Engulhu Yuwene Ngoku Yahandikawa na Yohana 1:1-51
1 Okwa nzuko habya Kinywe, na Kinywe abya na Nyamuhanga, na Kinywe abya enyamuhanga.
2 Okwa nzuko, oyu abya na Nyamuhanga.
3 Ebindu byosi mubyabyaho erilhabira omw’iyo, kandi sihali ekindu n’ekighuma ekyabya kyabereho kithethalhaba omw’iyo.
Ekyabiribyaho
4 erilhabira omw’iyo y’engebe, n’engebe yabya kyakakalha ky’abandu.
5 N’ekyakakalha kinemukolerya omwa mwirima, aliwe omw’irima syathakilengya amaaka.
6 Muhasa omulhume oyuwathumawa ng’omuthumwa wa Nyamuhanga; erina liwe ini Yohana.
7 Omulhume oyu mwasa ng’omwema, erisyaha obwema obuhambire okwa kyakakalha, nuku abandu ab’emisindo yosi b’ikiriraye erilhabira omw’iyo.
8 Iyo si yuwabya kyakakalha ekyo, aliwe abya w’eriha obwema obuhambire okwa kyakakalha ekyo.
9 Ekyakakalha ky’okwenene ekikaha ekyakakalha okwa buli misindo y’abandu kyabya ikikayasa omwa kihugho.
10 Abya omwa kihugho, kandi ekihugho mukyabyaho erilhabira omw’iyo, aliwe ekihugho mukithamuminya.
11 Mwasa ewabo, aliwe ab’okw’iyo mubathamuligha.
12 Aliwe abosi abamwangirira, mwabaha obuthoki bw’eribya baana ba Nyamuhanga, kundi mub’ikirirya omwa lina liwe.
13 Kandi mubabuthwa omw’isonda lya Nyamuhanga, butsira omw’isonda ly’omusasi kutse ery’omunyoku kutse ery’omundu.
14 Neryo Kinywe mwabya munyoku kandi muk’ikalha haghuma nethu, kandi muthwalhangira olhukengerwa lhwiwe, olhukengerwa olhuli ng’olhw’omughalha ekyusa oyukalhua oku thatha; kandi Nyamuhanga aby’amusimire* kandi inioswire mw’ekwenene.
15 (Yohana mwaha obwema obumuhambireko, mwabirikira omwa mulenge munene athi: “Oyu yo nakanayako indi, ‘Oyukasa enyuma syaghe abirinyitsuka embere, kundi abyaho isindi nabyaho.’”)
16 Kundi oswire n’olhukogho n’ekwenene, muthwalholha embere eribana olhukogho.
17 Kundi Emighambo muyahebwa erilhabira omu Musa, olhukogho n’ekwenene mubyabyaho erilhabira omu Yesu Kristo.
18 Sihali omundu oyuwabirithalhangira Nyamuhanga; nyamuhanga ekyusa oyuli okwa lhuhandi* lhwa Thatha yuwabirisoborera Nyamuhanga nga nindi.
19 Buno bw’obwema obo Yohana aha omughulhu Abayuda bathuma abahereri n’Abalawi erilhua e Yerusalemu erisyamubulya bathi: “Wulindi?”
20 Neryo mwasubirya n’eribugha athi: “S’ingye Kristo.”
21 Neryo mubamubulya bathi: “Kwesi wulindi? Wuli Eliya?” Mwasubirya athi: “Eyihi.” “Wuli muminyereri?” Kandi mwasubirya athi: “Eyihi!”
22 Neryo mubamubulya bathi: “Wulindi? Thubwire nuku thwangabana eky’erisubirya abalyathuthuma. Iwe wukayikanayako wuthiki?”
23 Mwasubirya athi: “Ngali mulenge w’oyukabirikirira omo mbwarara athi, ‘Muterekereraye enzira ya Yehova,’ ngoku omuminyereri Isaya anabugha.”
24 Abafarisayo babathuma abandu abo.
25 Neryo mubamubulya bathi: “Neryo busana naki wukabatizaya wamabya is’iwe Kristo kutse Eliya kutse Omuminyereri?”
26 Yohana mwabasubirya athi: “Ngabatizaya omwa maghetse. Omundu animene omwa kathi-kathi kenyu oyo muthasi,
27 oyukasa enyuma syaghe, oyo ngathahikire okwa lhulengo lhw’eriboholha emikoba y’esyongetha siwe.”
28 Emyatsi eyi yakoleka e Betania eyisirya we Yorodani, eyo Yohana aby’akabatizirya.
29 Ekiro ekyakwamako mwalhangira Yesu akasa eyo ali, neryo mwabugha athi: “Lhangira, Ekyana ky’Embuli kya Nyamuhanga oyukalhusayaho ekibi ky’ekihugho!
