Engulhu Yuwene Ngoku Yahandikawa na Matayo 7:1-29
7 “Muleke eribya mukatswera nenyu mukasyatswerwa;
2 kundi ngoku mukatswera abandi, nenyu ko mukendi syatswerwa muthya, n’olhulengo olhwamukalengeramo abandi, nenyu lhwabakendi syabalengeramo.
3 Neryo busana naki iwalhangira akathi akali omo liso lya mulikyenyu aliwe iwuthalhangira omulabba* owali omwa liso lyawu?
4 Kutse wangabwira wuthi mulikyenyu wuthi, ‘Leka ngalhusaye omwa liso lyawu mw’akathi,’ aliwe omwa lyawu imune omulabba?*
5 Iwe muthebya! Tsuka erilhusya omwa liso lyawu mw’omulabba* owalimu, imuwalhangira ndeke ngoku wangalhusya omwa liso lya mulikyenyu mw’akathi.
6 “Simuhe esyombwa sy’ebindu bibuyirire kutse erighusira esyombunu sy’ebindu by’obughuli nuku sisibiryathangirire n’enyuma waho sikababindukira n’eribasathangya.
7 “Mulhole embere erisaba, neryo mukendi habwakyo; mulhole embere erisondekania neryo mukendi banakyo; mulhole embere erikongotha neryo mukendi kyungulirwa;
8 kundi obuli mundu oyukasaba akahebawa, n’obuli mundu oyukasonda-sondaya akabana, n’obuli mundu oyukakongotha akakyungulirawa.
9 Nindi okw’inywe oyuwangaha omwana wiwe y’eribwe, amamusaba omuggati?
10 Kutse nindi oyuwangamuha enzoka, amamusaba eyiswe?
11 Neryo, nomomune babi munasi eriha abaana benyu b’ebihembo ebyuwene, na Thatha wenyu w’elhubulha angaha bungahi abakamusaba b’ebibuya!
12 “Busana n’ekyo, ebyosi ebyo mwanzire abandu ibabakolera, nenyu mutholere imwabakolerabyo. Kundi eki ky’Emighambo n’Abaminyereri bakamanyisaya.
13 “Mwingire omwa lhukyo lhuke, kundi olhukyo olhunene n’enzira nene yikakolhaya okw’ihera, kandi abakalhaba muyo ni bangyi;
14 aliwe olhukyo olhuke n’enzira enyike-nyike yikakolhaya okwa ngebe, kandi abake babakabanayo.
15 “Muyitheghaye okwa baminyereri b’amabehi abakabahikako ibabiriyisosekania ng’esyombuli, aliwe omwa kathi kabo ini byuhu ebikalire kutsibu.
16 Mwasyaminyererabo busana n’ebighuma byabo. Mbwino abandu bakan’oha emizabibu okwa mahwa kutse emithini okwa matholhu?
17 Kuthya, obuli muthi owuwene akahethaya ebighuma ebyuwene, aliwe obuli muthi owalhundire akahethaya ebighuma ebibbolire.
18 Omuthi owuwene syangahethya ebighuma ebithuwene, kutse omuthi owalhundire syangahethya ebighuma ebyuwene.
19 Obuli muthi owathehethaya ebighuma ebyuwene akakondawa n’erighuswa omwa muliro.
20 Neryo kwesi, mwasyaminyerera abandu abo busana n’ebighuma byabo.
21 “Si y’obuli mundu oyukambwira athi, ‘Mukama, Mukama,’ yukendi syingira omwa Bwami bw’elhubulha, aliwe yan’oyo musa oyukakolha erisonda lya Thatha waghe oyuli elhubulha.
22 Okwa kiro ekyo, abangyi bakendi syambwira bathi: ‘Mukama, Mukama, muthuthaminyerera omo lina lyawu, n’erihighitha esyombinga omo lina lyawu, n’erikolha eby’amaaka bingyi omo lina lyawu?’
23 Neryo ngendi syababwira nyithi: ‘Singabasi nahake! Mulhue aho ngali inywe ngoli sy’ebibi!’
24 “Busana n’ekyo, obuli mundu oyukowa ebinywe byaghe ebi n’eribighenderako akendibya ng’omundu w’amenge oyuwahimba enyumba yiwe okwa lhukuka.
25 Neryo embulha muyawa, amaghetse amabogha, n’omuyagha amahitha, byamayiswirya oko nyumba eyo aliwe muyithathera, kundi omusingyi wayo abya okwa lhukuka.
26 Aliwe oyukowa ebinywe byaghe ebi neryo akaghana eribighenderako akendibya ng’omukiru oyuwahimba enyumba yiwe y’okwa museghe.
27 Neryo embulha muyawa, amaghetse amabogha, n’omuyagha amahitha, byamayiswirya okwa nyumba eyo, neryo muyathera n’eritsandira ighuma.”
28 Yesu abere aghunza eribugha emyatsi eyi, abandu mubasweka kutsibu busana n’emibere yiwe y’erikangirirya,
29 kundi mwabakangirirya ng’oyuwithe ehamuli, butsira ng’abakangirirya babu b’emighambo.
