Engulhu Yuwene Ngoku Yahandikawa na Yohana 18:1-40
-
Yuda akaghoberaya Yesu (1-9)
-
Petero akakolesaya omuyali (10, 11)
-
Yesu akathwalhawa ewa Ana (12-14)
-
Eriyighana lya Petero ery’erimbere (15-18)
-
Yesu iniane embere sya Ana (19-24)
-
Eriyighana lya Petero eryakabiri n’eryakasathu (25-27)
-
Yesu iniane embere sya Pilato (28-40)
-
“Obwami bwaghe si bw’ekihugho kino” (36)
-
18 Yesu abere abiribugha emyatsi eyi, iyo n’abigha biwe mubaghenda eyisirya w’Omusya we Kidroni* eyabya eririma, iyo n’abigha biwe mubaghenda omw’irima eryo.
2 Neryo Yuda, oyuwamughoberaya, nayu abya inianasi omwanya oyo, kundi mughulhu mungyi Yesu iniakahindanirayo n’abigha biwe.
3 Neryo Yuda mwaletha egurupu y’abasirikali n’abapolisi b’abahereri bakulhu n’Ababafarisayo neryo mubasayo ibane n’esyongoleryo n’esyotara n’ebirwanisyo.
4 Neryo Yesu, inianasi ebyosi ebikayamubyako, mwaseghera aho bali n’eribabulya athi: “Mukasondayandi?”
5 Mubamusubirya bathi: “Yesu Omunazareti.” Mwababwira athi: “N’ingye.” Na Yuda, oyuwamughoberaya, abya inian’imene nabo.
6 Aliwe, Yesu abere abiribabwira athi, “N’ingye,” mubasuba bunyuma-nyuma n’eriyithinangira okwa kithaka.
7 Neryo kandi mwababulya athi: “Mukasondayandi?” Mubamusubirya bathi: “Yesu Omunazareti.”
8 Yesu mwabasubirya athi: “Sinabiribabwira indi n’ingye. Neryo mwamabya in’ingye mukasondaya, muleke abalhume aba baghende.”
9 Eki kyabya eriberererya ebyo abya iniabiribugha athi: “Okwa bawabirimba, sinathaheryako n’omughuma.”
10 Neryo Simoni Petero, oyuwabya n’omuyali, mw’ihaweyo, amathema omughombe w’omuhereri mukulhu, n’erimuthwa kw’okuthwe kw’amali. Erina ly’omughombe oyo lyabya Malko.
11 Aliwe Yesu mwabwira Petero athi: “Subaya omuyali w’omwa lhubo lhwagho. Mbwino singatholere nganywa ekikopo ekyo Thatha abirimba?”
12 Neryo abasirikali n’akamanda w’amahe n’abapolisi b’Abayuda mubahamba Yesu n’erimuboha.
13 Neryo mubatsuka erimuthwalha ewa Ana, kundi abya subyalha wa Kayafa, oyuwabya muhereri mukulhu omo mwaka oyo.
14 Kundi nibya Kayafa y’oyuwahabulha Abayuda athi ibakendi ghasirwa omundu mughuma eriholha busana n’abandu.
15 Neryo Simoni Petero n’owundi mwigha babya ibanakwamire Yesu. Omuhereri mukulhu abya inianasi omwigha oyo, kandi mwahika na Yesu omwa buthalha bw’omuhereri mukulhu,
16 aliwe Petero abya inian’imene eyihya okwa lhukyo.* Neryo owundi mwigha oyuwabya asibwe n’omuhereri mukulhu, mwahulhukamo, amayakania n’omutheya w’olhukyo neryo am’ingiryamo Petero.
17 Neryo omughombe w’obukali oyuwabya mutheya w’olhukyo mwabugha na Petero athi: “Mbwino nawu siwuli mughuma w’okwa bigha b’omulhume oyu?” Petero mwasubirya athi: “Sindi mughuma w’okw’ibo.”
18 Neryo abaghombe n’abapolisi babya ibanathimbire okwa muliro w’amakalha ogho babya ibabiryakya, kundi yabya embeho neryo babya bak’otha. Na Petero abya inian’imene haghuma nabo ak’otha.
19 Neryo omuhereri mukulhu mwabulya Yesu ebihambire okwa bigha biwe n’okw’ikangirirya liwe.
20 Yesu mwamusubirya athi: “Nabirikanirya ekihugho ahathe eribisirira. Mughulhu wosi iningakangiriraya omwa sinagogi n’omwa hekalhu, eyo Abayuda abosi bakayihindanaya haghuma, kandi sihali ekyo nabugha omo mbitha.
