Engulhu Yuwene Ngoku Yahandikawa na Yohana 12:1-50
12 Ihakisiya biro mukagha Erikyuruka iryahika, Yesu mwahika e Betania, eyo Lazaro abya, oyo Yesu abya iniabirilhubukya okwa baholi.
2 Neryo eyo mubamutheghekera erirya ly’erigholho, na Marata yuwabya akabahukulira, aliwe Lazaro abya okwa bakalya* nayu.
3 Neryo Maria mw’imya hakuhi embindi y’elita y’amaghutha aw’enardo eyonyine-nyine, awakakumba ndeke, aw’obughuli bunene, am’uthagho okwa bisandu bya Yesu n’eribisangulha omwa syonzwiri siwe. Enyumba muyusulha mw’akabeho k’amaghutha aw’akakumba ndeke.
4 Aliwe, Yuda Iskariota, omughuma w’okwa bigha biwe, oyuwabya iniakayamughoberaya, mwabugha athi:
5 “Busana naki amaghutha aw’akakumba ndeke aya iniathaghulibwa esyodinari 300, sikahebwa abanakwa?”
6 Nomwabine, sy’abugha ebi kundi atsomene abanakwa, aliwe kundi abya mwibi kandi iyukabika akasanduku k’esyosente kandi iniakabera er’iba okwa syosente esikahirawamo.
7 Neryo Yesu mwabugha athi: “Omukali mumuleke, nuku angakolha eki erinyitheghekera ekiro ky’eritsikwa lyaghe.
8 Kundi mukendibya imune n’abanakwa mughulhu wosi, aliwe simwendibya naghe mughulhu wosi.”
9 Ebyo bine aho, Abayuda bangyi mubaminya ngoku ane eyo, neryo mubasa isi busana n’erilholha oku Yesu musa aliwe n’oku Lazaro, oyo abya iniabirilhubukya okwa baholi.
10 Neryo abahereri bakulhu mubaya n’embitha y’eritha na Lazaro,
11 kundi yuwabya akaleka Abayuda bangyi ibayayo n’erikirirya Yesu.
12 Ekiro ekyakwamako, abandu bangyi ababya ibabiryasa okwa mukonga mub’owa ngoku Yesu anemwasa e Yerusalemu.
13 Neryo mubathwa emithahi y’emithi y’amabondo n’eriyamuthangirira, kandi mubatsuka eribugha omwa mulenge munene bathi: “Thukakusaba, wulhamaye! Ali n’omughisa oyukasa omwa lina lya Yehova, Omwami we Israeli!”
14 Yesu abere abana ekyana ky’epunda, mwak’ikalhako, ngoku kyabya kihandikire kithi:
15 “Siwubahe, mwali we Sioni. Lebaya! Omwami wawu anemwasa, anikere okwa kyana ky’epunda.”
16 Okw’itsuka abigha biwe mubathayitheghererya emyatsi eyi, aliwe Yesu abere akahebwa olhukengerwa, mub’ibuka ngoku emyatsi eyi yahandikawa busana nayu kandi ngoku mubakolha emyatsi eyi okw’iyo.
17 Neryo abandu bangyi ababyaho akabirikira Lazaro erilhua omw’isinda* n’erimulhubukya okwa baholi, mubalholha embere eriha obwema.
18 Kandi eki ky’ekyaleka abandu bangyi ibayamuthangirira, kundi babya ibabiriowa ku mwakolha ekithiko-thiko eki.
19 Neryo Abafarisayo mubabwirana bathi: “Mwanamalhangira ku byabirilema. Lebaya! Ekihugho kyosi kyabirimukwama.”
20 Neryo omwa babya ibabiryasa okwa mukonga bakasyaramya mwabya imune Abagiriki balebe.
21 Neryo mubahika oku Filipo owe Betisaida eye Galilaya, n’eritsuka erimusaba bathi: “Mukulhu, thwanzire erilholha oku Yesu.”
22 Neryo Filipo mwasa amabwira Anderea. Anderea na Filipo mubasa bamabwira Yesu.
23 Aliwe Yesu mwabasubirya athi: “Esaha yamabirihika Omughalha w’omundu erihebwa olhukengerwa.
24 Kwenene ngababwira, enguma y’engano yamathendi thoghera ahisi yikaholha, yikasighalha inina nguma nguma; aliwe yamaholha, nimo yikabutha esyonguma nyingyi.
25 Oyuwanzire engebe yiwe akathoghothayayo, aliwe oyuponire engebe yiwe omwa kihugho kino akendi syatheyayo busana n’engebe y’erikotha.
