Engulhu Yuwene Ngoku Yahandikawa na Yohana 10:1-42
10 “Kwenene ngababwira, oyuth’ingirira omwa lhukyo lhw’olhughuthu lhw’esyombuli aliwe akasambiramo, omundu oyo ni mwibi kandi munyeyi.
2 Aliwe oyuk’ingirira omwa lhukyo y’omulisya w’esyombuli.
3 Omutheya w’olhukyo akamukyungulira, kandi esyombuli sik’owa omulenge wiwe. Akabirikira esyombuli siwe obuli nguma omwa lina lyayu n’erisihulhukirya eyihya.
4 Akabya abirihulhukirya esyombuli siwe syosi sy’eyihya, akabya embere syasyo, nasyo isyamukwama, kundi sinasi omulenge wiwe.
5 Sisyangakwama ow’ehandi nahake aliwe sikathibitha isyamusagha, kundi sisyasi omulenge w’ab’ehandi.”
6 Yesu mwabaha eky’erileberyako eki, aliwe mubathayitheghererya eby’akababwira.
7 Neryo kandi Yesu mwabugha athi: “Kwenene ngababwira, n’ingye lhukyo lhw’esyombuli.
8 Abosi ababiryasa omwa mwanya waghe ni bibi kandi banyeyi; aliwe esyombuli sisyathowa omulenge wabo.
9 Ingye indi lhukyo; oyuk’ingira erilhabira omw’ingye akendi syalhamibwa, kandi akendi sy’ingira n’erihulhuka kandi iniahika omwa lhulisiryo.
10 Omwibi akasa iniakasyiba, eritha, n’erithoghothya. Nabiryasa nuku bangasyabana engebe kandi omwa buswire.
11 Ingye indi mulisya mubuya; omulisya mubuya akahayo engebe yiwe busana n’esyombuli siwe.
12 Omukoli oyuthe mulisya kandi oyuthe mwinye syombuli, akabya akalhangira ekyuhu kikasa akasighania esyombuli n’erithibitha—n’ekyuhu kikasihamba n’erisipanza-panza—
13 kundi ni mukoli kandi syatsomene esyombuli.
14 Ingye indi mulisya mubuya. Nganasi esyombuli syaghe n’esyombuli syaghe sinanyasi,
15 ngoku Thatha ananyasi, naghe nganasi Thatha; kandi ngahayo engebe yaghe busana n’esyombuli.
16 “Kandi ngwithe esindi mbuli esithe sy’omwa butsunga obu; nasyo ngatholere ingasilethamo, kandi sikendi hulikirira omulenge waghe, kandi sikendibya kihangulho kighuma, ahisi sy’omulisya mughuma.
17 Eki ky’ekikaleka Thatha inianyanza, kundi ngahayo engebe yaghe, nuku nangasyabanayo kandi.
18 Sihali oyukanyisaghulhayo, aliwe ngahayeyo omw’iyisunza lyaghe. Ngwithe obuthoki bw’erihayeyo, kandi ngawithe obuthoki bw’erithasyabanayo. Ekihano eki Thatha waghe yuwambakyo.”
19 Kandi Abayuda mubaghabulhana busana n’ebinywe ebi.
20 Abangyi b’okw’ibo babya bakabugha bathi: “Ali kw’embinga kandi abiribya musire. Busana naki imwamuhulikirira?”
21 Abandi mubabugha bathi: “Oyuli kw’embinga syangabugha ebinywe ebi. Embinga siyangathoka erilibulha ameso w’abandu, iyanathoka?”
22 Okwa buthuku obo, e Yerusalemu muyabya Omukonga w’Erihayo. Bwabya buthuku bw’eritsuku,
23 na Yesu abya inianemulhaba omwa bbalaza y’esyonduhi* ya Solomona ey’okwa hekalhu.
24 Neryo Abayuda mubamuthimbako n’eritsuka erimubulya bathi: “Wukendi lholha embere erithuhira omwa mingangyi erihika mughulhu wahi? Wamabya iwuli Kristo, thubwire ahathe eribisirira.”
25 Yesu mwasubirya athi: “Nabiribabwira, aliwe simul’ikiriraya. Emibiiri eyangakolha omwa lina lya Thatha waghe, eyi yikanyihera obwema.
26 Aliwe simul’ikiriraya, kundi simuli mbuli syaghe.
27 Esyombuli syaghe sikahulikirira omulenge waghe, kandi nganasyasi, kandi sikanyikwama.
28 Ngasiha engebe y’erikotha, kandi sisyendi syathoghothibwa nahake, kandi sihali n’oyuwanga nyisaghulhasyo omwa byalha byaghe.
29 Esyo Thatha abirimba silengire kutsibu ebindi bindu byosi, kandi sihali n’oyuwanga sisaghulha omwa byalha bya Thatha.
30 Ingye na Thatha thuli mughuma.”*
31 Kandi Abayuda mubasongya amabwe bakanza erimwitha mugho.
32 Yesu mwabasubirya athi: “Nabiribakangania emibiiri mingyi eyuwene eyikalhua oku Thatha. Neryo ni wahi okw’eyi ow’akaleka imwanza erinyitha omwa mabwe?”
33 Abayuda mubamusubirya bathi: “Thukanza erikwitha omwa mabwe, butsira busana n’omubiiri owuwene, aliwe busana n’eritsuma; kundi nomwawune mundu, wukayiyiramo enyamuhanga.”
34 Yesu mwababwira athi: “Sikihandikire omwa Mighambo yenyu, ‘Munabugha indi: “Muli syonyamuhanga”’?
35 Amabya imwanath’ahulha abo ekinywe kya Nyamuhanga kyatswera mwa “esyonyamuhanga”—kandi amasako isyanga hindulhwa—
36 mukanyibwira, ingye oyo Thatha ayira mwa mubuyirire n’erithuma omwa kihugho muthi, ‘Wukatsuma,’ kundi munabugha indi, ‘Ngali Mughalha wa Nyamuhanga’?
37 Namabya isindi kolha emibiiri ya Thatha waghe, isimwanyikiriraya.
38 Aliwe namabya inganemukolhayo, nomwakine indi simulinyikiriraya, mw’ikiriraye emibiiri, nuku mwangaminya kandi mwangalholha embere eriminya ngoku Thatha ali bughuma naghe kandi ngoku naghe indi bughuma na Thatha.”
39 Neryo kandi mubalengaho erimuhamba, aliwe mwabatswako.
40 Neryo kandi mwasoka e Yorodani amaya eyo Yohana atsuka eribatizirya, neryo mwabya eyo.
41 Neryo abandu bangyi mubasa eyo ali n’eritsuka eribugha bathi: “Yohana mwathakolha n’ekiminyikalho n’ekighuma, aliwe ebyosi ebya Yohana abugha okwa mulhume oyu byabya bihikire.”
42 Neryo eyo, abangyi mubamw’ikirirya.
