Engulhu Yuwene Ngoku Yahandikawa na Yohana 8:12-59
8 12 Kandi Yesu mwababwira athi: “Ingye indi kyakakalha ky’ekihugho. Oyukanyikwama syendi syalendera omwa mwirima nahake, aliwe akendi syabana ekyakakalha ky’engebe.”
13 Neryo Abafarisayo mubamubwira bathi: “Wukayihera obwema; obwema bwawu si bw’okwenene.”
14 Yesu mwababwira athi: “Nomunangayihera obwema, obwema bwaghe ni bw’okwenene, kundi nganasi eyo nalhua n’eyo ngaya. Aliwe simwasi eyo nalhua n’eyo ngaya.
15 Mukatswera erikwamana n’ebihano by’abandu; ingye sinditswera mundu nahake.
16 Kandi nomunangatswera, eritswera lyaghe ni ry’okwenene, kundi sindi ingyuwene, aliwe Thatha oyuwanyithuma ane haghuma naghe.
17 Kandi n’omwa Mighambo yenyu, kihandikire kithi: ‘Obwema bw’abandu babiri ni bw’okwenene.’
18 Ingye ngayihera obwema, na Thatha oyuwanyithuma nayu akanyihera obwema.”
19 Neryo mubamubulya bathi: “Thatha wawu ali hayi?” Yesu mwabasubirya athi: “Simunyasi kandi simwasi Thatha waghe. Ku mwabya imunanyasi, mwangaminyire na Thatha waghe.”
20 Abugha ebinywe ebi iniane ahali akasanduku k’erithogheryamo akakangirirya omwa hekalhu. Aliwe sihali n’omughuma oyuwamuhamba, kundi endambi yiwe yabya isiyiriyahika.
21 Neryo kandi mwababwira athi: “Ngaghenda, kandi mukendi syanyisondya, nomwabine, mukendi syaholera omwa bibi byenyu. Eyo ngaghenda simwangahikayo.”
22 Neryo Abayuda mubatsuka eribugha bathi: “Syendiyitha, kwabithe? Kundi akabugha athi, ‘Eyo ngaya, simwangahikayo.’”
23 Mwalholha embere eribabwira athi: “Inywe muli b’eyikwa; ingye indi w’endatha. Inywe muli b’ekihugho kino; ingye sindi w’ekihugho kino.
24 Ekyo ky’ekiryaleka ingababwira nyithi: Mukendi syaholera omwa bibi byenyu. Kundi mwamathend’ikirirya ku n’ingye iyo, imukendi syaholera omwa bibi byenyu.”
25 Neryo mubatsuka erimubwira bathi: “Wulindi? Yesu mwabasubirya athi: “Busana naki ngakinatsandaya obuthuku erikania nenyu?
26 Ngawithe myatsi mingyi ey’erikania eyibahambireko n’ey’eritswera. Kundi kwenene Oyuwanyithuma ni w’okwenene, n’emyatsi eyo n’owa okw’iyo yangakaniraya omwa kihugho.”
27 Mubathaminya kw’akabakaniraya oku Thatha.
28 Neryo Yesu mwabugha athi: “Mukendisyabya mwabirihanika Omughalha w’omundu y’endatha, neryo mukendi syaminya ku n’ingye iyo kandi ngoku sindi kolha ekyosi-kyosi okwa lyaghe; aliwe emyatsi eyi ngabughayo ngoku Thatha ananyikangiriraya.
29 N’Oyuwanyithuma ane haghuma naghe; mwathanyisigha ingyuwene, kundi mughulhu wosi ngakolha ebikamutsemesaya.”
30 Abere anemubugha emyatsi eyi, abandu bangyi mubamwikirirya.
31 Neryo Yesu mwalholha embere eribwira Abayuda ababya ibabirimwikirirya athi: “Mwamalholha embere erikenga ebinywe byaghe, kwenene imuli bigha baghe,
32 kandi mukendi minya ekwenene, n’ekwenene yikendi bayira bwiranda.”
33 Mubamusubirya bathi: “Thuli baana ba Abrahamu kandi sithuli thwathabya bakobe b’omundu wosi-wosi. Neryo wukathoka wuthi eribugha wuthi, ‘Mukendibya bwiranda’?”
