholerako.”
11 Abakali babere banemughenda, abaghuma b’okwa batheya mubaghenda omwa tawuni eriyabwira abahereri bakulhu b’emyatsi eyosi eyabere.
12 Neryo abatheya babere babirihindana n’erikanirania haghuma n’abahereri bakulhu n’abakulhu, mubaha abasirikali b’ebihandi bingyi by’efeza
13 n’eribugha bathi: “Mubughe muthi, ‘Abigha biwe mubakasa omwa kiro n’erimw’iba ithunaghotsere.’
14 Na gavana amowa omwatsi oyu, ithukendi musoborera* neryo sihali ekikendi leka imwayilhalikirira.”
15 Neryo mubimya ebihandi by’efeza n’erikolha ngoku balhaghirawa, kandi omwatsi oyu abirilhandaghana omwa Bayuda erihika namunabwire.
16 Aliwe, abigha 11 mubaghenda e Galilaya okwa kithwe eyo Yesu abya iniabirithegheka athi bakendi hindanira haghuma.
17 Babere bamulhangira, mubamunamira, aliwe abandi mubathika-thika.
18 Yesu mwaseghera hakuhi nabu n’eribugha athi: “Nabirihebwa ehamuli eyosi omwa lhubulha n’okwa kihugho.
19 Neryo, mughende muyire abigha okwa bandu b’ebihanda byosi, mubabatizaye omwa lina lya Thatha n’ery’Omughalha n’ery’omulimu abuyirire,
20 mubakangiriraye baghendere okwa byosi ebyo nabiribahana. Kandi lebaya! Ngane haghuma nenyu ebiro ebyosi erihika okw’ihwererera ly’emighulhu.”
Emyatsi Ahikwa
^ Kinywe okwa kinywe, “erimulemba-lemba.”
