Engulhu Yuwene Ngoku Yahandikawa na Matayo 4:1-25
4 Neryo omulimu mwathwalha Yesu y’omwa mbwarara nuku Diabolo amulengeko.
2 Yesu abere abiribya omwa kisibo ahabw’ebiro 40, omwa musibo n’omwa kiro, mwakwa enzalha.
3 Neryo Oyukalenga okwa bandu mwamuhikako n’eribugha athi: “Wamabya iwuli mughalha wa Nyamuhanga, bwira amabwe aya abye byalya.”*
4 Aliwe Yesu mwamusubirya athi: “Kihandikire kithi: ‘Omundu syalibyaho ahabw’ebyalya* bisa, aliwe busana n’obuli kinywe ekikalhua omwa buno bwa Yehova.’”
5 Neryo Diabolo mwamuthwalha omwa tawuni eyibuyirire, mwamuhira okwa lhuthwe lhw’ehekalhu
6 n’erimubwira athi: “Wamabya iwuli mughalha wa Nyamuhanga, yighuse ahisi, kundi kihandikire kithi: ‘Asyathuma abamalaika biwe busana nawu,’ neryo, ‘Basyakubaghalira omwa byalha byabo nuku ekisandu kyawu sikiyihinde okw’ibwe.’”
7 Yesu mwamusubirya athi: “Kandi kihandikire kithi: ‘Siwutholere wukalenga oku Yehova Nyamuhanga wawu.’”
8 Kandi Diabolo mwathwalha Yesu y’okwa kithwe kiri-kiri kutsibu n’erimukangania amami wosi w’ekihugho n’olhukengerwa lhwagho.
9 Neryo mwamubwira athi: “Ngendi kuha ebindu byosi ebi wamanyikukamira n’erinyiramya.”
10 Neryo Yesu mwamubwira athi: “Ulhua hano, Sitani! Kundi kihandikire kithi: ‘Yehova Nyamuhanga wawu ya wutholere iwaramya, kandi iyo musa ya wutholere iwakolera omubiiri owabuyirire.’”
11 Neryo Diabolo mwaghenda, neryo lebaya! abamalaika mubasa, bamatsuka eriwathikya Yesu.
12 Neryo Yesu abere owa ngoku Yohana abirihambwa, mwaghenda e Galilaya.
13 Abere alhua e Nazareti, mwayikalha e Kapernaumu hakuhi n’engetse omwa bulhambu bwa Zabuloni n’obwa Nafutali,
14 nuku aberereraye ebyabughawa erilhabira omwa muminyereri Isaya, oyuwabugha athi:
15 “Iwe kihugho kya Zabuloni n’ekya Nafutali, okwa nzira y’engetse, okwa wundi musirya we Yorodani, e Galilaya y’ebihanda!
16 Abandu abikere omwa mwirimya mubalhangira ekyakakalha kinene, n’ababya bikere omwa kitsweka ky’omwirimya w’olhuholho, ekyakakalha mukyabakolerya.”
17 Eritsuka okwa buthuku obo, Yesu mwatsuka erithulira n’eribugha athi: “Muyisubemo, kundi Obwami bw’elhubulha bwabirihika hakuhi.”
18 Yesu abere anemulhaba okwa musike w’Engetse ye Galilaya, mwalhangira Simoni oyukahulhawamo Petero na mughalha wabu ya Anderea ibanemughusa obutimba bw’omwa ngetse kundi babya basohi.
19 Neryo mwababwira athi: “Mungwame, ngendibayiramo basohi b’abandu.”
20 Mubalhuaho ibasighania amatimba wabo n’erimukwama.
21 Abere akalhuaho, mwalhangira abandi babiri ababuthenwe haghuma, ya Yakobo na Yohana ibane omwa bwathu na thatha wabu ya Zebedayo, ibanemukokothya amatimba wabu, neryo mwababirikira.
22 Aho naho mubasighania obwathu na thatha wabu, neryo bamakwama Yesu.
23 Neryo mwathimba omwa Galilaya yosi, akakangirirya omwa syosinagogi syabo n’erithulha engulhu yuwene y’Obwami n’erilhamya obuli mulingo wosi w’amalhwere n’amatseke.
24 N’omwatsi owamuhambireko mwalhandaghana omwa Suria yosi, n’abandu mubamulethera abalhwere abosi ababya bakaghalhwa busana n’amalhwere muthina-muthina, ababya kw’esyombinga, abathutsa, n’abasanyarere, nayu amabalhamya.
25 Busana n’ekyo, abandu bangyi mubakwama Yesu erilhua e Galilaya, e Dekapoli,* e Yerusalemu, e Yudea n’eyisirya we Yorodani.
Emyatsi Ahikwa
^ Kinywe okwa kinywe, “omuggati.”
^ Kutse “omuggati.”
^ Kutse “Ekitsweka ky’Esyotawuni Ikumi.”
