Nakulira e Los Angeles, California, U.S.A., omwa malhambu aw’abyamo esyombalhu esyasibwe busana n’abayaya n’ebibatsi ebikathamiraya. Ababuthi baghe babya bawithe abaana mukagha, n’ingye nabya wakabiri.

Erilhua bulere, mama iniakathuthwalha okwa kisomo. Aliwe, ng’omulengwa munabya omwa ngebe ibiri. Kyasande ining’imba omwa kwaya y’ekanisa. Okwa bindi biro by’ewiki, iningabya omwa syadisko, erinywa ebibatsi ebikathamiraya, n’erikolha eby’obusingiri.

Ingali w’ekinigha kinene kandi ekikalire. Iningakolesaya ekyosi-kyosi ng’ekindu ky’amalhwa erithoka erisinga. Ebya n’igha okwa kanisa mubithangwathikya. Ingabeghere eribugha indi, “Eritswera ni ly’Omukama​—kandi n’ingye akakolesaya!” Ingane omwa siniya okw’ihwererera ly’emyaka ya 1960, munanza ekigurupu ekyabya kikahulhwamo Black Panthers, egurupu y’ekipolitiki eyabya yikakolesya enzira y’amalhwa erilhwira okwa bughabe bw’abandu. Munayiyunga okwa gurupu y’abanya sukuru abakalhwira okwa bughabe bw’abandu. Mirundi mingyi ithukayisamambulha, obuli murundi esukuru iyikakingawa habw’obuthuku buke.

Eriyisamambulha mulyabya ngasiryathughuthya omuthima waghe w’obubi. Neryo munatsuka erisangira omw’ikolha ebindu ebithuwene habw’eripona abandi. Ng’eky’erileberyako, kiro kighuma, ingye n’abanywani baghe muthwalebya esyofilimu esikakanganaya ngoku kera abakobe Abaafirika mubaghalibwa omwa United States. Muthwahithana kutsibu busana n’obuthe bulingirirania obo, thwamahindukira abasungu eminyethu abo thwabya nabu omwa sinema. Muthwaghenda omwa butaka bwethu omuli abasungu, thukasondya abandi b’eriswirya.

Ingakisiya ingalhua omwa bulengwa, ingye na baghalha bethu thwabya ithuli kw’ikolha ebibi ebikalire-kalire. Ab’obuthoki ibakabya ibanemuthusondya. Ingye na mughalha wethu omulere thwabya omwa kigurupu ky’abayaya ekikalire kutsibu. Engebe yaghe yabya iyiri okwongoberera kutsibu omwa bubi.

Ababuthi ba munywani waghe babya Bema ba Yehova. Mubanyikokya okwa mihindano yabu, kandi munaligha. Okw’inatsuka, munalhangira ngoku Abema bali mbaghane. Obuli mundu abya iniane ne Biblia kandi mubakolesyayo omwa mihindano. Nibya n’abalere mubaha ebitsweka omwa mihindano! Munatsema ingaminya ngoku Nyamuhanga anawithe erina, Yehova, kandi ingalyowa likakolesibwa. (Esyonyimbo 83:18, NWT) Ekithunga kyabya mw’abandu b’ebihanda bingyi, aliwe isimuli kasolholho k’erangyi.

Erimbere, mungathanza erigha e Biblia n’Abema, aliwe munanza emihindano yabu. Kiro kighuma, ingane okwa mihindano y’Abema ba Yehova, egurupu y’abanywani baghe mubaghenda okwa kosati. Eyo mubaswirya omulengwa erihika okw’imw’itha habw’erighanira ejaketi yiwe ey’engobi. Ekiro ekyakwamako mubayipanga busana n’er’itha eryo. Nibya ibane n’omwa koti mubalengekania bathi ekibi kyabu ekyo sikinene. Abangyi b’okw’ibo mubatswerwa n’eribohwa maisya. Omo kwenene munatsema habw’eribya isingabya nabu ekiro ekyo. Munathwamu erihindulha engebe yaghe n’eritsuka erigha e Biblia.

