Engulhu Yuwene Ngoku Yahandikawa na Yohana 9:1-41
9 Yesu abere akalhaba, mwalhangira omulhume oyuwabuthawa mwa ndimethime.
2 Neryo abigha biwe mubamubulya bathi: “Rabbi, omulhume oyu eributhwa mwa ndimethime, nindi yuwakolha erilholho, n’iyo kutse ababuthi biwe?”
3 Yesu mwasubirya athi: “Omulhume oyu mwathakolha erilholho kutse ababuthi biwe, aliwe eki kyabya nuku emibiiri ya Nyamuhanga yanga minyikalha erilhabira omw’iyo.
4 Thutholere ithwakolha emibiiri y’Oyuwanyithuma ibukinakere; kundi obuthuku bukayira omughulhu sihali oyuwangakolha.
5 Namabiribya ingane omwa kihugho, ngali kyakakalha ky’ekihugho.”
6 Abere abiribugha ebi, mwathwira ebithandi by’okwa kithaka n’eribikolhamo ehyondo, neryo amahaka ehyondo okwa meso w’omulhume
7 neryo mwamubwira athi: “Ghenda wuyanabire omwa kidiba kye Siloamu” (ekikahindulhawa mwa “Erithumwa”). Neryo mwaghenda, amayanaba, neryo amasubulha inianemulhangira.
8 Neryo abaliranwa n’ababya bakabera erimulhangira akasabirirya mubatsuka eribugha bathi: “Oyu si y’omulhume oyuwabya ak’ikalha n’erisabirirya, kwabithe?”
9 Abandi mubabugha bathi: “N’iyo.” N’abandi bathi: “Eyihi, aliwe amusosire.” Omulhume mwabera eribugha athi: “Ka n’ingye.”
10 Neryo mubamubulya bathi: “Neryo ameso wawu mwakalibukalha athi?”
11 Mwasubirya athi: “Omulhume oyukahulhawamo Yesu mwakakolha ehyondo, amahihaka okwa meso waghe n’erinyibwira athi, ‘Wughende e Siloamu wunabe.’ Neryo mungaghenda, namanaba, neryo namalhangira.”
12 Neryo mubamubulya bathi: “Omulhume oyo alihayi?” Mwasubirya athi: “Singasi.”
13 Neryo mubathwalha omulhume oyulhue ndimethime oyo eyiri Abafarisayo.
14 Kandi ekiro Yesu akolha ehyondo n’erilibulha ameso wiwe yabya Sabato.
15 Neryo okwa ndambi eyo n’Abafarisayo mubatsuka eribulya omulhume ameso wiwe nga mwakalibukalha athi. Mwababwira athi: “Mwakahaka ehyondo hy’okwa meso waghe, namayanaba, neryo namalhangira.”
16 Neryo abaghuma b’okwa Bafarisayo mubatsuka eribugha bathi: “Omulhume oyu syalilhua oku Nyamuhanga, kundi syalisikaya Esabato.” Abandi bathi: “Omukolha-nabi angathoka athi erikolha ebiminyikalho by’omulingo oyu?” Neryo muhabya erighabulhana omwa kathi-kathi kabo.
17 Kandi mubabulya omulhume endimethime bathi: “Wukamubughako wuthiki, kundi mwakalibulha ameso wawu?” Omulhume mwabugha athi: “Ni muminyereri.”
18 Aliwe, Abayuda mubath’ikirirya ngoku omulhume oyo abya ndimethime kandi kw’abirilhangira, erihika aho babirikirira ababuthi b’omulhume oyuwabya iniabirilhangira.
19 Neryo mubababulya bathi: “Oyu nina mwana wenyu oyo mukabugha muthi abuthawa mwa ndimethime? Neryo lino akalhangira athi?”
20 Ababuthi biwe mubasubirya bathi: “Thunasi ngoku oyu ni mwana wethu kandi ngoku abuthawa mwa ndimethime.
21 Aliwe lino ng’akalhangira athi, sithwasi; kutse nga nindi yuwalibwire ameso wiwe, sithumwasi. Mumubulhaye. Akulire. Atholere iniayibughira.”
22 Ababuthi biwe babugha ebi kundi babya bakasagha Abayuda, kundi Abayuda babya ibabirisangwa balighirana bathi owosi-wosi oyukamuligha ku ni Kristo, omundu oyo atholere iniahighithwa omwa sinagogi.
23 Eki ky’ekyaleka ababuthi biwe ibabugha bathi: “Akulire. Mumubulhaye.”
24 Neryo omurundi wakabiri mubabirikira omulhume oyuwabya ndimethime n’erimubwira bathi: “Wuhe Nyamuhanga y’olhukengerwa; thunasi ngoku omulhume oyu ni mukolha-nabi.”
25 Mwasubirya athi: “Mbulha ni mukolha-nabi, ingye singasi. Ekya ngasi, nabya ndimethime, aliwe lino ngalhangira.”
26 Neryo mubamubulya bathi: “Mwakakukolha kwaki? Mwakalibulha athi ameso wawu?”
27 Mwabasubirya athi: “Nabiribabwira, aliwe simwathahulikirira. Busana naki mwanzire ingathasyabasubiramo? Inywe simwanzire eribya bigha biwe, kwa bithe?”
28 Neryo omw’imuhemya-hemya mubabugha bathi: “Wuli mwigha w’omulhume oyo, aliwe ithwe thuli bigha ba Musa.
29 Thunasi ngoku Nyamuhanga aby’akakania na Musa, aliwe sithwasi omulhume oyu ng’alhua hayi.”
30 Omulhume mwabasubirya athi: “Omo kwenene eki kikaswekaya, inywe eribya isimwasi eyo alhuire, kandi iniabirilibulha ameso waghe.
31 Thunasi ngoku Nyamuhanga syalihulikirira abakolha-nabi, aliwe omundu wosi-wosi oyuk’ubaha Nyamuhanga n’erikolha erisonda liwe, oyo y’akahulikirira.
32 Eritsuka kera sikirikyathowibwa indi omundu mwalibulha ameso w’omundu oyuwabuthawa mwa ndimethime.
33 Omulhume oyu kwabya isyalilhua ewa Nyamuhanga, syawithe eky’angakolire.”
34 Mubamubwira bathi: “Iwe wabuthawa omwa kibi, nawu wuthi wuli kuthukangirirya?” Neryo mubamughusa eyihya!
35 Yesu mw’owa ngoku babirimughusa eyihya, neryo abere amweya, mwamubulya athi: “Wun’ikirirye Omughalha w’omundu?”
36 Omulhume mwasubirya athi: “Mukulhu, nayu nindi, nuku nangamw’ikirirya?”
37 Yesu mwamusubirya athi: “Wabirimulhangira, kandi kwenene, y’oyunemukania nawu.”
38 Mwabugha athi: “Namamw’ikirirya, Mukama.” Neryo mwamunamira.
39 Neryo Yesu mwamubwira athi: “Busana n’eritswera eri, munasa omwa kihugho kino, nuku abathelhangira bangalhangira n’abakalhangira bangabya ndimethime.”
40 Abaghuma b’okwa Bafarisayo ababya nayu mub’owa emyatsi eyi, neryo bamamubwira bathi: “Ithwe sithuli ndimethime, kwa bithe?”
41 Yesu mwababwira athi: “Ku mwabya ndimethime, mwangabere isimuwithe kibi. Aliwe lino mukabugha muthi, ‘Thukalhangira.’ Ekibi kyenyu kikabasighalhako.”
