Engulhu Yuwene Ngoku Yahandikawa na Matayo 5:1-48
-
ERIKANGIRIRYA LY’OKWA KITHWE (1-48)
-
Yesu akatsuka erikangirirya okwa kithwe (1, 2)
-
Ebindu mwenda ebikaletha etseme (3-12)
-
Omunyu n’ekyakakalha (13-16)
-
Yesu eriberererya Emighambo (17-20)
-
Erihabulha erihambire okw’ihithana (21-26), obusingiri (27-30), erikomolha (31, 32), erilhahirya (33-37), erithuhulya (38-42), erianza esyonzighu (43-48)
-
5 Abere alhangira abandu bangyi, mwahethukira okwa kithwe; neryo abere abir’ikalha, abigha biwe mubasa aho ali.
2 Neryo mwakumbulha obuno bwiwe n’eritsuka eribakangirirya, athi:
3 “Obutseme buli okwa basi ko bali n’ekiyithawa ky’eby’obunyakirimu, kundi Obwami bw’elhubulha ni bwabu.
4 “Obutseme buli okwa bakalira, kundi bakendi syahumulikanibwa.
5 “Obutseme buli okwa bolho, kundi bakendi syasighalya ekihugho.
6 “Obutseme buli okwa bakwire enzalha n’enyotha y’ekithunganene, kundi bakendi syughuthibwa.
7 “Obutseme buli okwa bakakanganaya obughanyiri, kundi bakendi syakanganibwabo.
8 “Obutseme buli okwa bahenirye omwa muthima, kundi bakendi syalhangira Nyamuhanga.
9 “Obutseme buli okwa bakahiraho obuholho, kundi bakendi syahulhwamo baghalha ba Nyamuhanga.
10 “Obutseme buli okw’abo ababiriendereribwa busana n’ekithunganene, kundi Obwami bw’elhubulha ni bwabu.
11 “Obutseme buli okw’inywe omughulhu abandu bakabatsuma n’eribendererya n’eribabughako amabehi w’obuli mulingo wosi w’ebindu bibi busana naghe.
12 Mutseme kandi mutsange kundi olhuhembo lhwenyu ni lhunene elhubulha, kundi kuban’endereraya bathya abaminyereri ababyaho kera.
13 “Muli munyu w’ekihugho, aliwe omunyu amabirihwamo obusihe bwagho, obusihe obo bwangasubamo buthi? Iniakendibya isyangathasyakolesibwa omwa kyosi-kyosi aliwe iniakendi ghuswa abandu ibalyathangiriragho.
14 “Muli kyakakalha ky’ekihugho. Etawuni yamabya okwa kithwe siyangabisama.
15 Abandu bakakaya etara, sibali hirayo omwisi w’ekithiri, aliwe bakahirayo okwa muthaghalha w’etara nuku yikoleraye abosi abali omwa nyumba.
16 Kuthya, nenyu muleke ekyakakalha kyenyu kikoleraye embere sy’abandu, nuku bangalhangira emibiiri yenyu mibuya n’eriha Thatha wenyu oyuli elhubulha y’olhukengerwa.
17 “Simulengekanaye muthi nasa erisyalhusyaho Emighambo kutse Abaminyereri. Nasa eriberereryayo, butsira erilhusyayoho.
18 Omo kwenene, ngababwira ngoku olhubulha n’ekihugho nomubyangahwaho, sihali n’akakwarali n’akaghuma ak’enyughuta akangalhusibwa okwa Mighambo erihika aho emyatsi yosi yasyabererera.
19 Neryo oyukathwa ekighuma ky’okwa bihano bike-bike ebi n’erikangirirya abandi erikolha ekyo, akendi syahulhwamo muke omwa Bwami bw’elhubulha. Aliwe oyukabighenderako n’eribikangirirya abandi, akendi syahulhwamo mukulhu omwa Bwami bw’elhubulha.
20 Kundi ngababwira nyithi erithunganene lyenyu lyamathendilhaba okwa ly’abahandiki n’Abafarisayo, isimwendi sy’ingira nahake omwa Bwami bw’elhubulha.
21 “Mwabiriowa ngoku kyabwirawa abakera kithi: ‘Siwutholere wuk’itha, aliwe oyuk’itha akendi syalhuthonda omwa koti.’
22 Aliwe ibbwa ngababwira nyithi, owosi-wosi oyukahithana lhughumerere oko mulikyabo akendi syalhuthonda omwa koti; kandi n’oyukatsuma mulikyabo akendi syalhuthonda omwa Koti Ngulhu; aliwe oyukabwira mulikyabo athi, ‘Wuli mukiru mbulha mughaso!’ akendi syatholera erighuswa omwa Gehena.*
23 “Neryo wamabya iwamabiriletha ekihembo kyawu okwa kiherero, neryo wuk’ibukira aho ngoku mulikyenyu anakuhitheneko,
24 wusighe ekihembo kyawu ky’aho embere sy’ekiherero, wughende. Wutsuke erihiraho obuholho na mulikyenyu, neryo wusubule wuheyo ekihembo kyawu.
