Engulhu Yuwene Ngoku Yahandikawa na Yohana 7:1-52
7 Enyuma w’ebi, Yesu mwalholha embere erithimba omwa Galilaya kundi mwathanza erikolha ekyo e Yudea kundi Abayuda babya bakamusondya nuku bamwithe.
2 Aliwe Omukonga w’Abayuda ow’Amahema* abya iniakisiya iniahika.
3 Neryo baghalha babo mubamubwira bathi: “Wulhue eno wughende e Yudea, nuku abigha bawu nabo bangalhangira emibiiri eyawunemukolha.
4 Kundi sihali oyukakolha ekindu kyosi-kyosi omwa bubiso-biso amabya anzire eriminywa n’abandu. Wamabya iwunemukolha emyatsi eyi, yikanganaye omwa kihugho.”
5 Omo kwenene baghalha babo babya isibamwikirirye.
6 Neryo Yesu mwababwira athi: “Endambi yaghe siyiriyahika, aliwe eyenyu yikabya iyineho mughulhu wosi.
7 Sihali enzumwa eyanga leka ekihugho ikyabapona, aliwe kikanyipona kundi ngaha obwema obukihambireko ngoku emibiiri yakyo ni mibi.
8 Inywe muhethukire okwa mukonga; Ingye sindi nahika erihethukira okwa mukonga oyu, kundi endambi yaghe siyiriyahika ndeke.”
9 Neryo abere abiribabwira emyatsi eyi, mwasighalha e Galilaya.
10 Aliwe baghalha babo babere babirihethukira okwa mukonga, nayu mwahethukirayo bubiso-biso butsira kinyamwisi.
11 Neryo Abayuda mubatsuka erimusondya okwa mukonga, ibanemubugha bathi: “Omulhume oyo ali hayi?”
12 Neryo abandu bangyi mubatsuka eriyiburughunya kutsibu buhunu-hunu. Abandi bathi: “Ni mulhume mubuya.” Abandi bathi: “Eyihi. Akathebaya abandu bangyi.”
13 Ni kwenene, isihali oyuwanga mukaniako omwa bandu kundi ibakasagha Abayuda.
14 Omukonga abere akahika omwa kathi-kathi, Yesu mwahethukira omwa hekalhu n’eritsuka erikangirirya.
15 Neryo Abayuda mubasweka n’eribugha bathi: “Omulhume oyu akaminya athi ndeke Amasako* kandi imwathasomera okwa sukuru* yosi-yosi?”
16 Yesu mwabasubirya athi: “Ebya ngakangiriraya si byaghe, aliwe ni by’oyuwanyithuma.
17 Omundu wosi-wosi amanza erikolha erisonda Liwe, iniakendi minya ebya ngakangiriraya nga bikalhua oku Nyamuhanga kutse nga ngabugha ebyaghe.
18 Oyukabugha ebiwe akayisonderaya olhukengerwa lhwiwe; aliwe oyukasondaya olhukengerwa lhw’oyuwamuthuma, oyu ahikire kandi ebithathunganene sibiri omw’iyo.
19 Musa mwabaha Emighambo, kwa bithe? Aliwe sihali n’omughuma w’okw’inywe oyukaghondera Emighambo. Busana naki mukanza erinyitha?”
20 Abandu bangyi mubasubirya bathi: “Wuli kw’embinga. Nindi oyukanza erikwitha?”
21 Yesu mwabasubirya athi: “Munakolha kindu kighuma, kandi inywe bosi mwabirisweka.
22 Busana n’enzumwa eyi, Musa abiribaha omughambo w’eribanibwa—si bugha indi akalhua oku Musa, aliwe akalhua oko bathatha-kulhu—kandi mukabanaya omundu okwa sabato.
23 Omundu amabya iniakabanibawa okwa sabato nuku Emighambo ya Musa siyithwibawe, mukanyihithanako kutsibu kundi mungalhamaya omundu okwa sabato?
24 Muleke eritswera busana n’emisosere y’eyihya, aliwe mutswere omw’itswera erithunganene.”
25 Neryo abaghuma b’okwa bikalhani be Yerusalemu mubatsuka eribugha bathi: “Oyu y’omulhume oyo bakasondaya nuku bamwithe, kwabithe?
26 Aliwe lebaya! anemukanirya omwa bandu, kandi sibathamukolhaki. Mbwino abathabali babirilengekania bathi oyu ni Kristo?