26 Omundu amabya iniangana nyikolera, anyikwame, kandi aho nyiri, oyukanyikolera nayu h’akendisyabya. Omundu amabya iniangana nyikolera, Thatha iniakendi syamusikya.
27 Nabirikwa engitsi, kandi ngabughe indiki? Thatha, nyilhamaye, esaha eyi yinyilhabeko. Nomwabine, eki ky’ekyamaleka ingahika okwa saha eyi.
28 Thatha, iha erina lyawu ly’olhukengerwa.” Neryo omulenge mwalhua elhubulha athi: “Nabirihalyo olhukengerwa, kandi ngendithasyahalyo olhukengerwa.”
29 Abandu bangyi ababya b’imeneho mub’owagho n’eritsuka eribugha bathi ni mulhumo w’obuthuku. Abandi bathi: “Omumalaika amabirikania nayu.”
30 Yesu mwasubirya athi: “Omulenge oyu am’owibwa, isi busana naghe, aliwe busana nenyu.
31 Neryo hali eritswerwa ly’ekihugho kino; lino omuthabali w’ekihugho kino akendi ghuswa eyihya.
32 Aliwe ingye, namabirihanikwa endatha, iningendi yirethako abandu b’emisindo yosi.”
33 Omw’ibugha eki, kwenene abya iniakakanganaya omulingo w’olhuholho olho abya iniakayaholha.
34 Neryo abandu bangyi mubamusubirya bathi: “Muthwowa omwa Mighambo ngoku Kristo ni w’eribyaho kera na kera. Wanga thoka wuthi eribugha wuthi Omughalha w’omundu atholere iniahanikwa? Mughalha w’omundu oyu nindi?”
35 Neryo Yesu mwababwira athi: “Ekyakakalha kikendibya ikine nenyu ahabw’obuthuku buke. Mulendere imukine n’ekyakakalha, nuku omwirima sy’abakakiraye; oyukalendera omwa mwirima syaliminya eyo akaya.
36 Omughulhu mukine n’ekyakakalha, mw’ikiriraye ekyakakalha, nuku mwangabya baana b’ekyakakalha.”
Yesu abere abiribugha emyatsi eyi mwaghenda amayayibisa.
37 Nomwakine indi mwakolha ebiminyikalho binene embere syabo, mubathamw’ikirirya,
38 nuku ekinywe ky’omuminyereri Isaya kyangabererera, oyuwabugha athi: “Yehova, nindi yuwabir’ikirirya ebya owa thukabugha? Kandi nindi oyuwabiribisulirwa okuboko kwa Yehova?”
39 Ekyaleka ibath’ikirirya kiri kithi, Isaya kandi mwabugha athi:
40 “Abirilibania ameso wabo kandi abirikalya emithima yabo, nuku sibalhangire omwa meso wabo n’eriyitheghererya omwa mithima yabo n’eribinduka, nganabalhamya.”
41 Isaya abugha emyatsi eyi kundi mwalhangira olhukengerwa lhwiwe, kandi mwamukaniako.
42 Nomwabine, nibya n’abangyi b’okwa bathabali mubamw’ikirirya, aliwe isibangamuligha busana n’Abafarisayo, nuku sibahighithawe omwa sinagogi;
43 kundi ibanzire olhukengerwa olhukalhua okwa bandu kwilhaba olhukengerwa olhukalhua oku Nyamuhanga.
44 Aliwe, Yesu mwabugha omwa mulenge muuli athi: “Oyukany’ikiriraya syali nyikiriraya ingye musa aliwe n’oyuwanyithuma;
45 n’oyukanyilhangira akalhangira n’Oyuwanyithuma.
46 Nabiryasa ng’ekyakakalha omwa kihugho, nuku oyukany’ikiriraya syasighale omwa mwirima.
47 Aliwe owosi-wosi am’owa ebinywe byaghe kandi akaghana eribighenderako, sindimutswera; kundi nasa isi busana n’eritswera ekihugho, aliwe busana n’erilhamya ekihugho.
48 Oyukanyighana kandi akathendi angirira ebinywe byaghe, awithe oyukendi syamutswera. Ekinywe ekyanabiribugha ky’ekikendi syamutswera okwa kiro ky’erighunzerera.
49 Kundi ebya ngabugha sindibibugha okwa lyaghe, aliwe Thatha oyuwanyithuma iyuwene-wene abirimba ekihano ekihambire okwa ebya nangabugha n’ebya nangakania.
50 Kandi nganasi ngoku ebihano biwe ni ngebe y’erikotha. Neryo ebya ngabugha ngabibugha ngoku Thatha anambwirabyo.”
