Engulhu Yuwene Ngoku Yahandikawa na Yohana 20:1-31
20 Okwa kiro ky’erimbere eky’ewiki, Maria Magdalene mwatsinduka okwa yisinda,* yabya iyikine omwirima, neryo mwalhangira eribwe iryabirikumbaghalibwa erilhua okwa yisinda.*
2 Neryo mwasa akathibitha eyiri Simoni Petero n’owundi mwigha, oyo Yesu aby’anzire kutsibu, mwababwira athi: “Babirilhusya Omukama y’omw’isinda, kandi sithwasi ngababiriyamutheka hayi.”
3 Neryo Petero n’owundi mwigha mubahongoka bamaya eyiri eyisinda.
4 Abosi babiri mubatsuka erithibitha haghuma, aliwe owundi mwigha mwathibitha kutsibu kwilhaba Petero neryo mwatsuka erihika okwa yisinda.
5 Abere akengemereryamo, mwalhangira esyongyimba sy’ekitani isinemo, aliwe mwath’ingiramo.
6 Neryo na Simoni Petero mwasa inianamukwamire, am’ingira omw’isinda. Neryo mwalhangira esyongyimba sy’ekitani isinemo.
7 Olhukimba olhwabya okwa muthwe wiwe silhwabya haghuma n’olhukimba olhwabya lhumubohire aliwe lhwabya ilhune ilhulhwene.
8 Neryo owundi mwigha oyuwatsuka erihika okwa yisinda nayu mw’ingiramo, neryo mwalhangira kandi am’ikirirya.
9 Kundi babya isibali bayitheghererya amasako ngoku aby’akabugha athi atholere inialhubuka okwa baholi.
10 Neryo abigha mubasuba omo maka wabo.
11 Aliwe, Maria mwasighalha inian’imene hakuhi n’eyisinda, inianemulira. Abere anemulira, mwakengemererya omw’isinda,
12 neryo mwalhangira abamalaika babiri ibanambere esyongyimba sy’enzeru iban’ikere ahabya omubiri wa Yesu, omughuma ahabya omuthwe n’owundi ahabya ebisandu.
13 Neryo mubamubwira bathi: “Mukali, wukaliraki?” Mwabasubirya athi: “Babirithwalha Omukama waghe kandi singasi ahabamuthekire.”
14 Abere abiribugha eki, mwathimbya ameso, amalhangira Yesu inianimene aho, aliwe mwathaminya ngoku ni Yesu.
15 Yesu mwamubwira athi: “Mukali, wukaliraki? Wukasondayandi?” Kundi omukali mwalengekania athi ni mulimi w’eririma, mwamubwira athi: “Mukulhu, wamabya iwabirimuthwalha, nyibwire aho wabirimutheka, naghe ngendi muthwalha.”
16 Yesu mwabugha nayu athi: “Maria!” Maria abere akakeba, mwabugha nayu omwa Lhuhebrania athi: “Rabboni!” (ekikamanyisaya “Mukangirirya!”)
17 Yesu mwamubwira athi: “Leka erinyamakirira, kundi sindi nahethukira eyiri Thatha. Aliwe wughende eyiri baghalha bethu, wubabwire wuthi, ‘Ngahethukira eyiri Thatha waghe kandi Thatha wenyu, eyiri Nyamuhanga waghe kandi Nyamuhanga wenyu.’”
18 Maria Magdalene mwasa n’erilethera abigha b’omwatsi athi: “Nabirilholha oku Mukama!” Neryo mwababwira eby’alyamubwira.
19 Bwabere bwabirira ekiro ekyo, ekiro ky’erimbere eky’ewiki, abigha ibanayikingire aho babya busana n’erisagha Abayuda, Yesu mwasa n’erimana omwa kathi-kathi kabo n’eribabwira athi: “Obuholho bubye nenyu.”
20 Abere abiribugha eki, mwabakangania ebyalha biwe n’olhukanga lhwiwe. Neryo abigha mubatsema kutsibu bakalhangira Omukama.
21 Yesu mwathasyababwira athi: “Obuholho bubye nenyu. Ngoku Thatha anyithuma, naghe ngabathuma.”
22 Abere abiribugha eki mwababuhirako omuka n’eribabwira athi: “Mwangirire omulimu abuyirire.
23 Mwamaghanyira owosi-wosi y’ebibi biwe, bikaghanyirawa; mwamathendi ghanyira owosi-wosi, sibirighanyirawa.”
24 Aliwe Tomasi, omughuma w’okw’Ikumi n’Ababiri oyukahulhawamo Muhasa, syabya nabo Yesu akabahikako.
25 Neryo abandi bigha mubamubwira bathi: “Thwabirilholha oku Mukama!” Aliwe mwababwira athi: “Ngathengalhangira ebyalha biwe mw’engolhu y’aho bakongomerera emisumali n’erithulya omunwe waghe omwa ngolhu y’aho bakongomerera emisumali n’erihamba okwa lhukanga lhwiwe, isindi n’ikirirya.”
26 Neryo enyuma w’ebiro munani, abigha biwe kandi babya ibane omwa nyumba, na Tomasi abya iniane haghuma nabo. Nomwakine indi habya ihanakingire, Yesu mwasa amimana omwa kathi-kathi kabo n’eribugha athi: “Obuholho bubye nenyu.”
27 Neryo mwabwira Tomasi athi: “Hira omunwe wawu wahano wanalebya ebyalha byaghe kandi hamba okwa lhukanga lhwaghe, neryo wulekeryaho erithika-thika* aliwe w’ikiriraye.”
28 Tomasi mwamubwira athi: “Mukama waghe kandi Nyamuhanga waghe!”
29 Yesu mwamubwira athi: “Kundi wamabirinyilholhako, wanam’ikirirya? Obutseme buli okwa bathethalhangira aliwe ib’ikirirya.”
30 Eribakakasya, Yesu kandi mwakolha ebindi biminyikalho bingyi embere sy’abigha, ebithahandikire omwa mukunzo ono.
31 Aliwe ebi byabirihandikwa mwang’ikirirya ngoku Yesu ni Kristo, Mughalha wa Nyamuhanga, kandi busana n’erikirirya, mwanga syabana engebe erilhabira omwa lina liwe.
Emyatsi Ahikwa
^ Kutse “okw’isinda y’eryibukwa.”
^ Kutse “okw’isinda y’eryibukwa.”
^ Kinywe okwa kinywe, “erithendibya n’erikirirya.”