27 Aliwe ithwe, thunasi eyo omulhume oyu akalhua; kandi Kristo akendi syabya akasa, sihali n’oyukendi syaminya eyo akalhua.”
28 Neryo Yesu abere anemukangirirya omwa hekalhu, mwabugha athi: “Munanyasi kandi munasi eyo ngalhua. Kandi sinasa okwa lyaghe, aliwe Oyuwanyithuma aneho, kandi simumwasi.
29 Ingye nganamwasi, kundi ngali muthumwa erilhua eyo ali kandi Oyo yuwanyithuma.”
30 Neryo mubanza erimuhamba, aliwe sihali n’oyuwamuthulhako, kundi endambi yiwe yabya isiyiriyahika.
31 Nomwabine, abandu bangyi mubamwikirirya, kandi mubabugha bathi: “Kristo akendi syabya akasa, syendi syakolha ebiminyikalho ebilhabire okwa ebya omulhume oyu abirikolha, kwabithe?”
32 Abafarisayo mubowa abandu bangyi bakamuyinegheniako ebi, neryo abahereri bakulhu n’Abafarisayo mubathuma abapolisi eriyamuhamba.
33 Neryo Yesu mwabugha athi: “Ngendibya nenyu ahabw’obuthuku buke ngathe ngaghenda eyiri Oyuwanyithuma.
34 Mukendi syanyisondya aliwe simwendi syanyibana, n’aho nyiri simwangahikaho.”
35 Neryo Abayuda mubayibughako bathi: “Omulhume oyu akanza erighenda hayi eyo thuthe thwanga mubana? Syatheghekire erighenda eyiri Abayuda abayitsatsangire omwa Bagiriki nuku ayakangiriraye Abagiriki, kwabithe?
36 Akamanyisayaki akabugha athi, ‘Mukendi syanyisondya, aliwe simwendi syanyibana, n’aho nyiri simwangahikaho’?”
37 Okwa kiro ky’erighunzerera, ekiro kinene ky’omukonga, Yesu mw’imana n’eribugha athi: “Owosi-wosi amabya iniakwire enyotha, ase okw’ingye ananywa.
38 Oyukanyikiriraya, ngoku amasako abiribugha: ‘Omw’iyo esyongununuko sy’amaghetse syasasenda.’”
39 Aliwe, abugha ebi akakania okwa mulimu, ogho abakamwikiriraya babya ibakayabana; kundi habya isihali habya mulimu, kundi Yesu abya isyali ahebwa olhukengerwa.
40 Abaghuma b’okwa bandu bangyi abowa ebinywe ebi mubatsuka eribugha bathi: “Oyu kwenene ni Muminyereri.”
41 Abandi babya bakabugha bathi: “Oyu ni Kristo.” Aliwe abandi bathi: “E Galilaya iyanalhua Kristo?
42 Lero amasako syali bugha athi Kristo akendi syalhua omwa lhubutho lhwa Dawudi n’erilhua e Betelehemu, ekyalu ekyo Dawudi alhuiremo?”
43 Neryo muhabya erighabulhana busana nayu.
44 Neryo abaghuma b’okw’ibo mubanza erimuhamba, aliwe muhathabya n’oyukamuthulhako.
45 Neryo abapolisi mubasuba okwa bahereri bakulhu n’Abafarisayo, neryo Abafarisayo mubababulya bathi: “Busana naki simuthamuletha?”
46 Abapolisi mubasubirya bathi: “Sihali hathabya omundu oyukabugha athya.”
47 Neryo Abafarisayo mubabugha bathi: “Nenyu simwanganabya imwabirithebwa?
48 Ka sihali n’omughuma w’okwa bathabali kutse ow’okw’Abafarisayo oyuwabirimwikirirya, mbwino aneho?
49 Aliwe abandu bangyi aba abathasi Emighambo ni bathakirwa.”
50 Nikodemo oyuwabya iniabirihika oku Yesu ahanyumaho kandi omughuma w’okw’ibo, mwababwira athi:
51 “Ebilhaghiro byethu sibiritswera omundu bithethatsuka eriowa eby’akabugha n’eriminya eby’akakolha, kwabithe?”
52 Mubamusubirya bathi: “Nawu ka siwulilhua e Galilaya, kwabithe? Musekulhaye mwanalhangira ngoku e Galilaya siyangalhua omuminyereri.”
Emyatsi Ahikwa
^ Kutse “Ebibbanda.”
^ Kinywe okwa kinywe, “ebihandikire.”
^ Ni bugha ambu, amasukru w’abarabbi.
