Engulhu Yuwene Ngoku Yahandikawa na Yohana 11:1-57
11 Neryo omulhume oyukahulhawamo Lazaro aby’alhwere; abya we Betania, ekyalu kyabu Maria na mwali wabo Marata.
2 Oyu ni Maria oyuw’utha oku Mukama kw’amaghutha aw’akakumba ndeke n’erisangulha ebisandu biwe omwa syonzwiri siwe; mughalha wabo ya Lazaro yuwabya alhwere.
3 Neryo bali babo mubalhaghira oku Yesu, bathi: “Mukama, lhangira! oyo wanzire alhwere.”
4 Aliwe Yesu abere owagho, mwabugha athi: “Obulhwere obu si bulhwere bw’er’itha, aliwe ni bw’eriha Nyamuhanga y’olhukengerwa, nuku Omughalha wa Nyamuhanga angahebwa olhukengerwa erilhabira mubwo.”
5 Yesu aby’anzire Marata na mwali wabo na Lazaro.
6 Aliwe, abere abiriowa ngoku Lazaro alhwere, mwabya iniane eyo abya habw’ebindi biro bibiri.
7 Neryo enyuma waho mwabwira abigha athi: “Thuthasyasuba e Yudea.”
8 Abigha mubamubwira bathi: “Rabbi, lino-lino abanya Yudea babya bakanza erikuswirya omwa mabwe, kandi wukathasyasubayo?”
9 Yesu mwasubirya athi: “Erithungyi liwithe esyosaha 12, kwa bithe? Owosi-wosi amaghenda omw’ithungyi syangathwikalha okwa kyosi-kyosi, kundi akabya inianalhangire ekyakakalha ky’ekihugho kino.
10 Aliwe omundu amaghenda omwa kiro, akathwikalha, kundi ekyakakalha sikiri omw’iyo.”
11 Abere abiribugha emyatsi eyi, mw’ongerako athi: “Munywani wethu Lazaro abirighotsera, aliwe ngayayo ngayamubukaya.”
12 Neryo abigha mubamubwira bathi: “Mukama, amabya iniaghotsere, akendyuwana.”
13 Aliwe, Yesu abya iniakakanaya okwa lhuholho lhwa Lazaro. Aliwe mubalengekania bathi akakanaya okw’ilhuhuka ly’erighotsera.
14 Neryo Yesu mwababwira ahathe eribisirira athi: “Lazaro abiriholha,
15 kandi ngatsemire busana nenyu kundi singalhueyo, nuku mw’ikiriraye. Aliwe muleke thuye eyo ali.”
16 Neryo Tomasi oyuwabya akahulhwamo Muhasa, mwabwira abigha balikyabo athi: “Muleke nethu thuyeyo, thwanayaholha haghuma nayu.”
17 Neryo Yesu abere ahikayo, mweya Lazaro iniamabirighunza omw’isinda* mwa biro bbini.
18 E Betania yabya hakuhi ne Yerusalemu, mayiro ng’ibiri.*
19 N’Abayuda bangyi babya ibabiryasa eyiri Marata na Maria erisyabahumulikania busana n’eriholerwa mughalha wabo.
20 Neryo Marata abere owa ngoku Yesu anemwasa, mwayamuthangirira; aliwe Maria mwasighalha inian’ikere eka.
21 Neryo Marata mwabwira Yesu athi: “Mukama, kuwabya hano, mughalha wethu syangaholire.
22 Aliwe na lino nganasi ngoku ekyosi-kyosi ekya wangasaba Nyamuhanga, Nyamuhanga iniakendi kuhakyo.”
23 Yesu mwabwira Marata athi: “Mughalha wenyu akendi lhubuka.”
24 Marata mwamubwira athi: “Nganasi kw’akendi syalhubuka okwa kiro ky’erighunzerera.”
25 Yesu mwabwira Marata athi: “Ingye indi lhubuka n’engebe. Oyukanyikiriraya, nomw’angaholha, akendi syasuba;
26 kandi obuli mundu oyuliho kandi oyukanyikiriraya syendi syaholha nahake. Wun’ikirirye eki?”
27 Marata mwasubirya athi: “Ee, Mukama, nabirikirirya ngoku wuli Kristo, Mughalha wa Nyamuhanga, oyukasa omwa kihugho.”
28 Marata abere abiribugha ebi, mwasubayo amayenda mwali wabo ya Maria, n’eribugha nayu ahathe abandu athi: “Omukangirirya ane hano kandi anemukubirikira.”
29 Maria abere owa eki, mwalhuaho iniahangana n’erighenda eyo ali.
30 Yesu abya isyali ahika omwa kyalu ekyo, aliwe abya iniakine omo mwanya ogho Marata amweghayamo.
31 Abayuda ababya omwa nyumba na Maria bakamuhumulikania babere balhangira kw’akalhuaho iniahangana n’erihulhukamo, mubamukwama, ibakalengekanaya bathi akayalirira okw’isinda.*
32 Maria abere ahika ahali Yesu n’erimulhangira, mwawa embere sy’ebisandu biwe n’eribugha athi: “Mukama, kuwabya hano, mughalha wethu syangaholire.”
