Engulhu Yuwene Ngoku Yahandikawa na Yohana 15:1-27
15 “Ingye indi muzabibu w’okwenene, na Thatha waghe ya mulimi.
2 Akathwa obuli muthahi owali okw’ingye owathehethaya, kandi akuwanaya obuli muthi owakahethaya, nuku angahethya ebighuma bingyi.
3 Inywe mwabirisangwa muwanibwa busana n’ekinywe ekyo nabiribabwira.
4 Musighale imune bughuma naghe, naghe ngendi sighalha ingane bughuma nenyu. Ngoku omuthahi athe angahethya ebighuma okwa lyawu amathendibya iniane okwa muzabibu, nenyu simwanga hethya ebighuma mwamathendisighalha imune bughuma naghe.
5 Ingye indi muthi w’omuzabibu; nenyu muli mithahi. Oyukasighalha iniane bughuma naghe, naghe ingane bughuma nayu, akahethaya ebighuma bingyi; ahathe ingye sihali ekyo mwanga kolha nahake.
6 Omundu amathendi sighalha iniane bughuma naghe, akaghusawa ng’omuthahi neryo iniuma. Abandu bakakuma-kuma emithahi eyo n’erighusayo omwa muliro, neryo iyahisibwa.
7 Mwamasighalha imune bughuma naghe, n’ebinywe byaghe bikabya ibine omw’inywe, musabe ekyosi-kyosi ekyo mwanzire nakyo kikendibya.
8 Thatha waghe akahebawa olhukengerwa mwamalholha embere erihethya ebighuma bingyi n’erikangania ku muli bigha baghe.
9 Ngoku Thatha abirinyanza, naghe nabiribanza; musighale omo lhwanzo lhwaghe.
10 Mwamaghendera okwa bihano byaghe, imukendi sighalha omo lhwanzo lhwaghe, ngoku naghe nabirighendera okwa bihano bya Thatha n’erisighalha omo lhwanzo lhwiwe.
11 “Emyatsi eyi nabiribabwirayo, nuku obutseme bwaghe bwangabya omw’inywe n’obutseme bwenyu bwangahikana.
12 Ekihano kyaghe ky’eki, indi mwanzane ngoku naghe nabiribanza.
13 Sihali oyuwithe olhwanzo olhulengire olhu, indi omundu atholere iniahayo engebe yiwe busana n’abanywani biwe.
14 Muli banywani baghe mwamakolha ebya ngabahana.
15 Singakibahulhamo bakobe kundi omukobe syaliminya ebya mukama wiwe akakolha. Aliwe nabiribahulhamo banywani, kundi nabiribaminyisya emyatsi yosi eyo nabiriowa oku Thatha waghe.
16 Mumuthanyisombolha, aliwe ingye munabasombolha, kandi munabasombolha nuku mughende mulhole embere erihethya ebighuma kandi ebighuma byenyu bitholere ibyabyaho, nuku ekyosi-kyosi ekya mwanga saba Thatha omwa lina lyaghe, iniabya inianganabahakyo.
17 “Ngabahana emyatsi eyi, indi mwanzane.
18 Ekihugho kyamabapona, muminye ngoku kyabirinyipona kithe kyabapona.
19 Ku mwabya b’ekihugho, ekihugho kyanganzire abakyo. Neryo kundi simuli b’ekihugho, aliwe nabiribasombolha erilhua omwa kihugho, busana n’enzumwa eyi ekihugho kikabapona.
20 Mwibuke ebinywe ebyo nababwira bino: Omukobe syalengire mukama wiwe. Bamabya imubanyendererya, nenyu bakendi syabendererya; bamabya imubaghendera okwa kinywe kyaghe, bakendi syaghendera n’okwa kyenyu.
21 Aliwe bakendi syabakolhako emyatsi yosi eyi busana n’erina lyaghe, kundi sibasi Oyuwanyithuma.
22 Kungathasa ngababwira, ambi sibawithe kibi. Aliwe lino sibawithe eky’eriyihambulyamo busana n’ekibi kyabo.
23 Oyukanyipona akapona na Thatha waghe.
24 Kungathakolha omwa kathi-kathi kabo mw’emibiiri ey’owundi wosi-wosi athakolha, bangabere isibawithe kibi; aliwe lino babirinyilhangira n’erinyipona kuthya na Thatha waghe.
25 Aliwe eki mukyabya eriberererya ebyahandikawa omwa Mighambo yabo bithi: ‘Mubanyipona isihali ekikaleka.’
26 Omuwathikya akendi syabya akasa oyo ngendi syathuma erilhua oku Thatha, omulimu w’ekwenene, owakalhua oku Thatha, oyo akendi syanyihera obwema;
27 nenyu kuthya, mutholere imwaha obwema, kundi mwabiribya imune haghuma naghe eritsuka okwa nzuko.