Kundi nabya ingabirilhangira akasolholho kanene k’erangyi, ebya nalhangira omwa Bema ba Yehova mubyanyiswekya. Ng’eky’erileberyako, Omwema omusungu abere akaghenda omwa bihugho by’eyihya, mwasighira abaana biwe b’eka y’abiraghulhu. N’ekindi, efamile y’abasungu muyikalha n’omulhwana omwiraghulhu oyuwabya akayithagha ah’erikalha. Munaligha ngoku Abema ba Yehova babakaghendera okwa binywe bya Yesu ebiri omu Yoane 13:35: “Neryo mwamabya n’olhwanzo, omughuma busana n’owundi, abandu abosi basyaminya ko muli bigha baghe.” Munaminya ku nabiribana olhughanda lhw’abalikyethu olhw’ekwenene.

Busana n’erigha e Biblia, munatsuka eriminya ngoku ngatholere ingahindulha amalengekania waghe. Munabya w’erihindulha amalengekania waghe nuku ngabye mundu w’obuholho kandi munalhangira ngoku eyi y’engebe eyuwene. (Abanya Roma 12:2) Lyolho-lyolho, munakolha esyombinduka. Omwa 1974 Okwokubanza, munabatizibwa ng’omughuma w’okwa Bema ba Yehova.

Aliwe nibya n’enyuma w’eribatizibwa, nabya ingakinalholha embere erikolha okwa kinigha kyaghe. Ng’eky’erileberyako, buthuku bughuma thukalhua omw’ithulira nyumba okwa nyumba, munathibitha okwa mwibi iniamabiriba eradiyo y’omwa matoka yaghe. Nabere ingayamuhikako mwathogherya y’ahisi n’erithibitha. Nabere ingabwira abandi ngoku ngalyamwihako eradiyo yaghe, omusyakulhu omwa gurupu mwambulya athi, “Stephen, kwa wulyamuhamba wangakolireki?” Ekibulyo ekyo mukyaleka ingalengekania kandi mukyanyihira mw’omuhwa w’erilholha embere eribya oyukahiraho obuholho.

Omo Kwerikumi 1974, munatsuka erikolha ng’omughombe w’omughulhu wosi, erikolha esyosaha 100 obuli kwezi erikangirirya abandi be Biblia. Enyuma waho, munathunga olhusunzo lhw’erikolera okwa kyaghanda kikulhu ky’Abema ba Yehova e Brooklyn, New York. Omwa 1978, munasuba e Los Angeles eriyathwanira mama waghe. Enyuma w’emyaka ibiri, munathahya mukali waghe mwanze ya Aarhonda. Mwanyiwathikya kutsibu ingathwanira mama waghe erihika aho mama aholera. Endambi muyahika, Ingye na Aarhonda thwamaghenda okwa sukuru ye Gilead neryo muthwathumwa e Panama, eyo thukinalholha embere erikolera ng’abamisyonare.

Eritsuka aho nganathabatizibirwa, nabiribya inganemubana emibere mingyi eyangaleka ekinigha kyaghe ikyasubulha. Nabir’igha erilhua ahali abandu abakanza erinyitabura kutse erilebya ngoku nang’uwania emyatsi omwa yindi nzira. Abandu bangyi, imwamune na mukali waghe babirinyisima busana n’ebya ngakolha omwa mibere ng’eyi. Nibya naghe kyabirinyiswekya! Si bugha indi esyombinduka esi nabirisithoka omwa kaghalha kaghe. Aliwe, ng’ikirirye ngoku e Biblia yiwithe amaaka w’erihindulha emibere y’abandu.​—Abaebrania 4:12.

E Biblia yabirileka ingathunga ekighendererwa omwa ngebe n’erinyikangirirya ndeke ngoku nangabya oyukahiraho obuholho. Singakiswiraya abandu nahake; omwa kanya k’ekyo, ngabawathikaya erilhama bunyakirimu. Nibya oyuwabya nzighu yaghe kera okwa sukuru munamukangirirya e Biblia! Abere abiribatizibwa muthwikalha omwa kisenge kighuma habw’obuthuku. Namunabwire, thuli banywani kundu. Erihika na munabwire, ingye na mukali waghe thwabiriwathikya abandu abalhabire oku 80 eribya Bema ba Yehova omw’ibeghesya e Biblia.

Ngasima Yehova ya kutsibu habw’erinyiha engebe eyiwithe ekighendererwa n’etseme eyiri omwa lhughanda lhw’abalikyethu olhw’okwenene.