33 Neryo Yesu abere alhangira Maria akalira n’Abayuda abo abya nabo bakalira, mwasekemuka omw’isi siwe* n’eriyibulha-bulha.
34 Yesu mwabugha athi: “Mwabirimutsika hayi?” Mubamusubirya bathi: “Mukama, asa wulebaye.”
35 Yesu mwathoghongya emisoni.
36 Neryo Abayuda mubatsuka eribugha bathi: “Bathami k’alhue amwanzire kutsibu!”
37 Aliwe abaghuma b’okw’ibo mubabugha bathi: “Mbwino omulhume oyu oyuwalibulha ameso w’endimethime syangayirire eky’erikolha nuku oyu syahole?”
38 Neryo Yesu kandi abere abirisekemuka omw’isi siwe, mwasa ahali eyisinda.* Abya mwangalhu, n’eribwe lyabya irinathekireko.
39 Yesu mwabugha athi: “Mulhusayeho eribwe.” Marata mwali wobu muholi mwabugha athi: “Mukama, lino atholere eribya inialikubeha, kundi hamabirilhaba biro bbini.”
40 Yesu mwamubwira athi: “Mundithakubwira nyithi wam’ikirirya iwukendi lhangira olhukengerwa lhwa Nyamuhanga?”
41 Neryo mub’ihaho eribwe. Neryo Yesu mwalhalhamira endatha n’eribugha athi: “Thatha, ngakusima kundi wabirinyowa.
42 Ni kwenene nganasi kuwukanyowa mughulhu wosi; aliwe mungabugha busana n’abandu bangyi ab’imene hano, nuku bang’ikirirya ngoku wanyithuma.”
43 Abere abiribugha ebi, mwabirikira omwa mulenge munene athi: “Lazaro, hulhuka!”
44 Omulhume oyuwabya aholire mwahulhukamo ebisandu biwe n’ebyalha ibinaboha-bohire omwa syongyimba, n’obusu bwiwe ibunabohire omwa lhukimba. Yesu mwababwira athi: “Mumubohole, aghende.”
45 Neryo Abayuda bangyi ababya ibabiryasa eyiri Maria, abalhangira ebya Yesu akolha, mubamw’ikirirya,
46 aliwe abaghuma b’okw’ibo mubaghenda eyiri Abafarisayo eriyababwira ekya Yesu abirikolha.
47 Neryo abahereri bakulhu n’Abafarisayo mubahindania ab’omw’Ibuyiro bo haghuma n’eribugha bathi: “Thukoleki, kundi omulhume oyu akakolha ebiminyikalho bingyi?
48 Thwamamuleka, abosi ibakendi mw’ikirirya, n’Abaroma ibasa n’er’imya omwanya* wethu n’ekihugho kyethu.”
49 Aliwe omughuma w’okw’ibo ya Kayafa, oyuwabya muhereri mukulhu omo mwaka oyo, mwababwira athi: “Simuwithe ekya mwasi,
50 kandi simwathalengekania ngoku in’inywe mukendi ghasirwa omundu mughuma eriholha busana n’abandu omwakanya k’ekihanda kyosi erithoghothibwa.”
51 Nomwabine, syabugha ebi okwa liwe, aliwe kundi abya muhereri mukulhu omo mwaka oyo, mwalhaghulha ngoku Yesu abya w’eriholha busana n’ekihanda,
52 kandi isi busana n’ekihanda kisa aliwe kandi busana n’erihindania haghuma abaana ba Nyamuhanga ababya ibabiripanzikana.
53 Neryo eritsuka n’ekiro ekyo, mubaya embitha y’erimw’itha.
54 Neryo Yesu mwabya isyangathasyalhaba omwa Bayuda kinyamwisi, aliwe mwalhua eyo amaghenda omwa bulhambu obuli hakuhi n’embwarara, omwa tawuni eyikahulhawamo Efraimu, neryo mwabya eyo n’abigha.
55 Neryo ekiro ky’Erikyuruka ky’Abayuda kyabya ikikayahika, n’abandu bangyi mubalhua omwa kyalu erihethukira e Yerusalemu eriyayerya Erikyuruka lithe lyahika.
56 Babya ibanemusondya Yesu, kandi babya ibanemuyibughako iban’imene omwa hekalhu bathi: “Muwithe malengekaniaki? Athi syendyasa okwa mukonga?”
57 Aliwe abahereri bakulhu n’Abafarisayo babya ibabirihamulha bathi owosi-wosi amaminya aho Yesu ali, atholere iniathulhagho nuku bayamuhambe.
Emyatsi Ahikwa
^ Kutse “omw’isinda y’eryibukwa.”
^ Kilomita ng’isathu. Kinywe okwa kinywe, “stadia nga 15.”
^ Kutse “okw’isinda y’eryibukwa.”
^ Kinywe okwa kinywe, “omwa kirimu.”
^ Kutse “eyisinda y’eryibukwa.”
^ Ni bugha ambu, ehekalhu.