25 “Anguha erihiraho obuholho n’oyo wuwitheko olhubanza imukine omwa nzira, nuku syakuthwale okwa mutsweri, n’omutsweri akakuwathya omupolisi w’okwa koti, neryo wukahirwa omwa ngomo.
26 Omo kwenene ngababwira, isiwendilhuamo erihika aho wukendi thuhira n’akanusu* kake akawusighere nako.
27 “Mwabiriowa ngoku kyabughawa kithi: ‘Siwutholere wukasingira.’
28 Aliwe ngababwira nyithi obuli mundu oyukalholha embere erisamalira omukali neryo akamuyighomba akabya iniamabirisingira nayu omwa muthima.
29 Neryo eriso lyawu ly’amali lyamaleka wukathwikalha, lihemo wulighuse. Kundi kyuwene eriherya ekitsuko kyawu kighuma omwakanya k’omubiri wawu wosi erighuswa omwa Gehena.*
30 Kandi ebyalha byawu by’amali byamaleka wukathwikalha, bithwe, wubighuse. Kundi kyuwene eriherya ekitsuko kyawu kighuma omwakanya k’omubiri wawu wosi erighuswa omwa Gehena.*
31 “Kandi mukyabuwa kithi: ‘Oyukakomolha mukali wiwe, amuhe ebaruha y’erikomolha.’
32 Aliwe ngababwira nyithi, owosi-wosi oyukakomolha mukali wiwe, isi busana n’obusingiri, akaleka iniabya omwa kithegho ky’obusingiri,* kandi oyukaherukaya oyuwabirikomolhwa akabya iniamasingira.
33 “Kandi mwabiriowa ekyabwirawa abakera kithi: ‘Siwutholere wukalhahirya buyira, aliwe wutholere iwaliha ebya wayilhagha embere sya Yehova.’
34 Aliwe ngababwira nyithi: Isiwalhahiraya nahake, nomulyangabya ilhahirya omwa lina ly’olhubulha kundi ni kithumbi ky’obwami kya Nyamuhanga;
35 kutse omwa lina ly’ekihugho kundi ni kithumbi ky’ebisandu biwe; kutse omwa lina lye Yerusalemu kundi ni tawuni y’Omwami w’amaaka.
36 Isiwalhahiraya omwa lina ly’omuthwe wawu, kundi siwangahindulha n’olhuywiri n’olhughuma mwa lhweru kutse mwa lhwiraghulhu.
37 Leka e ‘Ee’ yawu yibye ee, ne ‘Eyihi,’ eyihi, kundi ekilhabire okw’ebi kikalhua okwa mubi.
38 “Mwabiriowa ngoku kyabughawa kithi: ‘Eriso busana n’eriso n’erino busana n’erino.’
39 Aliwe ngababwira nyithi: Isiwakakalhukana n’omundu mubi, aliwe omundu amakumathulha okwa lithema ly’amali, mubindukiraye n’erindi.
40 Kandi omundu amanza erikuthwalha omwa koti, ak’imya olhukimba lhwawu lhw’omwakathi, leka imaye n’olhw’eyihya;
41 kandi omunya-buthoki amakuha omubiiri w’erighenda nayu kilomita nguma, ghenda nayu kilomita ibiri.
42 Omundu amakusaba, ambi iwamuha, n’oyukakuyibwekako* isiwaghana erimubweka.
43 “Mwabiriowa ngoku kyabughawa kithi: ‘Wutholere iwanza omuliranwa wawu n’eripona enzighu yawu.’
44 Aliwe ngababwira nyithi: Mulhole embere erianza esyonzighu syenyu kandi musabire abakabendereraya,
45 nuku mwangakangania ku muli baghalha ba Thatha wenyu oyuli omwa lhubulha, kundi akahulhukiraya ababi n’ababuya omwisi wiwe kandi akaha abathunganene n’abathathunganene b’embulha.
46 Kundi ibbwa mwamanza ababanzire basa, imukendi thasyahemberwaki? N’abasolesya ku bathekolha bathya?
47 Kandi ibbwa mwamaramukya balikyenyu basa, ni kyahi eky’embaghane ekyamukendibya imwamakolha? N’ab’ebindi bihanda ku bathekolha bathya?
48 Mutholere imwabya abahikene* nga Thatha wenyu w’elhubulha kw’ahikene.
Emyatsi Ahikwa
^ Omwanya w’erihisiryamo akasasiro eyihya we Yerusalemu. Lebaya Erisoborera Ebinywe.
^ Kutse “ekwadrani y’erighunzerera.”
^ Omwa Lhugiriki, por·neiʹa. Lebaya Erisoborera Ebinywe.
^ Ni bugha ambu, eribweka ahathe erighobesya.
^ Kutse “abalhughirirene.”
