Engulhu Yuwene Ngoku Yahandikawa na Yohana 6:1-71
6 Enyuma w’ebi, Yesu mwasoka Engetse ye Galilaya, kutse e Tiberia.
2 Neryo ekikumulha ky’abandu mubalholha embere erimukwama, kundi babya bakalhangira ebithiko-thiko ebyabya akakolha erilhamya abalhwere.
3 Neryo Yesu mwahethukira okwa kithwe, eyo mw’ikalha ahisi n’abigha biwe.
4 Neryo Erikyuruka, omukonga w’Abayuda abya iniakisiya iniahika.
5 Yesu abere asumba ameso wiwe n’erilhangira ngoku ekikumulha ky’abandu banemwasa eyo ali, mwabwira Filipo athi: “Ni hayi aho thukendi ghulha emiggati eyo abandu aba bakend’irya?”
6 Nomwabine, abugha ebi akanza erimulengako, kundi abya inianasi ekyo akayakolha.
7 Filipo mwamusubirya athi: “N’emiggati y’esyodinari 200 siyanga ghunza obuli mughuma w’okw’ibo, nomubangalya mwa kake-kake.”
8 Omughuma w’okwa bigha biwe, ya Anderea, mughalha wobu Simoni Petero, mwamubwira athi:
9 “Hano hane omulhwana oyuwithe emiggati ithano y’ekisusu n’ehiswe hibiri. Aliwe ebi ibyanahika abandu bosi aba?”
10 Yesu mwabugha athi: “Mubwire abandu muthi bikale ahisi.” Kundi habya ebithi bingyi omwa mwanya oyo, abandu mubikalha ahisi, omwa bandu abo mwabya abalhume nga 5,000.
11 Yesu mwimya omuggati, abere abiriha ewasingya, mwaghabiragho ababya bikere aho; mwakolha ikyan’ekyo n’okwa hiswe, n’abosi mubalya bamughutha.
12 Aliwe babere babiryughutha, mwabwira abigha biwe athi: “Mukume-kume ebitahangukirya ebiryasaka nuku sihabye ebikakwa busa.”
13 Neryo mubabikuma-kumira haghuma, bamusulya ebithiri 12 by’ebitahangukirya by’ebyasaka bakalya emiggati ithano y’ekisusu.
14 Abandu babere balhangira ekiminyikalho ekyo akolha, mubatsuka eribugha bathi: “Kwenene oyu ni Muminyereri oyuwabya w’eriasa omwa kihugho.”
15 Neryo Yesu abere aminya ngoku bakasyamuhamba n’erimuyiramo mwami, mwalhuaho amathasyasuba okwa kithwe kw’iyuwene.
16 Erigholho lyabere lyahika, abigha biwe mubandaghalira okwa ngetse,
17 neryo babere babirisambira omo bwathu, mubasokera e Kapernaumu. Bwabya ibwabirira, na Yesu abya isyali abahikako.
18 Neryo engetse yabya iyiri okw’ighunga kundi ekiyagha ekikalire kyabya ikinemuhitha.
19 Aliwe babere babirighenda mayiro* ng’isathu kutse ini, mubalhangira Yesu inianemuthandayira okwa ngetse kandi iniakayahika hakuhi n’obwathu, neryo mububaha kutsibu.
20 Aliwe mwababwira athi: “Ningye; simubahe!”
21 Neryo mubaligha erighenda nayu omo bwathu, aho naho obwathu mubwahika okwa musike eyo bakaya.
22 Ekiro ekyakwamako, abandu bangyi ababya ibabirisighalha okwa wundi musirya w’engetse kandi ababya ibabirilhangira ngoku habya obwathu buke bughuma busa, mubaminya ngoku Yesu mwathaghenda n’abigha biwe omwa bwathu obo, aliwe ngoku abigha biwe mubaghenda ibobene.
23 Aliwe amathu awalhua e Tiberia, mwahika hakuhi n’omwanya ogho baliramo emiggati Omukama ab’iha ewasingya.
24 Neryo abandu bangyi babere balhangira ngoku Yesu kutse abigha biwe sibaliho, mubasambira omo mathu wabo bamaghenda e Kapernaumu eriyasondya Yesu.
