Engulhu Yuwene Ngoku Yahandikawa na Matayo 8:1-34
8 Yesu abere alhua okwa kithwe, abandu bangyi mubamukwama.
2 Neryo lebaya! omuhagha mwasa, mwamunamira, n’eribugha athi: “Mukama, wamabya iwunanzire, iwukendi nyilhamya.”
3 Neryo Yesu mwananulha okuboko, amamuthulhako, athi: “Ngananzire! Wulhamibawe.” Aho n’aho ebihagha biwe mubyalhama.
4 Neryo Yesu mwamubwira athi: “Isiwabwira owosi-wosi, aliwe wuyayikangaye okwa muhereri, kandi wuheyo ekihembo ngoku Musa alhaghira, eribaha obwema.”
5 Abere ahika e Kapernaumu, omukulhu mughuma w’abasirikali mwamuhikako, mwamulemba-lemba
6 athi: “Mukulhu, omughombe waghe anakesirye omwa nyumba abirisanyarara, kandi akaghalhawa kutsibu.”
7 Mwamubwira athi: “Ngendibya ingahikayo, ngendi mulhamya.”
8 Omukulhu mughuma w’abasirikali oyo mwamusubirya athi: “Mukulhu, ngayowa ngasingatholere iwe eryasa ewaghe, aliwe kwamakyabugha ekinywe kisa n’omughombe waghe akendi lhama.
9 Kundi naghe ngali munya-buthoki, ngawithe abasirikali abo ngasondolha, kandi ngabwira oyu indi, ‘Ghenda!’ neryo iniaghenda, n’owundi indi, ‘Asa!’ neryo iniasa, n’omughombe waghe indi, ‘Kolha eki!’ neryo iniakikolha.”
10 Yesu abere owa ekyo, mwasweka n’eribwira ababya bamukwamire athi: “Erithababwira okwenene, sindi nathabana omwa Israeli oyuwithe erikirirya linene ng’oyu.
11 Aliwe ngababwira nyithi abangyi basyalhua ebulhua lyuba n’ebulengera lyuba n’er’ikalha okwa meza haghuma na Abrahamu, Isaka, na Yakobo omo Bwami bw’elhubulha;
12 nomwabine, abaghalha b’Obwami bakendi syaghuswa eyihya omwa mwirimya. Eyo yabakendi syalirira n’erikereghetha ameno wabu.”
13 Neryo Yesu mwabwira omukulhu mughuma w’abasirikali athi: “Ghenda. Ngoku wabirikangania erikirirya, kibye ngoku wabiribugha.” N’omughombe mwalhama okwa saha eyo.
14 Yesu abere ahika ewa Petero, mwalhangira nyoko-byalha wa Petero inianakesirye, inialhwere, iniabirihuhana kw’omubiri.
15 Neryo mwamuhamba okwa byalha, n’ekihuhania kiwe mukyalhama, nayu mwahangana n’eritsuka eriwathikya Yesu.
16 Aliwe erigholho lyabere lyahika, abandu mubamulethera abandu bangyi abaliko esyombinga; neryo mwahighitha emirimu mibi omwa kinywe kisa, n’erilhamya abosi ababya bakaghalhwa,
17 nuku aberereraye ebyabughawa erilhabira omu muminyereri Isaya, athi: “Iyo iyuwene-wene mwathulhusyako amalhwere wethu n’eriheka esyondwalha syethu.”
18 Yesu abere alhangira abandu bangyi ibanamuthimbireko, mwalhaghira abigha biwe athi basokere okwa wundi musirya.
19 Neryo omukangirirya w’emighambo mwasa n’erimubwira athi: “Mukangirirya, ngendi kukwama ehosi-hosi eyo wukaya.”
20 Aliwe Yesu mwamubwira athi: “Esyoboha sinawithe amarubu n’esyonyonyi sinawithe esyonyuthu, aliwe Omughalha w’omundu syawithe n’ah’erihira omuthwe wiwe.”
21 Neryo owundi w’okwa bigha biwe mwamubwira athi: “Mukama, nyilighire ngatsuke eriyatsika thatha waghe.”
22 Yesu mwamubwira athi: “Wulhole embere erinyikwama, kandi wuleke abaholi batsike abaholi babu.”
23 Neryo abere asambira omo bwathu, abigha biwe mubamukwama.
24 Neryo lebaya! ekihunga kinene mukyahitha okwa ngetse, n’ebisunda byabya ibirikulibirya obwathu; aliwe Yesu abya inianaghotsere.
25 Neryo abigha mubasa aho ali, mubamubukya n’eribugha bathi: “Mukama, thulhamaye, thukakwa!”
26 Aliwe mwababwira athi: “Busana naki mukubaha, inywe b’erikirirya like?” Neryo mwahangana n’erikunga ekiyagha n’engetse, neryo muhabya akahunerero kanene.
27 Neryo abigha mubasweka n’eribugha bathi: “Oyu ni mundu oyuli athi na? Ebiyagha n’engetse nabyo bikamwowa.”
28 Yesu abere ahika okwa wundi musirya w’ekitsweka kye Gadarene, mwasangangana n’abalhume babiri abali kw’esyombinga bakalhua eyiri amasinda.* Babya batsurumire kutsibu, neryo isihali n’oyuwangalengesya erilhaba omwa nzira eyo.
29 Neryo lebaya! musyalhaka sithi: “Mughalha wa Nyamuhanga, wukasyathusondaya kwaki? Wukasyathuthoghothaya endambi eyabirihirwaho isiyiriyahika?
30 Ahalhuthambi okw’ibo, habya ekihangulho ky’esyombunu nyingyi isinemulya.
31 Neryo esyombinga musyatsuka erimulemba-lemba sithi: “Wamabya iwukathuhighitha, thughuse omwa kihangulho ky’esyombunu.”
32 Neryo mwasibwira athi: “Mughende!” Neryo musyabalhuamo syam’ingira omwa syombunu, neryo lebaya! ekihangulho kyosi mukyathibitha erihika okwa mukunguli w’engetse, syamathoghongeramo n’eriholeramo.
33 Neryo abalisya mubathibitha, bamaghenda omwa tawuni, bamabugha obuli kindu ekyabere, imwamune n’omwatsi w’abalhume ababyako esyombinga.
34 Neryo lebaya! abandu bosi b’omwa tawuni mubasa eyiri Yesu, neryo babere bahika aho ali, mubamusaba bathi alhue omwa kitsweka kyabu.
Emyatsi Ahikwa
^ Kutse “amasinda w’eryibukwa.”
