Engulhu Yuwene Ngoku Yahandikawa na Yohana 5:1-47
5 Enyuma w’ebi, muhabya omukonga w’Abayuda, na Yesu mwahethukira e Yerusalemu.
2 E Yerusalemu, okwa Lhukyo lhw’Esyombuli kuli ekidiba ekikahulhawamo Betzata omwa Kihebrania, ekiriko esyobbalaza ithano esy’esyonduhi.*
3 Abalhwere bangyi, esyondimethime, abalema n’abasanyarere ibakabya ibanaghalhamire omwa esyobbalaza esyo.
4 ——
5 Aliwe mwabya imune n’omulhume oyuwabya iniamabirighunza myaka 38 inianalhwere.
6 Yesu abere alhangira omulhume oyu inianaghalhamiremo kandi inianasi kw’amabirighunza buthuku buuli inianalhwere, mwamubulya athi: “Wunanzire iwalhama?”
7 Omulhume omulhwere mwamusubirya athi: “Mukulhu, singwithe oyuwanganyihira omwa kidiba omughulhu amaghetse akayidunga, aliwe ngabya ingabugha indi ngayayighusamo, owundi inianyitsuka embere.”
8 Yesu mwamubwira athi: “Hangana! Imaya omukeka* wawu wughende.”
9 Aho naho omulhume mwalhama, amimya omukeka* wiwe n’eritsuka erilyatha.
Ekiro ekyo yabya Sabato.
10 Neryo Abayuda mubatsuka eribwira omulhume oyulyalhamibawa bathi: “Ni Sabato, kandi sikihikire iwe eriheka omukeka.”*
11 Aliwe mwababwira athi: “Oyulyanyilhamaya yunalyambwira athi, ‘Imaya omukeka* wawu wughende.’”
12 Mubamubulya bathi: “Omulhume oyulyakubwira athi, ‘Imaya omukeka* wughende’ nindi?”
13 Aliwe omulhume oyulyalhamibawa mwathamimya omulhume oyo nga nindi, kundi Yesu abya iniabiribuliranira omwa bandu bangyi ababyaho.
14 Enyuma waho, Yesu mwamweya omwa hekalhu n’erimubwira athi: “Lebaya, wabirilhama. Wuleke erisyathasyakolha ekibi, nuku ekindu ekikalire okw’aho kireke erisyakuhikako.”
15 Omulhume mwaghenda amayabwira Abayuda ngoku Yesu yulyamulhamaya.
16 Busana n’enzumwa eyi, Abayuda mubendererya Yesu kundi aby’akakolha emyatsi eyi okwa Sabato.
17 Aliwe mwababwira athi: “Thatha waghe abiribya inianemukolha erihika na lino, naghe ngalholha embere erikolha.”
18 Eki ky’ekyaleka Abayuda ib’ongera erisondekania ngoku banga mwitha, kundi bathi eryongera okw’ithwa e Sabato, akahulha Nyamuhanga mwa Thatha wiwe, eriyilingirirania na Nyamuhanga.
19 Neryo Yesu mwababwira athi: “Kwenene ngababwira, Omughalha syanga kolha ekindu n’ekighuma okwa liwe, aliwe akakolha eby’akalhangira Thatha akakolha bisa. Kundi ebyosi ebya Oyo akakolha bya Mughalha nayu akakolha omwa mibere iyan’eyo.
20 Kundi Thatha anzire Mughalha kandi akamukanganaya ebyosi ebya iyo iyuwene-wene akakolha, kandi akendi syamukangania emyatsi eyilhabire eyi, nuku mwanga sweka.
21 Ngoku Thatha akanasubaya abaholi n’erileka ibabyaho, na Mughalha nayu akasubaya oyo anzire.
22 Kundi Thatha syalitswera mundu owosi-wosi, aliwe abiriha Mughalha y’eritswera eryosi,
23 nuku abosi banga sikya Omughalha ngoku basikirye Thatha. Oyuthesikaya Mughalha syali sikaya Thatha oyuwamuthuma.
