Engulhu Yuwene Ngoku Yahandikawa na Matayo 6:1-34
6 “Muyitheghaye okw’ikolha ebithunganene embere sy’abandu mukanza babalhangire; bithe bithya Thatha wenyu oyuli omwa lhubulha isyendi syabahemba.
2 Neryo omughulhu mukahayo ebihembo by’olhukeri,* simuyibuhire engubi,* ng’abathebya kubakakolha omwa syosinagogi n’okwa syonzira, nuku abandu bangabapipa. Kwenene ngababwira, bawithe olhuhembo lhwabo lhwosi.
3 Aliwe inywe, omughulhu mukahayo ebihembo by’olhukeri, isimwaleka ebyalha byenyu by’amalembe bikaminya ekya byalha byenyu by’amali bikakolha,
4 nuku ebihembo byenyu by’olhukeri byangabya omwa bubiso-biso. Neryo Thatha wenyu oyukalhangira n’ebiri omwa bubiso-biso asyabahemba.
5 “Kandi omughulhu mukasaba simubye ng’abathebya, kundi banzire erisaba iban’imene omwa syosinagogi n’omwa mahwa w’esyonzira nene-nene nuku balholhaweko n’abandu. Kwenene ngababwira, bawithe olhuhembo lhwabo lhwosi.
6 Aliwe omughulhu wukasaba, w’ingire omwa kisenge kyawu, wukendibya wabirikinga olhuyi, wusabe Thatha wawu oyuli omwa bubiso-biso. Neryo Thatha wawu oyukalhangira n’ebiri omwa bubiso-biso asyakuhemba.
7 Omughulhu wukasaba, siwusubirire omwa binywe bighumerere ng’ab’ebihanda ku bakakolha, kundi bakalengekanaya bathi bakendyowibwa busana n’ebinywe byabu bingyi.
8 Neryo simubye ng’ibo, kundi Thatha wenyu anasi ebya mukayithagha nibya isimuli mwamusaba.
9 “Neryo mutholere imwasaba muthya:
“‘Thatha wethu oyuli elhubulha, erina lyawu libye libuyirire.
10 Obwami bwawu bwase. Erisonda lyawu likoleke okwa kihugho ngoku liri omwa lhubulha.
11 Wuthuhe ebyalya byethu eby’ekiro ekya munabwire;
12 wuthughanyire amabanza* wethu, ngoku nethu thukaghanyira abali mw’amabanza wethu.
13 Kandi siwuthwingiraye omw’ilengwako, aliwe wuthulhamaye* okwa mubi.’
14 “Kundi mwamaghanyira abandu b’ebisobyo byabu, na Thatha wenyu w’elhubulha nayu iniakendi baghanyira;
15 aliwe mwamaghana erighanyira abandu b’ebisobyo byabu, na Thatha wenyu nayu isyendi baghanyira.
16 “Omughulhu mukabya omwa kisibo, simubye mukabya n’obusu bw’olhulighe-lighe ng’abathebya, kundi bakatsururukaya* obusu bwabu nuku abandu baminye ku bali omwa kisibo. Kwenene ngababwira, bawithe olhuhembo lhwabo lhwosi.
17 Aliwe iwe, omughulhu wuli omwa kisibo, wuhire omwa muthwe wawu mw’amaghutha n’erinaba omwa busu,
18 nuku abandu sibaminye ku wuli omwa kisibo aliwe Thatha wawu musa oyuli omwa bubiso-biso. Neryo Thatha wawu oyukalhangira n’ebiri omwa bubiso-biso asyakuhemba.
19 “Muleke eriyibikira eby’obughuli okwa kihugho, kundi kuli ehinyurughunzu n’amakenge ebikendi bitsandya n’abibi abakend’ibabyo.
20 Omwakanya k’ekyo, muyibikire eby’obughuli omwa lhubulha, kundi siyiri ehinyurughunzu n’amakenge ebyanga bitsandya n’abibi abang’ibabyo.
21 Kundi ahali ebindu byawu by’obughuli, h’omuthima wawu akabya.
22 “Etara y’omubiri ly’eriso. Neryo eriso lyawu lyamathungerera kighuma,* omubiri wawu wosi iniakendibya kyakakalha.
23 Aliwe eriso lyawu lyamabya mw’eriyighomba,* omubiri wawu wosi iniakendibya mwirimya. Ekyakakalha ekiri omw’iwe kyamabya kwenene ini mwirimya, oyo iniakendibya mwirimya munene!
24 “Sihali oyuwanga kolera abakama babiri; kundi iniakendi pona omughuma inianza owundi, kutse iniakendyamakirira omughuma iniaghaya owundi. Simwanga kolera Nyamuhanga n’eby’Obugaga.
25 “Busana n’omwatsi oyu, ngababwira nyithi: Muleke erihangya-hangya busana n’engebe yenyu nga mukendiryaki kutse nga mukendinywaki, kutse busana n’emibiri yenyu nga mukendyambalhaki. Mbwino engebe siyilengire ebyalya, n’omubiri syalengire esyongyimba?
26 Musamalire ndeke esyonyonyi sy’omwa kyanya; sisyebiba kutse erihulhulha kutse eribika omwa bighona, aliwe Thatha wenyu w’elhubulha akalisayasyo. Mbwino simuli b’obughuli kw’ilhabasyo?
27 Nindi okw’inywe oyuwang’ongera okwa ngebe yiwe nibya n’edakika* nguma busana n’erihangya-hangya?
28 Kandi busana naki mukahanga-hangaya busana n’eky’eryambalha? Mwighire okwa bimole, ngoku bikakulha; sibyekolha, kutse erisona esyongyimba;
29 aliwe ngababwira, nibya na Solomona omwa lhukengerwa lhwiwe lhwosi mwathambalha ng’ekighuma ky’okw’ibyo.
30 Neryo Nyamuhanga amabya ikw’akambalhaya athya ebithi by’omoli ebikabyaho munabwire omungya ibyaghuswa omwa muliro, mbwino syendi bambalya kwilhaba aho, inywe b’erikirirya like?
31 Neryo simuhanga-hangaye n’eribugha muthi, ‘Thukendiryaki?’ kutse ‘Thukendinywaki?’ kutse ‘Thukendi ambalhaki?’
32 Kundi ebihanda bikasondaya ebindu byosi ebi bya kutsibu. Thatha wenyu w’elhubulha anasi ku mukayithagha ebindu byosi ebi.
33 “Neryo mulhole embere eritsuka erisondekania Obwami n’erithunganene liwe, n’ebindi byosi ebi mukendiongerwabyo.
34 Neryo simuhanga-hangaye busana n’omungya, kundi ekiro ky’omungya kikendi syabya n’amaghaniryo wakyo. Obuli kiro kiwithe ebitsibu byakyo.
Emyatsi Ahikwa
^ Kutse “eriha abanakwa b’ebihembo.” Lebaya Erisoborera Ebinywe.
^ Kutse “simuyirangirire.”
^ Ni bugha ambu, “ebibi byethu.”
^ Kutse “wuthusabule.”
^ Kutse “sibali tsomana emisosere yabo.”
^ Kutse “lyamalhangira ndeke.” Kinywe okwa kinywe, “lyamabya lyolho.”
^ Kinywe okwa kinywe, “libi.”
^ Kinywe okwa kinywe, “‘kyubbiti nguma’ ni bugha ambu inji nga 17.5.”
