Engulhu Yuwene Ngoku Yahandikawa na Yohana 4:1-54
4 Omukama abere aminya ngoku Abafarisayo babiriowa ngoku Yesu anemuyira abigha bangyi n’eribabatizya kwilhaba Yohana—
2 nomwakine indi Yesu iyo mwathabatizya aliwe abigha biwe bababatizaya—
3 mwalhua e Yudea amasuba e Galilaya.
4 Aliwe aby’atholere inialhaba e Samaria.
5 Neryo mwahika omwa tawuni ye Samaria eyikahulhawamo Sukari, hakuhi n’eririma eryo Yakobo abya iniabiriha mughalha wiwe ya Yozefu.
6 Eyo y’eyabya ekithehero kya Yakobo. Neryo Yesu iniabirilhuha busana n’olhughendo, mwikalha okwa kithehero.* Syabya saha nga mukagha.*
7 Omukali we Samaria mwasa akasyatheha amaghetse. Yesu mwamubwira athi: “Imba aw’erinywa.”
8 (Kundi abigha biwe babya ibabirighenda omwa tawuni bakayaghulha ebyalya.)
9 Neryo omukali Omusamaria mwamubwira athi: “Kikathokekana kithi iwe Muyuda erinyisaba aw’erinywa ingye mukali Omusamaria?” (Kundi Abayuda isibali kolongana n’Abasamaria.)
10 Yesu mwamusubirya athi: “Kuwabya iwabiriminya ekihembo ekya Nyamuhanga akaha ahathe eriliha kandi nga nindi oyukakubwira athi, ‘Imba aw’erinywa,’ wangabere iwabirimusaba, nayu angabere iniabirikuha amaghetse w’engebe.”
11 Omukali mwamubwira athi: “Mukulhu, siwuwithe n’eky’erithehamo amaghetse, n’ekithehero ni kiiri. Neryo amaghetse w’engebe ayo wukalhusayagho hayi?
12 Mbwino wulengire thatha-kulhu wethu Yakobo oyuwathuha ekithehero, oyo iyo n’abaghalha biwe n’esyonde siwe babya bakanywirako?”
13 Yesu mwasubirya omukali athi: “Obuli mundu oyukanywa okwa maghetse aya akathasyakwa enyotha.
14 Oyukanywa okwa maghetse agho ngendi muha syendi syakwa enyotha nahake, aliwe amaghetse agho ngendi muha akendi syabya ngununuko omw’iyo eyikendi syamuha engebe y’erikotha.”
15 Omukali mwamubwira athi: “Mukulhu, imba amaghetse ayo, nuku ngaleke erisyathasyakwa enyotha kutse eribera eryasa hano ingasyatheha amaghetse.”
16 Yesu mwamubwira athi: “Ghenda wubirikire mwira wawu ase hano.”
17 Omukali mwamusubirya athi: “Singwithe mulhume.” Yesu mwamubwira athi: “Wuhikire wukabugha wuthi, ‘Singwithe mulhume.’
18 Kundi wabiribya n’abalhume bathano, n’omulhume oyo wuli nayo lino si mwira wawu. Ekya wamabugha ni kwenene.”
19 Omukali mwamubwira athi: “Mukulhu, namalhangira ku wuli muminyereri.
20 Abathatha-kulhu wethu babya bakaramirya okwa kithwe eki, aliwe inywe mukabugha muthi e Yerusalemu y’eyiri omwanya ogho abandu batholere ibaramiryamo.”
21 Yesu mwamubwira athi: “Mukali, wunyikiriraye, endambi yinemwasa omughulhu mukendisyabya isimukiramiraya Thatha okwa kithwe eki kutse e Yerusalemu.
22 Mukaramaya ekya muthasi; thukaramaya ekya thwasi, kundi omulhamu akatsuka oko Bayuda.
23 Nomwabine, endambi yinemwasa kandi yabirihika, omughulhu abaramya b’okwenene bakendi syaramya Thatha omwa mulimu n’omwa kwenene, kundi kwenene, Thatha akasondaya abali ng’abo erimuramya.
24 Nyamuhanga ni Mulimu n’abakamuramaya batholere ibamuramya omwa mulimu n’omwa kwenene.”
25 Omukali mwabwira Yesu athi: “Nganasi ngoku Masiya anemwasa, oyukahulhawamo Kristo. Oyo akendi syabya akasa, akendi syathubwira emyatsi yosi ahathe eribisirira.”
26 Yesu mwamubwira athi: “N’ingye iyo, oyukakanaya nawu.”
27 Neryo aho n’aho abigha biwe mubasa, kandi mubasweka kundi aby’akakania n’omukali. Nomwabine, sihali oyuwabugha athi: “Wukasondayaki?” kutse “Busana naki wukakanaya n’omukali?”
