Engulhu Yuwene Ngoku Yahandikawa na Yohana 19:1-42
19 Neryo Pilato mwahamba Yesu n’erimuswirya.
2 N’abasirikali mubalhuka embiitha y’amahwa n’erihirayo okwa omuthwe wiwe n’erimwambalya ekanzu y’olhubono-bono,*
3 kandi mubabera eryasa aho ali n’eribugha bathi: “Thwamakuramukya, iwe Mwami w’Abayuda!” Kandi mubabera erimumathangulha omwa busu.
4 Pilato kandi mwahulhukira eyihya n’eribabwira athi: “Lebaya! Ngabahulhukirayayo nuku muminye ngoku sinathamubanako lhubanza.”
5 Neryo Yesu mwahulhukira eyihya, inianambere embiitha y’amahwa n’ekanzu y’olhubono-bono. Neryo Pilato mwabugha nabo athi: “Lebaya! Omulhume!”
6 Aliwe abahereri bakulhu n’abapolisi babere bamulhangira, mubabugha omwa mulenge munene bathi: “Ahanikawe okwa muthi! Ahanikawe okwa muthi!”* Pilato mwababwira athi: “Mumuthwale muyayihanikireyo, kundi ingye sinathamubanako lhubanza lhwosi-lhwosi.”
7 Abayuda mubamusubirya bathi: “Thunawithe ebilhaghiro, kandi erikwamana n’ebilhaghiro atholere iniakwa, kundi akayiyira mwa mughalha wa Nyamuhanga.”
8 Pilato abere owa ebya bakabugha, mw’ongera erikwa obuba,
9 kandi mwasuba ewa gavana n’eribulya Yesu athi: “Ewenyu ni hayi? Aliwe Yesu mwathamusubirya.
10 Neryo Pilato mwamubwira athi: “Wukaghana eribugha naghe? Siwasi ku ngawithe obuthoki obw’erikuboholha kandi ngoku ngawithe obuthoki obw’erikwitha?”*
11 Yesu mwamusubirya athi: “Siwanganyithungako obuthoki mbwino iwunalyahebawabo erilhua endatha. Eki ky’ekyamaleka omulhume oyulyanyiletha eya wuli iniabya kw’erilholho linene.”
12 Busana n’eki Pilato mwabera erisondekania enzira y’erimuboholeramo, aliwe Abayuda ibakabugha omwa mulenge munene bathi: “Wamaboholha omulhume oyu, isiwuli munywani wa Kaisari. Obuli mundu oyukayiyiramo mwami akakanaya nabi* oku Kaisari.”
13 Neryo Pilato abere abiriowa ebinywe ebi, mwahulhukirya Yesu y’eyihya, kandi mw’ikalha okwa kithumbi ky’eritswera omo mwanya owakahulhawamo Ekibugha ky’Amabwe, aliwe omwa Kihebrania, Gabbata.
14 Neryo kyabya kiro ky’Eritheghekania Erikyuruka; syabya nga saha mukagha.* Neryo mwabwira Abayuda athi: “Lebaya! Omwami wenyu!”
15 Aliwe mubabugha omwa mulenge munene bathi: “Ithawe! Ithawe! Ahanikawe okwa muthi!” Pilato mwababulya athi: “Ngahanike omwami wenyu?” Abahereri bakulhu mubasubirya bathi: “Sithuwithe owundi mwami, nina Kaisari musa.”
16 Neryo mwabalhwikirayo nuku bayamuhanike okwa muthi.
Neryo Yesu mwabya omwa byalha byabu.
17 Mwayihekera omuthi wiwe w’amaghali,* amaghenda omo mwanya owakahulhawamo Omwanya w’Akahangarara, omwa Kihebrania akahulhawamo Gologota.
18 Eyo mubamukongomerera okwa muthi n’abandi balhume babiri, owundi okwa mali n’owundi okwa malembe, Yesu omwa kathi-kathi.
19 Kandi Pilato mwahandika ebinywe n’eribihira okwa muthi w’amaghali.* Byabya bikabugha bithi: “Yesu Omunazareti Omwami w’Abayuda.”
20 Abayuda bangyi mubasoma ebinywe ebi, kundi omwanya ogho Yesu ahanikawamo abya hakuhi n’etawuni, kandi byabya bihandikire omwa Lhuhebrania, omwa Lhulatini, n’omwa Lhugiriki.
21 Aliwe abahereri bakulhu b’Abayuda mubabwira Pilato bathi: “Isiwahandika wuthi, ‘Omwami w’Abayuda,’ aliwe wuthi iniakabugha athi, ‘Indi Mwami w’Abayuda.’”
