Engulhu Yuwene Ngoku Yahandikawa na Yohana 14:1-31
14 “Simuhanga-hangaye emithima yenyu. Mw’ikiriraye Nyamuhanga; naghe muny’ikiriraye.
2 Omwa nyumba ya Thatha waghe muli emyanya mingyi y’erikalhamo.* Ku kithabya kithya, nangabere inabiribabwira, kundi ngaghenda eriyabatheghekera omwanya wenyu.
3 Kandi namaghenda eriyathegheka omwanya wenyu, iningendi syasubulha neryo ingabangirira ewaghe, nuku aho nyiri nenyu hamubye.
4 Kandi eyo ngaghenda, munasi enzira.”
5 Tomasi mwamubwira athi: “Mukama, sithwasi eyo wukaya. Thwangaminya thuthi enzira?”
6 Yesu mwamusubirya athi: “Ingye indi nzira n’ekwenene n’engebe. Sihali oyukasa oku Thatha athethalhaba omw’ingye.
7 Inywe ku mwabya imwabirinyiminya, mwangabere imwabiriminya na Thatha waghe; eritsuka lino mwamabirimuminya n’erimulhangira.”
8 Filipo mwamubwira athi: “Mukama, thukanganaye Thatha, kandi ekyo kikathughunza.”
9 Yesu mwamubwira athi: “Obuthuku bungaha n’obwa namabirighunza nenyu, Filipo, nalino siwuli wanyiminya? Oyuwamabirinyilhangira iniamabirilhangira na Thatha. Busana naki iwabugha wuthi, ‘Thukanganaye Thatha’?
10 Siw’ikirirye ngoku ngali bughuma na Thatha na Thatha kw’ali bughuma naghe? Emyatsi eyanga babwira sindi bughayo okwa lyaghe, aliwe Thatha oyukabya iniane bughuma naghe anemukolha emibiiri yiwe.
11 Mw’ikiriraye ngoku ngali bughuma na Thatha na Thatha kwali bughuma naghe; bithe bithya, mw’ikiriraye busana n’emibiiri iyoyene-yene.
12 Kwenene ngababwira, oyukany’ikiriraya nayu akendi syakolha emibiiri eyo ngakolha; kandi akendi syakolha emibiiri eyilhabire okw’eyi, kundi ngaghenda eyiri Thatha.
13 Kandi ekyosi-kyosi ekya mukasaba omwa lina lyaghe, ngendi syakikolha, nuku Thatha angahebwa olhukengerwa erilhabira omu Mughalha.
14 Mwamasaba ekyosi-kyosi omwa lina lyaghe, iningendi kikolha.
15 “Mwamanyanza, imukendi ghendera okwa bihano byaghe.
16 Kandi ngendi saba Thatha nayu akendi baha owundi omuwathikya* oyukendibya nenyu kera na kera,
17 omulimu w’okwenene, ogho ekihugho kithe kyangahebwa, kundi sikirilhangiragho kutse eriminyagho. Munasigho kundi akabya iniane haghuma nenyu kandi ane omw’inywe.
18 Singendi basigha omwa bulighe.* Ngayasa eyo muli.
19 Hakisiya kathambi kake ekihugho ikyabya isikyendi thasyanyilhangira, aliwe inywe mukendi syanyilhangira, kundi ngaliho, nenyu mukendisyabya imuneho.
20 Okwa kiro ekyo mukendi syaminya ngoku ngali bughuma na Thatha kandi ku muli bughuma naghe kandi ku ngali bughuma nenyu.
21 Oyuwithe ebihano byaghe kandi akabighenderako y’oyunyanzire. Kandi oyunyanzire na Thatha waghe akendi syamwanza, kandi naghe ngendi syamwanza n’eriyikangania ndeke-ndeke okw’iyo.”
22 Yuda, butsira Iskariota, mwamubwira athi: “Mukama, ni kyahi ekyabere ekikaleka iwanza eriyikangania ndeke-ndeke okw’ithwe butsira okwa kihugho?”
23 Yesu mwamusubirya athi: “Omundu amabya inianyanzire, iniakendi ghendera okwa kinywe kyaghe, na Thatha waghe iniakendi mwanza, kandi ithukendyasa eyo ali ithw’ikalha haghuma nayu.
24 Oyuthanyanzire syalighendera okwa binywe byaghe. Ekinywe ekyo mukowa ingababwira si kyaghe, aliwe ni kya Thatha oyuwanyithuma.
25 “Nabiribabwira emyatsi eyi ingakine haghuma nenyu.
26 Aliwe omuwathikya, omulimu abuyirire, ogho Thatha akendi syathuma omwa lina lyaghe, oyo akendi syabakangirirya emyatsi yosi n’eribibukya ebyosi ebyo nabiribabwira.
27 Ngabasighira obuholho; ngabaha obuholho bwaghe. Sindibahabo ngoku ekihugho kikahabo. Simuhahukaye emithima kutse simubahe.
28 Mumwowa ingababwira nyithi, ‘Ngaghenda kandi ngendi syasubulha eyo muli.’ Ku mwabya munyanzire, mwangatsemire kundi ngaghenda eyiri Thatha, kundi Thatha andengire.
29 Neryo lino namabiribabwira kithe kyabya, nuku mwanga sy’ikirirya kikabya.
30 Sinendi thasyakania nenyu bingyi, kundi omuthabali w’ekihugho anemwasa, kandi syanyiwitheko amaaka.
31 Aliwe ekihugho eriminya ngoku nganzire Thatha, ngakolha ngoku Thatha anyilhaghira erikolha. Muhangane thulhue hano.