34 Yesu mwabasubirya athi: “Kwenene ngababwira, obuli mundu oyukakolha ekibi ni mukobe w’ekibi.
35 Kundi nibya omukobe syalibya omwa nyumba ya mukama wiwe kera na kera; omughalha akabyamo kera na kera.
36 Neryo Omughalha amabayira bwiranda, kwenene imukendibya bwiranda.
37 Nganasi ku muli baana ba Abrahamu. Aliwe mukanza erinyitha, kundi ebinywe byaghe sibiwithe mwanya omo mithima yenyu.
38 Ngabugha emyatsi eyo nabirilhangira ingane na Thatha waghe, aliwe inywe mukakolha emyatsi eyo mwabiriowa oku thatha wenyu.”
39 Mubamusubirya bathi: “Thatha wethu ni Abrahamu.” Yesu mwababwira athi: “Ku mwabya baana ba Abrahamu, mwangabere mukakolha emibiiri ya Abrahamu.
40 Aliwe lino mukanza erinyitha, omulhume oyuwabiribabwira ekwenene eyo n’owa oku Nyamuhanga. Abrahamu mwathakolha eki.
41 Mukakolha emibiiri ya thatha wenyu.” Mubamubwira bathi: “Sithuli baana b’obusingiri;* thuwithe Thatha mughuma, Nyamuhanga.”
42 Yesu mwababwira athi: “Nyamuhanga kwabya ini Thatha wenyu, mwanga nyanzire, kundi nalhua eyiri Nyamuhanga kandi ngye yono hano. Sinasa okwa lyaghe, aliwe Oyo yuwanyithuma.
43 Busana naki simuli yitheghereraya ebya ngabugha? Kundi simwanga hulikirira ekinywe kyaghe.
44 Inywe mukalhua oku thatha wenyu Diabolo, kandi mwanzire erikolha eriyisunza lya thatha wenyu. Oyo abya mwithi erilhua okwa nzuko, kandi mwathasighalha omwa kwenene, kundi ekwenene siyiri omw’iyo. Omughulhu akabugha amabehi, akabugha erikwamana n’amalengekania wiwe, kundi ni mubehi kandi ni thatha w’amabehi.
45 Aliwe ingye, ngababwira ekwenene, simuli nyikiriraya.
46 Okw’inywe nindi oyuwanga nyibana kw’ekibi? Namabya iningabugha okwenene, busana naki simuli nyikiriraya?
47 Oyukalhua oku Nyamuhanga akahulikirira ebinywe bya Nyamuhanga. Eki ky’ekikaleka imuthahulikirira, kundi simulilhua oku Nyamuhanga.”
48 Abayuda mubamusubirya bathi: “Mbwino sithuhikire thukabugha thuthi, ‘Wuli Musamaria kandi wuli kw’embinga’?”
49 Yesu mwabasubirya athi: “Sindi kw’embinga, aliwe ngasikaya Thatha waghe, kandi inywe simuli nyisikaya.
50 Aliwe sindi yisonderaya olhukengerwa; hali Oyukanyisonderayalho kandi yukatswera.
51 Kwenene ngababwira, omundu amaghendera okwa binywe byaghe, isyendi syaholha nahake.”
52 Abayuda mubamubwira bathi: “Lino thwamabiriminya ku wuli kw’embinga. Abrahamu mwaholha, n’abaminyereri, aliwe wuthi, ‘Omundu amaghendera okwa binywe byaghe, isyendi syaholha nahake.’
53 Siwulengire thatha wethu Abrahamu, oyuwaholha. N’abaminyereri mubaholha. Wukabugha wuthi wulindi?”
54 Yesu mwasubirya athi: “Namayiha olhukengerwa, olhukengerwa lhwaghe ini buyira. Thatha waghe yukanyiha olhukengerwa, oyo mukabugha muthi ni Nyamuhanga wenyu.
55 Nomwabine simuli mwathamuminya, aliwe ingye nganamwasi. Kandi ku nabugha indi singamwasi, nangabere ng’inywe, omubehi. Aliwe nganamwasi kandi ngaghondera ebinywe biwe.
56 Thatha wenyu Abrahamu mwatsemera kutsibu omulhaghe w’erisyalholha okwa kiro kyaghe, kandi mwakilholhako, amatsema.”
57 Neryo Abayuda mubamubwira bathi: “Iwe wuthe wahikya n’emyaka 50, wabirilholha oku Abrahamu?”
58 Yesu mwababwira athi: “Kwenene ngababwira, Abrahamu athali abyaho, ingye nabya inganeho.”
59 Neryo mubasongya amabwe nuku bamughuse w’oko, aliwe Yesu mwabisama neryo amalhua omwa hekalhu.
Emyatsi Ahikwa
^ Omwa Lhugiririki Porneia. Lebaya Erisoborera Ebinywe.
