Engulhu Yuwene Ngoku Yahandikawa na Yohana 2:1-25
2 Neryo okwa kiro kyakasathu, e Kana ye Galilaya muyabya obugheni bw’eriherukya, na mama wa Yesu abya inianeyo okwa bugheni.
2 Yesu n’abigha biwe, nabu babya ibabirikokibwa okwa bugheni bw’eriherukya obo.
3 Evini yabere yakeha, mama wa Yesu mwamubwira athi: “Sibawithe evini.”
4 Aliwe Yesu mwamusubirya athi: “Mukali, ebyo bikathuhambako bithi ingye thunawu?* Endambi yaghe siyiriyahika.”
5 Mama wiwe mwabwira abakaherezaya athi: “Mukole ekyosi-kyosi eky’akababwira.”
6 Neryo habya ihane amalegha mukagha awakolirwe omwa mabwe ngoku kyabya kikayithaghisibwa omwa bilhaghiro by’Abayuda eby’eryeribwa, obuli rilegha irikayamo ebirengyi* bibiri kutse bisathu.
7 Yesu mwababwira athi: “Muhire omwa malegha mw’amaghetse.” Nabo mubahiraghomo erihika okwa minywe.
8 Neryo mwababwira athi: “Muthehe kugho muthwaliregho omwimaniri w’obugheni.” Neryo mubathwalhagho.
9 Omwimaniri w’obugheni abere arozya okwa maghetse awamabirihindulhwamo vini, aliwe isyathaminya aho yiryalhua (nomwakine indi abaghombe abalyathehagho babya ibanasi), mwabirikira omughole w’obulhume
10 n’erimubwira athi: “Obuli mundu akatsuka eriletha evini eyuwene, neryo abandu bakabya babirithamira, inialetha eyithuwene. Aliwe iwe wabiribika eyuwene erihika nalino.”
11 Yesu mwakolera eki kye Kana ye Galilaya ng’eritsuka ly’ebiminyikalho biwe, kandi mwaminyikalya olhukengerwa lhwiwe n’abigha biwe mubamwikirirya.
12 Enyuma w’ebi, iyo, mama wiwe, baghalha babo, n’abigha biwe mubandaghalira e Kapernaumu, aliwe mubathaghunzayo biro binene.
13 Neryo Erikyuruka ly’Abayuda lyabya irikayahika, na Yesu mwahethukira e Yerusalemu.
14 Mweya omwa hekalhu mwabakaghulhaya esyonde n’esyombuli n’ehirikuku, n’ababweki b’esyosente ibanikere omwa bithumbi byabo.
15 Abere abirilhuka ekibboko omwa bikoba, mwathibitha okwa bosi abali n’esyombuli n’esyonde omwa hekalhu, kandi mutha ebinusu by’abahingisya b’esyosente n’erikubbungulha esyomeza syabo.
16 Neryo mwabugha n’abakaghulhaya ehirikuku athi: “Mulhusaye ebi bya hano! Muleke erikolha enyumba ya Thatha waghe mwa nyumba y’esuburu!”*
17 Abigha biwe mub’ibuka ngoku kihandikire kithi: “Omuhwa w’enyumba yawu asyanyihisirirya omwa muthima.”
18 Neryo Abayuda mubamusubirya bathi: “Ni kiminyikalho kyahi ekya wanga thukangania, kundi wunemukolha emyatsi eyi?”
19 Yesu mwabasubirya athi: “Muhimbule ehekalhu eyi, kandi omwa biro bisathu ngendi himbayo.”
20 Neryo Abayuda mubabugha bathi: “Ehekalhu eyi muyahimbwa omwa myaka 46, wunemwendi himbayo omwa biro bisathu?”
21 Aliwe aby’akakania okwa hekalhu y’omubiri wiwe.
22 Neryo abere akalhubukibwa okwa baholi, abigha biwe mub’ibuka ngoku abya akabera eribugha eki, neryo mubikirirya amasako n’ebya Yesu abya iniabiribugha.
23 Aliwe abere ane e Yerusalemu okwa mukonga w’ekiro ky’Erikyuruka, abandu bangyi mubikirirya omwa lina liwe omughulhu balhangira ebiminyikalho ebyo aby’akakolha.
24 Aliwe Yesu isyanga bayikethera kundi abya inianabasi
25 kandi kundi syabya akayithagha omundu wosi-wosi erimubwira ebihambire okwa bandu, kundi inianasi ebiri omwa muthima w’omundu.
Emyatsi Ahikwa
^ Kinywe okwa kinywe, “Niki okw’ingye n’okw’iwe, mukali?” Emibughire eyi yikakanganaya erighana. Erikolesya ekinywe “mukali” sikirikanganaya erithendi sikya.
^ Ekirengyi kighuma kyangabya iyabya ebbati eyingene n’esyolita 22.
^ Kutse “mwa kathali.”