24 Kwenene ngababwira, oyukowa ebinywe byaghe n’erikirirya Oyuwanyithuma awithe engebe y’erikotha, kandi syalitswerawa aliwe abirilhua omwa lhuholho n’eryingira omwa ngebe.
25 “Kwenene ngababwira, endambi yinemwasa kandi yabirihika, omughulhu abaholi bakendi syowa omulenge w’Omughalha wa Nyamuhanga, n’ababirimuhulikirira bakendi syasuba.
26 Kundi ngoku Thatha awithe engebe omw’iyo,* abirihamulha na Mughalha eribya n’engebe omw’iyo.
27 Kandi abirimuha obuthoki bw’eritswera, kundi ni Mughalha w’omundu.
28 Simusweke busana n’eki, kundi endambi yinemwasa omughulhu abosi abali omwa masinda w’eryibukwa bakendi syowa omulenge wiwe
29 neryo ibalhuamo, abakolha ebibuya ibalhubukira okwa ngebe, n’abakolha ebibi ibalhubukira okw’itswerwa.
30 Sinangakolha ekindu n’ekighuma okwa lyaghe. Ngatswera erikwamana ku namowa, kandi eritswera lyaghe lithunganene kundi ngasondekanaya erisonda ly’oyuwanyithuma butsira eryaghe.
31 “Ingye musa namayihera obwema, obwema bwaghe isibuhikire.
32 Hane owundi oyukanyihera obwema, kandi nganasi ngoku obwema obw’akanyihera buhikire.
33 Mwabirithuma abandu oku Yohana, kandi abiriha obwema obuhambire oko kwenene.
34 Nomwabine, sindi ligha obwema obukalhua oko mundu, aliwe ngabugha emyatsi eyi nuku mwanga lhamibwa.
35 Omulhume oyo abya tara eyikaka kandi eyikakoleraya, kandi mwabya imunanzire eritsema kutsibu omwa kyakakalha kiwe habw’akathuku kake.
36 Aliwe ngawithe obwema obulengire obwa Yohana, kundi emibiiri eya Thatha anyiha erikolha, emibiiri eya nganemukolha, yikaha obwema ngoku Thatha yuwanyithuma.
37 Na Thatha oyuwanyithuma iyuwene-wene abiriha obwema obunyihambireko. Simuli mwathowa omulenge wiwe kiro na kighuma kutse erimulhangira,
38 kandi ekinywe kiwe sikiri omw’inywe, kundi simuli kiriraya oyo athuma.
39 “Mukasekulhaya Amasako kundi mukalengekanaya muthi akendi leka imwabana engebe y’erikotha; kandi ayo* w’akaha obwema obunyihambireko.
40 Aliwe simwanzire eriasa okw’ingye nuku mwangabana engebe.
41 Sindi ligha olhukengerwa erilhua okwa bandu,
42 aliwe nganasi ndeke ngoku olhwanzo lhwa Nyamuhanga silhuli omw’inywe.
43 Nabiryasa omwa lina lya Thatha waghe, aliwe simuli nyangirira. Owundi mundu amasa omwa liwe lina, imukendi mwangirira.
44 Mwang’ikirirya muthi imunemusondaniako olhukengerwa aliwe isimuli sondekanaya olhukengerwa olhukalhua oku Nyamuhanga musa?
45 Isimwalengekanaya muthi ngendi batsongera oku Thatha; hali mughuma oyukabatsongera, ya Musa, oyo mwabirihiramo amaha.
46 Kundi nibya ku mwikirirya Musa naghe mwanganyikirirye, kundi mwahandika ebinyihambireko.
47 Aliwe mwamathend’ikirirya ebyo ahandika, mwang’ikirirya muthi ebyo ngabugha?”
Emyatsi Ahikwa
^ Kutse “Esyokolonedi ithano.”
^ Kutse “akakyingo.”
^ Kutse “akakyingo.”
^ Kutse “akakyingo.”
^ Kutse “akakyingo.”
^ Kutse “akakyingo.”
^ Kutse “awithe ekihembo ky’engebe.”
^ Ni bugha ambu, Amasako.