22 Pilato mwasubirya athi: “Ebya nabirihandika, byanabirihandika.”
23 Neryo abasirikali babere babirikongomerera Yesu y’okwa muthi, mubimya esyongyimba siwe sy’eriyithomekako bamasighaba mwa bitsweka bbini, obuli musirikali amimya kighuma, kandi mubimya n’olhw’omwakathi. Aliwe olhukimba lhw’omwakathi silhwabya mw’omulhando, aliwe lhwabya lhughuma-ghuma eritsuka endatha erihika ekabunu.
24 Neryo mubabwirana bathi: “Thuleke erilhusathya, aliwe thughuse obuthuli busana nalho erilebya nga lhukendibya lhwandi.” Eki kyabya eriberererya amasako: “Mubaghabana esyongyimba syaghe, kandi mubaghusa ehithuli busana n’esyongyimba syaghe.” Kwenene abasirikali mubakolha emyatsi eyi.
25 Aliwe mama wa Yesu na mwali wabo; Maria muka Klopa na Maria Magdalena babya ibanimene hakuhi n’omuthi w’amaghali* ogho Yesu abyako.
26 Neryo Yesu abere alhangira mama wiwe n’omwigha oyo Yesu aby’anzire kutsibu ibanimene hakuhi, mwabwira mama wiwe athi: “Mukali, lhangira! Mughalha wawu!”
27 Neryo mwabugha n’omwigha athi: “Lhangira! Mama wawu!” Neryo eritsuka-tsukana naho, omwigha mwamuthwalha ewiwe.
28 Enyuma waho, Yesu abere abiriminya ngoku emyatsi yosi yamabiribererera, nuku aberereraye amasako, mwabugha athi: “Namakwa enyotha.”
29 Habya ihane eriregha eryuswire mw’evini eyipakere. Neryo mubahira embuhuma y’omwa vini eyipakere n’erihirayo okwa kathi k’ehisopu* n’erisumbirayo okwa buno bwiwe.
30 Yesu abere abirihebwa evini eyipakere, mwabugha athi: “Kyamabiribererera!” neryo munamya omuthwe wiwe, amathwa omuthima.*
31 Kundi kyabya kiro ky’Eritheghekania, n’ebinda isi byanga sighalha okwa mithi y’amaghali okwa kiro ky’Esabato (kundi Esabato eyo yabya ngulhu), Abayuda mubasaba Pilato bathi amaghulhu w’abahanikire abbunangawe n’ebinda byabo bilhusibawe okwa mithi.
32 Neryo abasirikali mubasa bamabbunanga amaghulhu w’omulhume w’okubanza n’owundi oyuwabya ahanikire hakuhi na Yesu.
33 Aliwe babere bahika oku Yesu, mubalhangira iniabiriholha, neryo mubathabbunanga amaghulhu wiwe.
34 Aliwe omughuma w’okwa basirikali mwamutsimitha omwa lhukanga omw’ithumu, aho naho omusasi n’amaghetse mubyamulhuamo.
35 N’oyuwalhangira eki abiriha obwema obu, kandi obwema bwiwe buhikire, kandi anasi ngoku eby’akabugha bihikire, nuku nenyu mwang’ikirirya.
36 Omo kwenene, ebi byabya nuku amasako abererere: “Sihali n’erikuha liwe erikendi syabbunwa.”
37 N’erindi lisako lithi: “Bakendi syalhangira oyo batsimitha.”
38 Neryo enyuma w’emyatsi eyi, Yozefu we Arimatea, oyuwabya mwigha wa Yesu aliwe omwa bubiso-biso kundi aby’akasagha Abayuda, mwasaba Pilato athi ng’anathwale omubiri wa Yesu, na Pilato mwamulighira. Neryo mwasa, amakimya omubiri wa Yesu.
39 Nikodemo, omulhume oyuwahika oku Yesu omurundi w’erimbere omwa kiro, nayu mwasa, mwaletha emane-mane eyitswangene* mw’obukwa, obulitho bw’esyopaundi kikumi.*
40 Neryo mubathwalha omubiri wa Yesu kandi bamalingiragho omwa lhukimba lhw’ekitani olhuli mw’amanukato, erikwamana n’emitsikire y’Abayuda.
41 Ebyo bine aho, aho bamwithira* habya ihane eririma, kandi omw’irima eryo mwabya imune eyisinda* mbyaka eyo bathe bathatsikamu mundu.
42 Neryo kundi kyabya kiro ky’Eritheghekania ky’Abayuda, n’eyisinda iyine hakuhi, mubatsikamu Yesu.
Emyatsi Ahikwa
^ Kutse “papo.”
^ Kutse “Ithirawe okwa muthi! Ithirawe okwa muthi!”
^ Kutse “erikwithira okwa muthi?”
^ Kutse “akahakanisaya.”
^ Ni bugha ambu, nga saha 6 sy’erithungyi.
^ Kutse “erilekulha.”
^ Kutse obundi, “omukanyo.”
^ Ni bugha ambu, esyopaundi sy’Abaroma.
^ Kutse “aho bamwithira okwa muthi.”
^ Kutse “eyisinda y’eryibukwa.”
