Engulhu Yuwene Ngoku Yahandikawa na Yohana 16:1-33
16 “Namabiribabwira emyatsi eyi nuku simuthwikale.
2 Abandu basyabahighitha omwa sinagogi. Kandi kwenene, endambi yinemwasa omughulhu obuli mundu oyukab’itha akendi syalengekania athi amabirikolera Nyamuhanga y’omubiiri owabuyirire.
3 Aliwe bakendi syakolha emyatsi eyi kundi sibali bathaminya Thatha kutse ingye.
4 Nomwabine, namabiribabwira emyatsi eyi nuku endambi yayo y’eribya yikendi syabya yikahika, mukendi sy’ibuka ngoku munababwirayo.
“Okw’itsuka mungathababwira emyatsi eyi, kundi nabya ingane haghuma nenyu.
5 Aliwe lino ngaghenda eyiri Oyuwanyithuma; aliwe sihali n’omughuma w’okw’inywe oyukanyibulhaya athi, ‘Wukaghenda hayi?’
6 Aliwe kundi namabiribabwira emyatsi eyi, obulighe bwamabiryusulha omwa mithima yenyu.
7 Aliwe, ngababwira okwenene, n’inywe mukendi ghasirwa omw’ighenda lyaghe. Kundi namathendi ghenda, omuwathikya isyendyasa eyo muli; aliwe namaghenda, ingendi bathumirayo.
8 Kandi oyo akendisyabya akasa, akendi syaha ekihugho ky’obwema obukakakasaya obuhambire okwa kibi n’obuhambire okwa kithunganene n’obuhambire okw’itswera:
9 erimbere obuhambire okwa kibi, kundi sibali nyikiriraya;
10 n’obuhambire okwa kithunganene, kundi ngaghenda eyiri Thatha kandi simwendi syasanyilholhako;
11 n’obuhambire okw’itswera, kundi omuthabali w’ekihugho kino abiritswerwa.
12 “Ngakinawithe emyatsi mingyi y’eribabwira, aliwe simwangathoka eriyitheghereryayo lino.
13 Aliwe oyo* akendi syabya akasa, omulimu w’okwenene, akendi syabasondolha omwa kwenene eyosi, kundi syendi syabugha okwa liwe, aliwe akendi syabugha eby’akowa, kandi akendi syababwira emyatsi eyikasa.
14 Oyo akendi syanyiha olhukengerwa, kundi akendi syahebwa ebikalhua okw’ingye kandi akendi syababwirabyo.
15 Ebyosi ebya Thatha awithe ni byaghe. Ky’ekikaleka ingabugha indi akahebawa ebikalhua okw’ingye kandi akababwirabyo.
16 Hakisiya buthuku buke imwabya isimwanga thasyanyilholhako, kandi hakisiya buthuku buke imwathasyanyilholhako.”
17 Neryo abaghuma b’okwa bigha biwe mubayibughako bathi: “Akamanyisayaki akathubwira athi, ‘Hakisiya buthuku buke imwabya isimwanga thasyanyilholhako, kandi hakisiya buthuku buke imwathasya nyilholhako,’ kandi athi, ‘kundi ngaghenda eyiri Thatha’?”
18 Neryo babya bakabugha bathi: “Akamanyisayaki akabugha athi, ‘hakisiya buthuku buke’? Sithwasi ng’akakanaya okuki.”
19 Yesu mwaminya ku bakanza erimubulya, neryo mwababulya athi: “Mukabulhanaya eki kundi mungabugha indi: ‘Hakisiya buthuku buke imwabya isimwanga thasyanyilholhako, kandi hakisiya buthuku buke imwathasya nyilholhako?’
20 Kwenene ngababwira, mukendi syalira n’erisusumana, aliwe ekihugho kikendi syatsema; mukendi syakwa obulighe aliwe obulighe bwenyu bukendi syahinduka mw’obutseme.
21 Omukali akabya akabutha, akabya omwa bulighe kundi endambi yiwe yabirihika, aliwe akabya abiributha omwana, syalithasy’ibuka obulighe busana n’etseme kundi omundu amabiributhwa omwa kihugho.
22 Nenyu lino muli omwa bulighe; aliwe ngendi syabalholhako kandi, n’emithima yenyu yikendi syatsema, kandi sihali n’oyukendi syab’ihako obutseme bwenyu.
23 Okwa kiro ekyo simwendi syasanyibulya ekyosi-kyosi. Kwenene ngababwira, mwamasaba Thatha ekindu kyosi-kyosi, iniakendi bahakyo omwa lina lyaghe.
24 Erihika na lino simuli mwasaba ekindu kyosi-kyosi omwa lina lyaghe. Musabe mukendi hebwakyo, nuku obutseme bwenyu bwangahikana.
25 “Nabiribabwira emyatsi eyi omw’ikolesya eby’erileberyako. Endambi yinemwasa omughulhu ngendi syabya isingakikanaya nenyu omw’ikolesya eby’erileberyako, aliwe ngendi syababwira ebihambire oku Thatha ahathe eribisirira.
26 Okwa kiro ekyo mukendi syasaba Thatha omwa lina lyaghe; eribugha eki, sindi manyisaya indi ningye ngendi syabasabira.
27 Kundi Thatha iyuwene-wene abanzire, kundi nenyu mwabirinyanza n’erikirirya ngoku munasa ng’omuthumwa wa Nyamuhanga.
28 Munasa ng’omuthumwa wa Thatha kandi nabiryasa omwa kihugho. Lino ngalhua omwa kihugho kandi ngaghenda eyiri Thatha.”
29 Abigha biwe mubabugha bathi: “Lhangira! Lino wukabugha ahathe eribisirira kandi siwuli kolesaya eby’erileberyako.
30 Lino thwamabiriminya ngoku wasi emyatsi yosi kandi ngoku siwuli yithagha owosi-wosi erikubulya. Busana n’eki thukikiriraya ngoku walhua eyiri Nyamuhanga.”
31 Yesu mwababwira athi: “Lino mwam’ikirirya?
32 Lebaya! Esaha yinemwasa, kandi yabirihika, omughulhu obuli mughuma w’okw’inywe akendi syapanzikanira omwa nyumba yiwe kandi mukendi syanyisigha ingyuwene. Aliwe sindi ingyuwene, kundi Thatha ane haghuma naghe.
33 Nabiribabwira emyatsi eyi nuku erilhabira omw’ingye mwangathunga obuholho. Mwasyabana obulighe omwa kihugho, aliwe musike! Nabirikinda ekihugho.”
Emyatsi Ahikwa
^ Ekinywe “oyo” na “akendi” ebiri omwa mulhondo 13 na 14 bikamanyisaya “omuwathikya” oyukanibweko omwa mulhondo 7. Yesu mwakolesya ekinywe “omuwathikya” (omwa Lhugiriki ekikakanibawako ng’ekindu ky’obulhume) akakania okwa mulimu abuyirire, owathe mulhume kutse mukali omwa Lhugiriki, akaghalha buyira, nga ni mundu.
