Engulhu Yuwene Ngoku Yahandikawa na Matayo 3:1-17
3 Omwa biro ebyo, Yohana Omubatizya mwasa omwa mbwarara ye Yudea, amathulira
2 athi: “Muyisubemu, kundi Obwami bw’elhubulha bwabirihika hakuhi.”
3 Oyu yukanibweko erilhabira omwa muminyereri Isaya athi: “Omulenge w’oyukabirikirira omwa mbwarara athi: ‘Mutheghekanaye enzira ya Yehova! Muterekereraye esyonzira siwe.’”
4 Yohana iniakambalha olhukimba lhw’obweya bw’engamia n’omukabba w’olhuhu omwa mbindi yiwe. Ebyalya biwe ini syongyike n’obuki.
5 Neryo abandu be Yerusalemu, n’ab’omwa Yudea yosi, n’ab’omwa bitsweka byosi ebithimbire okwa Yorodani, ibakabya ibanemwasa eyo ali,
6 kandi ibakabisulha amalholho wabo ahathe eribisirira neryo iniabatizyabo* omwa Lhusi Yorodani.
7 Abere alhangira abangyi b’okwa Bafarisayo n’Abasadukayo bakasa erisyabatizibwa, mwababwira athi: “Inywe baana b’esyonzoka, nindi oyuwabahabwire athi muthibithe nuku muyibalhaye okw’isuyira erikasa?
8 Busana n’ekyo, muhethaye ebighuma ebikakanganaya eriyisubamu.
9 Isimwayitheba omw’iyibwira muthi: ‘Thuli baana ba Abrahamu.’ Kundi ngababwira nyithi Nyamuhanga anawithe amaaka w’eriha Abrahamu y’abaana erilhua omwa mabwe aya.
10 Embasa yabirihirwa omwa syondina sy’emithi. Neryo obuli muthi owathehethaya ebighuma ebyuwene akendi kondwa n’erighuswa omwa muliro.
11 Ingye ngababatizaya omwa maghetse busana n’eriyisubamu lyenyu, aliwe oyukasa enyuma syaghe andengirye amaaka, singahikire n’okwa lhulengo lhw’erimulhusya esyongetha siwe. Iyo asyababatizya omwa mulimu abuyirire n’omwa muliro.
12 Ekitiyo kiwe ky’erighulhukyamo kine omwa byalha biwe, akendi syabirya ndeke ekihumbiro kiwe, iniakuma-kumira engano omwa kighona, aliwe omusunga akendi syahisiryagho omwa muliro owathe angalimibwa.”
13 Neryo Yesu mwasa okwa lhusi Yorodani akalhua e Galilaya nuku Yohana amubatizaye.
14 Aliwe Yohana mwalengesya erimughania, omw’ibugha athi: “Niwe wutholere erinyibatizya, kandi wukasa eyo ngali?”
15 Yesu mwamusubirya athi: “Leka kibye endambi eno, kundi omwa nzira eyi thutholere ithwaberererya ebyosi ebithunganene.” Neryo Yohana mwaleker’aho erimughania.
16 Yesu abere abiribatizibwa, aho naho mwahangana omwa maghetse n’erimana; neryo lebaya! olhubulha mulhwakyungukalha, amalhangira omulimu wa Nyamuhanga akandaghalha ng’akalikuku n’erimwikirako.
17 Kandi lebaya! omulenge mwalhua omwa lhubulha athi: “Oyu ni Mughalha waghe, omwanzwa, oyo ngatsemera.”
Emyatsi Ahikwa
^ Kutse “erilubba.”
