Engulhu Yuwene Ngoku Yahandikawa na Yohana 21:1-25
21 Enyuma w’ebi, Yesu kandi mwayiminyikalya* okwa bigha, okwa Ngetse ye Tiberia. Mwayiminyikalya omwa nzira eno.
2 Simoni Petero, Tomasi (oyukahulhawamo Muhasa), Natanaeli owe Kana ye Galilaya, baghalha ba Zebedayo, n’abandi babiri b’okwa bigha biwe, babya ibane haghuma.
3 Simoni Petero mwababwira athi: “Ngayasoha.” Mubamubwira bathi: “Thukaghenda nawu.” Mubaghenda bamasambira omo bwathu, aliwe omwa kiro omo mubathahambaki.
4 Aliwe, bwabere bunemukya, Yesu mw’imana okwa musike w’engetse, aliwe abigha mubathaminya ngoku ni Yesu.
5 Neryo Yesu mwababwira athi: “Baana, munawithe ekyosi-kyosi* eky’erirya?” Mubasubirya bathi: “Eyihi!”
6 Mwababwira athi: “Mughuse obutimba okwa lhuhandi lhw’amali lhw’obwathu neryo mukendi hamba esiswe sirebe.” Neryo mubabughusamo, aliwe mubathathoka eribukurira omo bwathu kundi esiswe syabya nyingyi.
7 Neryo omwigha oyo Yesu aby’anzire mwabwira Petero athi: “Yo Mukama!” Neryo Simoni Petero, abere owa ngoku yo Mukama, mwambalha olhukimba lhwiwe, kundi abya isyambere iyo wosi, neryo mwayighusa omwa ngetse.
8 Aliwe abandi bigha mubasa omwa kathu kake, ibanemukura obutimba obuswire mw’esiswe, kundi sibabya haali okwa musike, futi* nga 300 sisa.
9 Babere bahika okwa musike, mubalhangira ihane omuliro w’amakalha ikune eyiswe n’omuggati.
10 Yesu mwababwira athi: “Mulethe okwa siswe esyamukalhua okw’ihamba.”
11 Neryo Simoni Petero mwaghenda omo bwathu, amakurira obutimba obuswire mw’esiswe nene-nene 153 bw’okwa musike. Kandi nomwakine indi syabya nyingyi, obutimba mubuthasathika.
12 Yesu mwababwira athi: “Mwase mulye eky’engyakya.” Muhathabya n’omughuma w’okwa bigha oyuwathunga obuthubaha bw’erimubulya athi: “Wulindi?” kundi babya ibanasi ku ni Mukama.
13 Yesu mwasa, am’imya omuggati n’eribahagho, kuthya n’esiswe.
14 Oyu w’owabya murundi wakasathu Yesu akabuthukira okwa bigha alilhubukire okwa baholi.
15 Babere baghunza eky’engyakya, Yesu mwabwira Simoni Petero athi: “Simoni mughalha wa Yohana, wunanyanzire kwilhaba esi?” Mwamusubirya athi: “Ee, Mukama, wunasi ku ngakwanzire.” Yesu mwamubwira athi: “Wulisaye ebyana byaghe by’esyombuli.”
16 Kandi mwamubwira omurundi wakabiri athi: “Simoni mughalha wa Yohana, wunanyanzire?” Mwasubirya athi: “Ee, Mukama, wunasi ku ngakwanzire.” Yesu mwamubwira athi: “Wulisaye ebyana byaghe by’esyombuli.”
17 Mwamubwira omurundi wakasathu athi: “Simoni mughalha wa Yohana, wunanyanzire?” Petero mwakwa obulighe kundi Yesu mwamubulya omurundi wakasathu athi: “Wunanyanzire?” Neryo Petero mwamubwira athi: “Mukama, wunasi emyatsi yosi; wunasi ku ngakwanzire.” Yesu mwamubwira athi: “Wulisaye ebyana byaghe by’esyombuli.
18 Kwenene ngakubwira, omughulhu wabya mulere, iwukayambalhaya n’erighenda aho wanzire. Aliwe wamabirikulha omo myaka, wukakakaya amaboko wawu n’owundi mundu iniakwambalya n’erikuthwalha eyo wuthanzire.”
19 Abugha athya erikangania nga ni lhuholho olhuli lhuthi olhw’angaheremo Nyamuhanga olhukengerwa. Abere abiribugha eki, mwabwira Petero athi: “Wulhole embere erinyikwama.”
20 Petero mwathimbya ameso amalhangira omwigha oyo Yesu aby’anzire inianabakwamire, omwigha oyuwaghemera okwa kikuba kya Yesu okw’irya ly’erigholho n’eribulya athi: “Mukama, oyukakughoberaya nindi?”
21 Neryo Petero abere amulhangira, mwabulya Yesu athi: “Mukama, kandi ibbwa omulhume oyu?”
22 Yesu mwamubwira athi: “Lyamabya in’isonda lyaghe oyu eribya inianeho erihika aho ngendi syasira, ekyo kikakuhambako kithi? Iwe lholha embere erinyikwama.”
23 Neryo omwatsi mwalhandaghana omwa balikyabo indi omwigha oyu syendi syaholha. Nomwabine, Yesu mwathamubwira athi syendi syaholha, aliwe mwabugha athi: “Lyamabya in’isonda lyaghe oyu eribya inianeho erihika aho ngendi syasira, ekyo kikakuhambako kithi?”
24 Oyu y’omwigha oyukaha obwema obuhambire okwa myatsi eyi kandi oyuwahandika emyatsi eyi, kandi thunasi ngoku obwema bwiwe ni bw’okwenene.
25 Kandi kwenene, hane n’eyindi myatsi mingyi eyo Yesu akolha, eyosi kuyahandikwa omo buswire, ngalengekanaya emikunzo eyihandikirwe kw’emyatsi eyo siyangabwene mwanya omwa kihugho.
Emyatsi Ahikwa
^ Kutse “mwabuthukira.”
^ Kutse “esiswe syosi-syosi.”
^ Mita nga 900, Kinywe okwa kinywe, “esyokyubbiti nga 200.”
