Engulhu Yuwene Ngoku Yahandikawa na Yohana 13:1-38
13 Omukonga w’ekiro ky’Erikyuruka abere athali ahika, Yesu mwaminya ngoku endambi yiwe y’erilhua omwa kihugho kino erighenda eyiri Thatha yamabirihika. Neryo kundi abya iniabirianza abiwe ababya omwa kihugho, mwabanza erihika okwa nduli.
2 Erirya ly’erigholho lyabya irinemulholha embere, na Diabolo abya iniabirihira omu Yuda Iskariota, mughalha wa Simoni, mw’omuthima w’erighoberya Yesu.
3 Neryo Yesu, iniabiriminya ngoku Thatha abirihira emyatsi yosi omwa byalha biwe kandi kw’alhua eyiri Nyamuhanga kandi kw’akaya eyiri Nyamuhanga,
4 mwahangana okw’irya ly’erigholho, amahira esyongyimba siwe sy’eriyithomekako sya lhuhandi. Neryo mwimya ekisanguliryo amayihangakyo omwa mbindi.
5 Enyuma waho mwahira amaghetse w’omwa bbafu n’eritsuka erinabya ebisando by’abigha n’eribyumya omwa kisanguliryo ekyalyayihanga omwa mbindi.
6 Neryo mwahika oku Simoni Petero. Mwamubwira athi: “Mukama, wukanabaya ebisando byaghe?”
7 Yesu mwamusubirya athi: “Ekya ngakolha siwanga kiyitheghererya lino, aliwe wukendi syakiyitheghererya enyuma w’emyatsi eyi.”
8 Petero mwamubwira athi: “Siwendi nabya ebisandu byaghe nahake.” Yesu mwamubwira athi: “Namathendi kunabya, isiwuwithe ighabo haghuma naghe.”
9 Simoni Petero mwamusubirya athi: “Mukama, siwunabaye ebisando byaghe bisa aliwe n’ebyalha byaghe n’omuthwe waghe.”
10 Yesu mwamubwira athi: “Oyuwabiryogha akabya iniabirihenia ndeke, aliwe iniakayithagha erinabibwa ebisando. Kandi inywe munahenirye, aliwe butsira inywe bosi.”
11 Kundi abya inianasi omulhume oyukendi mughoberya. Ky’ekyaleka iniabugha athi: “Inywe bosi simuhenirye.”
12 Neryo abere abirinabya ebisando byabo n’erithasyambalha esyongyimba siwe sy’eriyithomekako, mw’ikalha kandi okwa meza n’eribabulya athi: “Mwanamayitheghererya ekyo namabakolera?
13 Mukanyahulhamo ‘Mukangirirya’ kandi ‘Mukama,’ kandi muhikire, kundi ekyo kyo nyiri.
14 Busana n’ekyo, ingye, Omukama kandi Mukangirirya, namabya inamanabya ebisando byenyu, nenyu mutholere imwanabania ebisando.
15 Kundi namabahiriraho eky’erileberyako, ngoku nganamabakolerakyo, nenyu ku mutholere imwakolha muthya.
16 Kwenene ngababwira, omughombe syalengire mukama wiwe, kutse oyukathumawa syalengire oyukamuthuma.
17 Mwamaminya emyatsi eyi, obutseme buli okw’inywe mwamakolhayo.
18 Sindikanaya okw’inywe bosi; nganasi abo nabirisombolha. Aliwe eki kyamabya nuku amasako abererere: ‘Oyulhue akalya omuggati waghe abirinyisumbirako akasinziro kiwe.’*
19 Eritsuka okwa ndambi eno, ngababwira kithe kyabya, nuku kikendibya kikabya, imwabya imwangan’ikirirya ngoku n’ingye iyo.
20 Kwenene ngababwira, oyuk’angirira owosi-wosi oyo ngathuma naghe akanyangirira, n’oyukanyangirira ak’angirira n’Oyuwanyithuma.”
21 Yesu abere abiribugha emyatsi eyi, mwayibulha-bulha omwa kirimu, kandi mwaha obwema athi: “Kwenene ngababwira, omughuma w’okw’inywe akendi nyighoberya.”
22 Abigha mubatsuka erisamalirana, ibakabulha ng’akakanaya okundi.
23 Omughuma w’okwa bigha, oyo Yesu aby’anzire, abya inian’ikere hakuhi* na Yesu.
24 Neryo Simoni Petero mwamukoherya n’eribugha athi: “Thubwire ng’akakanaya okundi.”
25 Neryo oyuwabya ikere hakuhi na Yesu mwamweghemera bunyuma-nyuma okwa kikuba n’eribugha athi: “Mukama, nindi?”
26 Yesu mwasubirya athi: “Y’oyungendiha ekihandi ky’omuggati ekyangendi kolya.” Neryo abere abirikolya omuggati, mw’imyagho n’erihagho Yuda, mughalha wa Simoni Iskariota.
27 Yuda abere abirimya ekihandi ky’omuggati, neryo Sitani mwamw’ingiramo. Neryo Yesu mwamubwira athi: “Ekyo wukakolha, kikole omwa byalhuba.”
28 Aliwe, okwa babya okwa meza sihali n’omughuma oyuwaminya ekyamaleka iniamubwira athya.
29 Abandi mubalengekania bathi kundi Yuda yuwabya n’akasanduko ak’esyosente, Yesu abya iniali kumubwira athi, “Wughule ebyathukayithagha okwa mukonga,” kutse athi atholere iniawathikya abanakwa.
30 Neryo abere abirihebwa ekihandi ky’omuggati, aho naho mwahulhukira eyihya. Kandi bwabya kiro.
31 Neryo Yuda abere abirihulhuka, Yesu mwabugha athi: “Lino Omughalha w’omundu amahebwa olhukengerwa, na Nyamuhanga amahebwa olhukengerwa erilhabira omw’iyo.
32 Nyamuhanga iyuwene-wene akendi muha olhukengerwa, kandi akendi muha olhukengerwa aho naho.
33 Baana balere, ngendibya nenyu ahabw’obuthuku buke. Mukendi syanyisondya; kandi ngoku nanabwira Abayuda, ‘Eyo ngaya simwangahikayo,’ nenyu namababwirakyo.
34 Ngabaha ekihano kihya-kihya nyithi, mwanzane; ngoku nabiribanza, nenyu mwanzane muthya.
35 Busana n’eki, abandu abosi bakendi syaminya ku muli bigha baghe—mwamanzana.”
36 Simoni Petero mwamubwira athi: “Mukama, wukaghenda hayi?” Yesu mwasubirya athi: “Eyo ngaya, siwanga nyikwamayo lino, aliwe wukendi syanyikwamayo linyuma.”
37 Petero mwamubwira athi: “Mukama, busana naki sinangakukwamayo lino? Ngendihayo engebe yaghe busana nawu.”
38 Yesu mwasubirya athi: “Wunemwendihayo engebe yawu busana naghe? Kwenene ngakubwira, engoko-lhome yikendibika iwamabirinyighana mirundi isathu.”