21 Busana naki wukanyibulhaya? Bulhaya ababiriowa ebyo nababwira. Lebaya! Aba banasi ebyo nabugha.”
22 Abere abiribugha emyatsi eyi, omughuma w’okw’abapolisi oyuwabya imeneho mwamathulha Yesu y’omwa busu n’eribugha athi: “Ku wukasubiraya wuthya omuhereri mukulhu?”
23 Yesu mwamusubirya athi: “Namabya inamabugha ekiwire, wuhe obwema ngoku kiwire; aliwe ekya namabugha kyamabya ikihikire, busana naki wukanyiswiraya?”
24 Neryo Ana mwabugha athi bathwale Yesu ew’omuhereri mukulhu Kayafa, inianabohirwe.
25 Neryo Simoni Petero abya inianimene aho inianemwotha. Neryo mubamubulya bathi: “Mbwino nawu si wuli mughuma w’okwa bigha biwe?” Mwayighana n’eribugha athi: “Sindi mughuma w’okw’ibo.”
26 Omughuma w’okwa baghombe b’omuhereri mukulhu, omuhughu w’omulhume oyo Petero athwa kw’okuthwe, mwabugha athi: “Mungakulhangira omw’irima iwune haghuma nayu, kwa bithe?”
27 Aliwe Petero kandi mwayighana, neryo aho naho engoko-lhome muyabika.
28 Neryo mubalhusya Yesu ewa Kayafa bamamuthwalha ewa gavana. Bwabya ngyakya-ngyakya. Aliwe ibo mubath’ingira omwa gavana nuku sibatsandibawe bangathoka erirya Erikyuruka.
29 Neryo Pilato mwahulhukira eyihya eyo bali n’eribugha athi: “Ni musangoki ogho mukahira okwa mulhume oyu?”
30 Mubamusubirya bathi: “Omulhume oyu kw’athabya mukolha-nabi,* si thwanga mulethire eya wuli.”
31 Neryo Pilato mwabasubirya athi: “Muyithwalireyo muyamutswere erikwamana n’ebilhaghiro byenyu.” Abayuda mubamusubirya bathi: “Sithuhamulirwe eritha mundu wosi-wosi.”
32 Eki kyabya, eriberererya ebya Yesu abya iniabiribugha akakangania ng’akayaholha olhuholho olhuli lhuthi.
33 Neryo kandi Pilato mw’ingira omwa gavana n’eribirikira Yesu n’erimubulya athi: “Niwe Mwami w’Abayuda?”
34 Yesu mwamusubirya athi: “Wukabulhaya eki ahabwawu, kutse abandi babalyakubwira okw’ingye?”
35 Pilato mwasubirya athi: “Sindi Muyuda, kwa bithe? Ab’ekihanda kyawu n’abahereri bakulhu babalyakuletha okw’ingye. Wakolireki?”
36 Yesu mwasubirya athi: “Obwami bwaghe si bw’ekihugho kino. Obwami bwaghe ku bwabya bw’ekihugho kino, abaghombe baghe bangabere ibabirilhwa nuku singahirawe omwa byalha by’Abayuda. Aliwe ngoku kiri, Obwami bwaghe si bw’ekihugho kino.”
37 Neryo Pilato mwamubulya athi: “Neryo kwesi, wuli mwami?” Yesu mwasubirya athi: “Iwe iwuwene-wene wamabugha wuthi ngali mwami. Kundi busana n’eki, munabuthwa, kandi busana n’eki, nabiryasa omwa kihugho nuku nangaha obwema obuhambire okwa kwenene. Obuli mundu oyuli okwa lhuhandi lhw’ekwenene akahulikirira omulenge waghe.”
38 Pilato mwamubulya athi: “Ekwenene niki?”
Abere abiribugha ebi, kandi mwasuba eyihya eyiri Abayuda n’eribabwira athi: “Singathamubana kw’olhubanza.
39 Aliwe, munawithe omurwa owakabugha athi ngatholere ingababoholera omundu okw’Ikyuruka. Neryo mwanzire ingababoholera Omwami w’Abayuda?”
40 Kandi mubabirikira omwa mulenge munene bathi: “Butsira omulhume oyo, aliwe Baraba!” Baraba abya mwibi.
Emyatsi Ahikwa
^ Kutse “omusya we Kidroni ow’omuhurumuko w’esyonzururu.”
^ Kutse “obwingiriro.”
^ Kutse “engoli y’ebibi.”