28 Neryo omukali mwasigha erilegha liwe ly’amaghetse, amaghenda omo tawuni n’eriyabwira abandu athi:
29 “Mwase muyalebaye omulhume oyuwamambwira ebyosi ebyo nabirikolha. Mbwino oyu syangabya ini Kristo?”
30 Mubalhua omwa tawuni, bamatsuka eriasa eyo ali.
31 Okwa ndambi eyo, abigha babya ibanemumuhathikana bathi: “Rabbi, ulya.”
32 Aliwe mwababwira athi: “Nganawithe ebyalya eby’erirya ebya muthasi.”
33 Neryo abigha mubayibughako bathi: “Sihali oyuwabirimulethera eky’erirya, kwa bithe?”
34 Yesu mwababwira athi: “Ebyalya byaghe ly’erikolha erisonda ly’oyuwanyithuma n’erighunza omubiiri wiwe.
35 Simuli bugha muthi hakisiya mezi ani erighesa iryahika? Lebaya! ngababwira: Musumbe ameso wenyu mwanalhangira ngoku amalima abiryera ni w’erighesa.
36 Omughesi anemuhebwa obuhingyi n’erihindania ebighuma busana n’engebe y’erikotha, nuku omubibi n’omughesi banga tsemera haghuma.
37 Busana n’eki, ebinywe bino bihikire: Omughuma ni mubibi n’owundi ni mughesi.
38 Munabathuma eriyaghesa ebyo muthabiba. Abandi mubakolha omubiiri, nenyu mukaghasirawa omwa kaghalha kabo.”
39 Abangyi b’okw’Abasamaria erilhua omwa tawuni eyo mubamwikirirya busana n’ebinywe by’omukali oyuwaha obwema athi: “Mwakambwira ebyosi ebyo nakolha.”
40 Neryo Abasamaria babere bahika ahali Yesu, mubamusaba bathi abye nabo, neryo mwabya nabo ahabw’ebiro bibiri.
41 Neryo abandi bangyi mubikirirya busana n’eby’abugha,
42 kandi mubabwira omukali bathi: “Ebya wulyathubwira bisa si by’ebyamaleka ithwikirirya; kundi thwamabiriyowira n’eriminya ngoku omulhume oyu kwenene ni mulhamya w’ekihugho.”
43 Enyuma w’ebiro bibiri, mwalhua eyo amaghenda e Galilaya.
44 Aliwe Yesu iyuwene-wene mwaha obwema ngoku omuminyereri syalisikibawa ewabo.
45 Neryo abere ahika e Galilaya, Abanya Galilaya mubamwangirira, kundi babya ibabirilhangira ebyosi eby’akolha e Yerusalemu okwa mukonga, kundi nabo mubaghenda okwa mukonga.
46 Neryo mwasuba e Kana ye Galilaya, eyo ahindulha amaghetse mwa vini. Neryo e Kapernaumu yabya omukulhu w’omwa kikali oyo mughalha wiwe aby’alhwere.
47 Omulhume oyu abere akowa ngoku Yesu amabirighenda e Galilaya akalhua e Yudea, mwaghenda eyo ali, amamusaba athi ase alhamaye mughalha wiwe, kundi abya iniakayaholha.
48 Aliwe Yesu mwamubwira athi: “Inywe bandu mwamathendi lhangira ebiminyikalho n’ebikaswekaya, isimwend’ikirirya.”
49 Omukulhu w’omwa kikali mwamubwira athi: “Mukama, asa omwana waghe athali aholha.”
50 Yesu mwamubwira athi: “Ghenda; mughalha wawu abirilhama.” Omulhume mwikirirya ebya Yesu amubwira neryo amaghenda.
51 Aliwe abere anemwandaghalha, abaghombe biwe mubamweya bakasyamubwira ngoku mughalha wiwe abirilhama.
52 Neryo mwababulya ng’alyalhama saha singahi. Mubamusubirya bathi: “Ekihuhania kiwe kyalhama muligholho saha musanju.”*
53 Neryo thatha w’omwana mwaminya ngoku eyo y’esaha eyo Yesu amubwiriramo athi: “Mughalha wawu abirilhama.” Neryo iyo n’ab’eka yiwe abosi mubikirirya.
54 Eki ky’ekiminyikalho kyakabiri ekya Yesu akolha omughulhu alhua e Yudea akasa e Galilaya.
Emyatsi Ahikwa
^ Kutse “engununuko.”
^ Ni bugha ambu, saha nga 6 sy’erithungyi.
^ Ni bugha ambu, saha nga 7 esy’erithungyi.