30 Oyu yo nakanayako indi: ‘Enyuma syaghe yinemwasira omulhume oyuwanyitsuka embere, kundi abyaho isindi nabyaho.’
31 Nibya sinabya ngamwasi, aliwe enzumwa eyaleka ingasa n’eribatizya omwa maghetse yabya yithi nuku aminyikalibawe omwa Israeli.”
32 Kandi Yohana mwaha obwema athi: “Munalhangira omulimu akandaghalha ng’akalikuku erilhua elhubulha, kandi mukamubyako.
33 Nibya sinabya ngamwasi, aliwe Oyuwananyithuma erisyabatizya omwa maghetse mwanyibwira athi: ‘Oyo wukendi syalhangira omulimu akandaghalirako n’erimubyako, oyo yukabatizaya omwa mulimu abuyirire.’
34 Kandi nabirikilhangira, kandi nabiriha obwema ngoku oyu ni Mughalha wa Nyamuhanga.”
35 Kandi okwa kiro ekyakwamako, Yohana abya inianimene n’ababiri b’okwa bigha biwe,
36 neryo abere alhangira Yesu inianemughenda, mwabugha athi: “Lhangira, Ekyana ky’Embuli kya Nyamuhanga!”
37 Abigha babiri babere bowa akabugha eki, mubakwama Yesu.
38 Neryo Yesu mwabinduka, abere alhangira ibanamukwamire, mwababwira athi: “Mukasondayaki?” Mubamusubirya bathi: “Rabbi (kyamahindulhwa, kikamanyisaya, “Mukangirirya”), wikere hayi?”
39 Mwababwira athi: “Mwase, muyaminyeyo.” Neryo mubaghenda bamayaminya eyo ikere kandi mubabya nayo ekiro ekyo; syabya saha ng’ikumi.*
40 Anderea, mughalha wobu Simoni Petero, abya mughuma w’okwa babiri abowa ebya Yohana abugha neryo bamakwama Yesu.
41 Mwatsuka eribana mughalha wabo ya Simoni n’erimubwira athi: “Thwabiribana Masiya” (kyamahindulhwa, kikamanyisaya, “Kristo”),
42 neryo mwamuthwalha eyiri Yesu. Yesu abere amusamalira, mwamubwira athi: “Wuli Simoni, mughalha wa Yohana; wukendyahulhwamo Kefa” (erikahindulhawamo “Petero”).
43 Ekiro ekyakwamako, Yesu mwanza erighenda e Galilaya. Neryo mwabana Filipo n’erimubwira athi: “Nyikwame.”
44 Filipo abya we Betisaida, etawuni y’ewabu Anderea na Petero.
45 Filipo mwabana Natanaeli n’erimubwira athi: “Thwabiribana oyo Musa akanayako omwa Mighambo n’oyo Abaminyereri bahandikako bathi: Yesu, mughalha wa Yozefu, owe Nazareti.”
46 Aliwe Natanaeli mwamubwira athi: “Ekindu kibuya ikyanalhua e Nazareti?” Filipo mwamubwira athi: “Asa wulebaye.”
47 Yesu mwalhangira Natanaeli akasa eyo ali neryo mwamukaniako athi: “Lhangira, Omuisraeli owenyine-nyine oyuthemo amathebo.”
48 Natanaeli mwamubulya athi: “Wamanyiminya wuthi?” Yesu mwamusubirya athi: “Filipo athali akania nawu, iwune omwa ndina y’omuthi w’omuthini, ngalhue ingabirikulhangira.”
49 Natanaeli mwasubirya athi: “Rabbi, wuli Mughalha wa Nyamuhanga, wuli Mwami we Israeli.”
50 Yesu mwamubwira athi: “Wam’ikirirya kundi mungakubwira nyithi mungakulhangira omwa ndina y’omuthi w’omuthini? Wukendi lhangira emyatsi eyilhabire okw’eyi.”
51 Neryo mwamubwira athi: “Kwenene ngababwira inywe balhume, mukendi syalhangira olhubulha ilhunakyungwire n’abamalaika ba Nyamuhanga ibanemuhethuka n’eryandaghalira eyiri Mughalha w’omundu.”
Emyatsi Ahikwa
^ Kutse “Nyamuhanga mwamukangya olhukogho.”
^ Kutse “omwa kikuba kya Thatha.” Eki kikamanyisaya erisimwa ly’embaghane.
^ Ni bugha ambu, saha nga 10 esy’erithungyi.
