Engulhu Yuwene Ngoku Yahandikawa na Yohana 3:1-36
3 Habya Omufarisayo oyukahulhawamo Nikodemo, omuthabali w’Abayuda.
2 Oyu mwahika oku Yesu omwa kiro n’erimubwira athi: “Rabbi, thunasi ku wukalhua eyiri Nyamuhanga ng’omukangirirya, kundi sihali oyuwanga kolha ebiminyikalho ebya wukakolha ebi Nyamuhanga athe haghuma nayu.”
3 Yesu mwamusubirya athi: “Kwenene ngakubwira, omundu amathendi thasyabuthwa,* syanga lhangira Obwami bwa Nyamuhanga.”
4 Nikodemo mwamusubirya athi: “Omundu oyuwabirikulha angathasyabuthwa athi? Syanga suba omo nda ya mama wiwe akabuthwa engendo yakabiri, ikyanabya?”
5 Yesu mwasubirya athi: “Kwenene ngakubwira, omundu amathendibuthwa omwa maghetse n’omwa mulimu, syang’ingira omo Bwami bwa Nyamuhanga.
6 Omubiri w’omunyoku akabutha omubiri w’omunyoku, n’omulimu akabutha omulimu.
7 Isiwasweka kundi mungakubwira nyithi: Inywe bandu mutholere imwathasyabuthwa.
8 Omuyagha akalholhaya eyo anzire, kandi wukowa omuhumo wagho, aliwe siwuli minya eyo akalhua n’eyo akaya. Kwabiri bithya n’ok’owosi-wosi oyuwabiributhwa omwa mulimu.”
9 Nikodemo mwamusubirya athi: “Emyatsi eyi yanga thokekana yithi?”
10 Yesu mwasubirya athi: “Iwe mukangirirya we Israeli, siwuli waminya emyatsi eyi?
11 Kwenene ngakubwira, thukabugha ebya thwasi, n’eriha obwema okwa byathwabirilhangira, aliwe simulyangirira obwema obwathukaha.
12 Namabya inabiribabwira emyatsi y’ekihugho, aliwe isimuthalighayo, imwanaligha namababwira emyatsi y’elhubulha?
13 Sihali omundu oyuwabirihethukira elhubulha aliwe ya n’oyuwandaghalha akalhua elhubulha, Omughalha w’omundu.
14 Kandi ngoku Musa anahanika enzoka omo mbwarara, n’Omughalha w’omundu atholere iniahanikwa,
15 nuku obuli mundu oyukamwikiriraya angabana engebe y’erikotha.
16 “Kundi Nyamuhanga mwanza ekihugho kya kutsibu kyamaleka iniahayo Mughalha wiwe ekyusa, nuku obuli mundu oyukamwikiriraya syaheribawe aliwe abane engebe y’erikotha.
17 Kundi Nyamuhanga mwathuma Mughalha wiwe omwa kihugho isi busana n’eritswera ekihugho, aliwe busana n’erilhamya ekihugho erilhabira omw’iyo.
18 Oyukamwikiriraya syendi syatswerwa. Oyuthemwikiriraya abirisangwa atswerwa, kundi syathikirirya omwa lina lya Mughalha ekyusa kya Nyamuhanga.
19 Eritswera liseghemere oku kino: ekyakakalha kyabiryasa omwa kihugho, aliwe abandu babirianza omwirima omwakanya k’ekyakakalha, kundi emikolere yabo ni mibi.
20 Obuli mundu oyukakolha ebibi akapona ekyakakalha kandi syalyasa omwa kyakakalha, nuku emikolere yiwe siyiminyikalibawe.
21 Aliwe oyukakolha ebihikire akasa omo kyakakalha, nuku emikolere yiwe yiminyikale ng’eyakolhawa iyinahambene n’erisonda lya Nyamuhanga.”
22 Enyuma w’ebi, Yesu n’abigha biwe mubaghenda omwa kyalu kye Yudea, kandi mwaghunzayo buthuku bulebe iniane haghuma nabo kandi inianemubatizya.
23 Aliwe na Yohana abya inianemubatizirya e Ainoni hakuhi ne Salimu, kundi yabya amaghetse manene, n’abandu ibakabera eryasa ibanemubatizibwa;
24 kundi Yohana abya isyali ahirwa omwa ngomo.
25 Neryo abigha ba Yohana mubakuba obuhaka n’Omuyuda obuhambire okw’eribwa.
26 Neryo mubasa eyiri Yohana n’erimubwira bathi: “Rabbi, omulhume oyuwabya haghuma nawu eyisirya we Yorodani, oyo iwe wahako obwema, lebaya, anemubatizya, kandi abandu abosi banemughenda eyo ali.”
27 Yohana mwabugha athi: “Omundu syangahebwa kindu n’ekighuma amathendi hebwakyo erilhua elhubulha.
28 Inywe inywibene-bene mukanyihera obwema ku munabugha nyithi, ‘Sindi Kristo, aliwe nathumawa embere siwe.’
29 Oyuwithe omughole w’obukali y’omughole w’obulhume. Aliwe omunywani w’omughole w’obulhume, akabya akimana n’erimuhulikirira, akatsema kutsibu busana n’omulenge w’omughole w’obulhume. Neryo obutseme bwaghe bwabirihikana.
30 Oyo atholere inialholha embere erikanyirira, aliwe ingye ngatholere ingalholha embere erikeherera.”
31 Oyukalhua endatha alengire abandi abosi. Ow’okwa kihugho akalhua okwa kihugho kandi akabugha eby’ekihugho. Oyukalhua elhubulha alengire abandi abosi.
32 Akaha obwema okwa eby’abirilhangira n’eriowa, aliwe sihali n’oyukaligha obwema bwiwe.
33 Omundu wosi-wosi oyukaligha obwema bwiwe akabya iniamabirikihamyako ngoku Nyamuhanga ni w’okwenene.
34 Kundi oyo Nyamuhanga athuma akabugha ebinywe bya Nyamuhanga, kundi Nyamuhanga syalinunirira* omulimu wiwe.
35 Thatha anzire Omughalha kandi abirihira emyatsi yosi omwa byalha biwe.
36 Oyukikiriraya Omughalha awithe engebe y’erikotha; oyuthyowa Omughalha syendi syalhangira engebe, aliwe erihithana lya Nyamuhanga limwikereko.
