Engulhu Yuwene Ngoku Yahandikawa na Matayo 9:1-38
9 Neryo Yesu mwaya omo bwathu, amasokera omwa tawuni y’ewabu.
2 Neryo lebaya! mubamulethera omulhume oyusanyarere iniane okwa kakyingo. Yesu abere alhangira erikirirya lyabu, mwabwira oyusanyarere athi: “Mwana waghe, wusike! Ebibi byawu byamaghanyirwa.”
3 Abakangirirya b’emighambo balebe mubayibughako bathi: “Omundu oyu akatsuma.”
4 Kundi Yesu mwaminya amalengekania wabu, mwababwira athi: “Busana naki mukalengekanaya ebindu bibi omwa mithima yenyu?
5 Ng’eky’erileberyako, ekyolhobire ky’ekyahi, eribugha wuthi, ‘Ebibi byawu byamaghanyirwa,’ kutse eribugha wuthi, ‘Hangana wughende’?
6 Aliwe, inywe erithoka eriminya ngoku Omughalha w’omundu awithe ehamuli y’erighanyira ebibi okwa kihugho—” neryo mwabwira oyusanyarere athi: “Hangana, wimaye akakyingo kawu, wughende eka.”
7 Nayu mwahangana, amaghenda eka.
8 Neryo abandu bangyi babere balhangira eki, mububaha kutsibu, neryo mubapipa Nyamuhanga oyuwaha abandu b’obuthoki ng’obu.
9 Yesu abere alhuaho, mwalhangira omulhume oyukahulhawamo Matayo inian’ikere omwa ofisi eyabakathuhiramo emisolho, mwamubwira athi: “Nyikwame.” Aho naho mwahangana n’erimukwama.
10 Enyuma waho, Yesu abere ane omwa nyumba inianemulya,* lebaya! abasolesya bangyi n’abakolha-nabi mubasa bamatsuka erirya* haghuma nayu n’abigha biwe.
11 Aliwe Abafarisayo babere balhangira eki, mubabulya abigha biwe bathi: “Busana naki omukangirirya wenyu akalya haghuma n’abasolesya n’abakolha-nabi?”
12 Yesu abere abowa, mwabugha athi: “Abathalhwere sibaliyithagha omuthambiri, aliwe abalhwere bakamuyithagha.
13 Neryo, mughende, aliwe muminye kino nga kikamanyisayaki: ‘Nganzire obughanyiri butsira obuhere.’ Kundi nasa eribirikira abakolha-nabi butsira abathunganene.”
14 Neryo abigha ba Yohana mubahika oku Yesu n’erimubulya bathi: “Busana naki ithwe n’Abafarisayo thukabya omwa kisibo aliwe abigha bawu sibali kolha ekyo?”
15 Yesu mwabasubirya athi: “Sihali ekyangaleka abanywani b’omwira w’omuheruki ibabya omwa bulighe ibane nayu, kwa bithe? Aliwe endambi yikendisyahika ibab’ihako omwira w’omuheruki, neryo aho ibbwa ibabya b’erisiba.
16 Sihali omundu oyukasonera ekibbandiko ky’olhukimba olhuhyaka okwa lhukimba lhukulhu, kundi olhukimba lhuhyaka lhukalhuako neryo ilhwasathikira ighuma.
17 Kutse abandu sibalihira evini nyihyaka y’omwa lhuhu lhw’evini olhukulire. Bamakolha ekyo, olhuhu lhw’evini ilhukendi sathika, evini iyuthika, n’olhuhu ilhwatsanda. Aliwe abandu bakahira evini nyihyaka omwa lhuhu lhw’evini olhuhyaka, n’ebyosi ibyatheghibwa.”
18 Abere anemubabwira emyatsi eyi, lebaya! omuthabali mulebe oyuwabya iniabirihikaho, munamira Yesu n’eribugha athi: “Lino mwali waghe angabya iniamabiriholha, kisi asa wuyamuhireko ebyalha, anasuba.”
19 Neryo Yesu mwahangana, iyo n’abigha biwe mubamukwama.
20 Neryo lebaya! omukali oyuwabya iniabiriaghalhwa ahabw’emyaka 12 busana n’erilhuako omusasi, mwasira enyuma n’erithulha okwa musike w’olhukimba lhwa Yesu,
21 kundi iniakabera eriyibwira athi: “Namathathulha okwa lhukimba lhwiwe lisa, iningendi lhama.”
22 Yesu mwabinduka, amamulhangira neryo amabugha nayu athi: “Wusike mwali waghe! Erikirirya lyawu lyamakulhamya.” Neryo okwa saha eyo omukali mwalhamibwa.
23 Yesu abere ahika omwa nyumba y’omuthabali n’erilhangira abawathi b’esyonyabulere n’abandu bangyi ibanemumunyuka,
24 mwabugha athi: “Mulhue hano, kundi omusika syaholire aliwe aghotsere.” Neryo abandu mubatsuka erimusekererya.
25 Abandu babere bakanahulhuka, Yesu mwingiramo n’erihamba okwa byalha by’omusika, n’omusika mwahangana.
26 Neryo omwatsi oyu mwalhandaghana omwa kitsweka kyosi ekyo.
27 Yesu abere akalhua aho, abalhume babiri esyondimethime mubamukwama ibanemubirikira bathi: “Mughalha wa Dawudi, thulhamaye.”
28 Abere abiringira omwa nyumba, esyondimethime esyo musyamuhikako, neryo Yesu mwababulya athi: “Mun’ikirirye muthi inakolha eki?” Mubamusubirya bathi: “Ee, Mukama.”
29 Neryo Yesu mwathulha okwa meso wabo n’eribugha athi: “Kibabyeko erikwamana n’erikirirya lyenyu.”
30 Neryo mubalhangira. Aliwe, Yesu mwabakongomerera athi: “Mulhangire muthi sihabye mundu oyukaminya okwa mwatsi oyu.”
31 Aliwe babere babirihulhuka, mubabwira obuli mundu omwa kitsweka kyosi ekyo.
32 Neryo babere bakaghenda, lebaya! abandu mubamulethera omulhume emumu oyuliko embinga;
33 embinga eyo yabere yabirihighithwa, omulhume mwatsukiraho eribugha. N’abandu bangyi mubasweka n’eribugha bathi: “Ekiri ng’eki sikirikyathabya omwa Israeli.”
34 Aliwe Abafarisayo mubabugha bathi: “Akahighitha esyombinga omwa maaka w’omuthabali w’esyombinga.”
35 Neryo Yesu mwaghenda omwa syotawuni n’ebyalu ebyosi, eriyakangirirya omwa syosinagogi syabo n’erithulha engulhu yuwene y’Obwami n’erilhamya obuli mulingo wosi w’amalhwere n’obutseke.
36 Abere akalhangira abandu bangyi, mwabakwira obulighe, kundi ibakanubibawa n’erighuswa ng’esyombuli esithawithe mulisya.
37 Neryo mwabwira abigha biwe athi: “Eby’erighesa ni bingyi, aliwe abaghesi ni bake.
38 Busana n’ekyo, mulembe-lembe Omukama w’erighesa, athume abaghesi omw’ighesa liwe.”