25 Babere bamweya okwa musirya w’engetse, mubamubulya bathi: “Rabbi, wulyahika eno ya saha yahi?”
26 Yesu mwabasubirya athi: “Kwenene ngababwira, mukanyisondaya butsira kundi mumwalhangira ebiminyikalho, aliwe kundi mumwalire okwa miggati mwamughutha.
27 Simukolere ebyalya ebikatsanda, aliwe mukolere ebyalya ebikabyaho busana n’eriha engebe y’erikotha, ebya Omughalha w’omundu akendi baha; kundi oyu yo Thatha, Nyamuhanga iyuwene-wene, abirihamyako kw’akamutsemera.”
28 Neryo mubamubulya bathi: “Thutholere ithwakolhaki nuku thukole emibiiri ya Nyamuhanga?”
29 Yesu mwabasubirya athi: “Emibiiri ya Nyamuhanga y’eno, yithi mw’ikiriraye oyo athuma.”
30 Neryo mubamubulya bathi: “Ni kiminyikalho kyahi ekya wukayakolha, nuku thwanga kilhangira kandi thwanakw’ikirirya? Ni mubiiri wahi owawukakolha?
31 Abathatha-kulhu wethu mubalya emana omo mbwarara, ngoku kihandikire kithi: ‘Mwabaha omuggati ow’erirya erilhua elhubulha.’”
32 Neryo Yesu mwababwira athi: “Kwenene ngababwira, Musa mwathabaha omuggati owalhua elhubulha, aliwe Thatha waghe akabaha omuggati w’okwenene erilhua elhubulha.
33 Kundi omuggati wa Nyamuhanga y’oyuwandaghalha erilhua elhubulha n’eriha engebe okwa kihugho.”
34 Neryo mubamubwira bathi: “Mukama, wubye wukathuha omuggati oyu.”
35 Yesu mwababwira athi: “Ingye indi muggati w’engebe. N’oyukasa okw’ingye syendi syakwa enzalha nahake, n’oyukanyikiriraya syendi syakwa enyotha nahake.
36 Aliwe ngoku nganababwira, nibya mwabirinyilhangira aliwe simulikiriraya.
37 Abosi abo Thatha akanyiha bakasa okw’ingye, kandi singendi syathibitha ok’oyukasa okw’ingye;
38 kundi nandaghalha erilhua elhubulha erikolha erisonda ly’oyuwanyithuma butsira eryaghe.
39 Eri ly’erisonda ly’oyuwanyithuma, athi isinaheraya n’omughuma w’okw’abosi abo abir’imba, aliwe athi ngatholere ingabalhubukya okwa kiro ky’erighunzerera.
40 Kundi eri ly’erisonda lya Thatha waghe, athi obuli mundu oyukaminya Mughalha n’erimwikirirya atholere iniabana engebe y’erikotha, kandi ngendi syamulhubukya okwa kiro ky’erighunzerera.”
41 Neryo Abayuda mubatsuka eriyineghenia okw’iyo kundi mwabugha athi: “Ingye indi muggati owandaghalha erilhua elhubulha.”
42 Neryo mubatsuka eribugha bathi: “Mbwino oyu si Yesu mughalha wa Yozefu, oyo thunasi thatha wiwe na mama wiwe? Neryo akathoka athi eribugha athi, ‘Nandaghalha erilhua elhubulha’?”
43 Yesu mwababwira athi: “Muleke eriyineghenia.
44 Sihali omundu oyuwangasa okw’ingye, Thatha oyuwanyithuma athalyamuletha, kandi ngendi syamulhubukya okwa kiro ky’erighunzerera.
45 Abaminyereri mubahandika bathi: ‘Yehova akendi syakangirirya abosi.’ Obuli mundu oyuwabirihulikirira Thatha n’er’igha akasa okw’ingye.
46 Sihali mundu oyuwabirilhangira Thatha, ya n’oyuwalhua eyiri Nyamuhanga; oyu abirilhangira Thatha.
47 Kwenene ngababwira, oyukikiriraya akendi syabana engebe y’erikotha.
48 “Ingye indi muggati w’engebe.
