Engulhu Yuwene Ngoku Yahandikawa na Yohana 17:1-26
17 Yesu mwakania emyatsi eyi, neryo abere alhalhamira elhubulha, mwabugha athi: “Thatha, esaha yamabirihika. Iha mughalha wawu y’olhukengerwa nuku mughalha wawu akuhe olhukengerwa,
2 ngoku wabirimuha obuthoki okwa bandu abosi, nuku angaha engebe y’erikotha okw’abosi abo wabirimuha.
3 Eyi ni ngebe y’erikotha, ibo erikuminya, iwe Nyamuhanga mughuma musa w’okwenene, n’oyo wathuma, Yesu Kristo.
4 Nabirikuha olhukengerwa okwa kihugho, omw’ighunza omubiiri ogho wamba erikolha.
5 Neryo lino, Thatha, imba olhukengerwa okwa lhuhandi lhwawu, olhukengerwa olho nabya nalho ekihugho kithe kyabyaho.
6 “Nabiriminyikalya erina lyawu okwa bandu abo wamba omwa kihugho. Babya bawu, kandi muwambabo, kandi babirighendera okwa kinywe kyawu.
7 Lino babiriminya ngoku emyatsi yosi eyo wanyiha yikalhua okw’iwe;
8 kundi nabiribaha ebinywe ebyo wamba, kandi babiribiligha kandi babiriminya ndeke-ndeke ngoku mungasa ng’omuthumwa wawu, kandi babirikirirya ngoku wanyithuma.
9 Ngasaba busana nabu; ngasaba, isi busana n’ekihugho, aliwe busana n’abo wamba, kundi ni bawu;
10 kandi ebyaghe ebyosi ni byawu n’ebyawu ni byaghe, kandi nabirihebwa olhukengerwa omwakathi-kathi kabo.
11 “Singakiri omwa kihugho, aliwe ibo bane omwa kihugho, kandi ngayasa eyawuli. Thatha Oyubuyirire, wubatheghaye busana n’erina lyawu, eryo wabirinyiha, nuku bangabya mughuma* ngoku thuli mughuma.*
12 Omughulhu nabya nabo, iningabatheghaya busana n’erina lyawu, eryo wanyiha; kandi nabiribatheya, kandi sihali n’omughuma w’okw’ibo oyuwabirithoghothibwa ya n’omughalha w’erithoghothibwa musa, nuku amasako angabererera.
13 Aliwe lino ngasa eya wuli, kandi ngabugha emyatsi eyi omwa kihugho, nuku obutseme bwaghe bwangahikana omw’ibo.
14 Nabiribabwira ekinywe kyawu, aliwe ekihugho kyabiribapona, kundi si b’ekihugho, ngoku naghe sindi w’ekihugho.
15 “Sindi saba indi wubalhusaye omwa kihugho, aliwe indi wubatheghaye busana n’omubi.
16 Si b’ekihugho, ngoku naghe sindi w’ekihugho.
17 Wubayire mwa babuyirire* erilhabira omwa kwenene; ekinywe kyawu ni kwenene.
18 Ngoku wananyithuma omwa kihugho, naghe ngabathuma omwa kihugho.
19 Kandi ngayiyira mwa mubuyirire busana nabu, nuku nabo bangayirwa mwa babuyirire erilhabira omwa kwenene.
20 “Ngasaba, butsira busana n’aba basa, aliwe kandi busana n’abakanyikiriraya erilhabira omwa kinywe kyabu,
21 nuku abosi bangabya mughuma, ngoku iwe, Thatha, wuli bughuma naghe, naghe ngali bughuma nawu, nabo bangabya bughuma nethu, nuku ekihugho kyang’ikirirya ngoku wanyithuma.
22 Nabiribaha olhukengerwa olho wabirinyiha, nuku bangabya mughuma ngoku thuli mughuma.
23 Ngali bughuma nabo, nawu wuli bughuma naghe, nuku bangahikana mwa mughuma,* nuku ekihugho kyanga minya ngoku wanyithuma kandi ku muwabanza ngoku wanyanza.
24 Thatha, nganzire abo wabirinyiha ibabya aho nyiri, nuku bangalhangira olhukengerwa olho wabirinyiha, kundi muwanyanza ekihugho kithe kyatsuka.*
25 Thatha oyuthunganene, ekihugho sikirikyatha kuminya, aliwe ingye nganakwasi, n’aba babiriminya ngoku wanyithuma.
26 Nabiribaminyisya erina lyawu kandi ngendi liminyisya, nuku olhwanzo olho wanyanzamo lhwangabya omw’ibo, naghe ingane bughuma nabo.”
Emyatsi Ahikwa
^ Kutse “omwa bughuma.”
^ Kutse “omwa bughuma.”
^ Kutse “wubahighule.”
^ Kutse “bangabya bughuma ndeke.”
^ Kilhangirikire eki kikamanyisaya eributhwa ly’abaana ba Adamu na Eva.