49 Abathatha-kulhu wenyu mubalya emana omo mbwarara aliwe mubaholha.
50 Ono w’omuggati owandaghalha erilhua elhubulha, nuku owosi-wosi angalya kugho kandi aleke erisyaholha.
51 Ingye indi muggati owaliho owandaghalha erilhua elhubulha. Omundu wosi-wosi amalya okwa muggati oyu iniakendi syabyaho kera na kera; kandi kwenene, omuggati ogho ngendiha busana n’engebe y’ekihugho w’omubiri waghe.”
52 Neryo Abayuda mubatsuka erikubisania obuhaka bathi: “Omulhume oyu angathuha athi omubiri wiwe athi thulyegho?”
53 Yesu mwababwira athi: “Kwenene ngababwira, mwamathendirya omubiri w’Omughalha w’omundu n’erinywa omusasi wiwe, isimuwithe engebe.
54 Oyukalya okwa mubiri waghe n’erinywa okwa musasi waghe awithe engebe y’erikotha, kandi ngendi syamulhubukya okwa kiro ky’erighunzerera;
55 kundi omubiri waghe ni byalya by’okwenene n’omusasi waghe ni ky’erinywa ky’okwenene.
56 Oyukalya okwa mubiri waghe n’erinywa okwa musasi waghe akasighalha iniane bughuma naghe, naghe ingane bughuma nayu.
57 Ngoku Thatha oyuliho anyithuma kandi ngoku nyiriho busana na Thatha, neryo n’oyukanyiryako akendi syabyaho busana naghe.
58 Oyu w’omuggati owandaghalha erilhua elhubulha. Syali ng’ogho abathatha-kulhu benyu balya kandi bamaholha. Oyukalya okwa muggati oyu akendi syabyaho kera na kera.”
59 Abugha emyatsi eyi inianemukangirirya omwa sinagogi* e Kapernaumu.
60 Babere bowa ebi, abangyi b’okwa bigha biwe mubabugha bathi: “Ebinywe ebi bikakukubalhaya; nindi yuwanga bihulikirira?”
61 Aliwe kundi Yesu mwaminya ngoku abigha biwe banemuyineghenia okw’eki, mwababwira athi: “Ebi byamabathwikalya?
62 Neryo ibbwa, mwamalhangira Omughalha w’omundu akahethukira eyo abya erimbere?
63 Omulimu w’akaha engebe; omubiri syawithe mughaso nahake. Ebyo namabiribabwira ni mulimu kandi ni ngebe.
64 Aliwe hane abaghuma b’okw’inywe abathikiriraya.” Kundi okw’itsuka Yesu abya inianasi abathikiriraya n’oyuwanga mughoberye.
65 Mwalholha embere eribugha athi: “Eki ky’ekyamaleka ingababwira nyithi, sihali oyuwangasa okw’ingye Thatha athalyamulighira.”
66 Busana n’eki, abangyi b’okwa bigha biwe mubasubira ebyo babya ibabirisighania neryo bamalekeraho erighenda nayu.
67 Neryo Yesu mwabwira Erikumi n’Ababiri athi: “Nenyu simwanzire erighenda?”
68 Simoni Petero mwamusubirya athi: “Mukama, thukendi ghenda okundi? Wuwithe ebinywe by’engebe y’erikotha.
69 Thwabirikirirya kandi thwabiriminya ngoku wuli Oyubuyirire wa Nyamuhanga.”
70 Yesu mwababwira athi: “Munabasombolha inywe erikumi n’ababiri, kwabithe? Aliwe omughuma w’okw’inywe ni muhangiriri.”*
71 Omo kwenene aby’akakania oku Yuda mughalha wa Simoni Iskariota, kundi oyu abya iniakayamughoberaya, nomwakine indi abya mughuma w’okwa Erikumi n’Ababiri.
Emyatsi Ahikwa
^ Kilomita ng’ithano kutse mukagha. Kinywe okwa kinywe, “stadia nga 25 kutse 30.”
^ Kutse “omw’ihindana ly’abandu banene.”
^ Kutse “diabolo.”
