Nabuthirawa e Acul, etawuni eyiyisolhwere omwa kitsweka ky’ebithwa ebulengera lyuba bwe Guatemala. Eka yethu ni y’omw’ihiika ly’aba Ixil, ekihanda ky’Abamaya. Eryongera okwa Lhusipanish, ngakanaya n’omubughe wethu. Ingakine mulere, e Guatemala yabya olhuhi olhwaghunza myaka 36. Okwa buthuku obo aba Ixil bangyi mubaholha.

Ingane w’emyaka ini, mughalha wethu omukulhu, ow’emyaka musanju mwasatha omwa bbomu eyahuta isithuyitsulirye. Busana n’ebbomu eyo munabya ndimethime; n’eky’obulighe mughalha wethu mwaholha. Enyuma waho munayikalha okwa sukuru y’abaana esyondimethime omwa Tawuni mwe Guatemala, eyo n’ighira erisoma ebihandiko by’esyondimethime. Eyo, abakoli mubathanyilighira erikania n’abandi baana n’abangasoma nabu mubanyiyihighulhako. Mughulhu wosi iningabya omwa mbwera kandi iningabulikira amezi abiri w’erighenderamu eka obuli mwaka akahika eriya eyiri mama waghe oyuwabya akanyitsomana n’erinyikwira obulighe mughulhu wosi. Eky’obulighe, mwaholha ingane w’emyaka ikumi. Eriyowa inamabiriherya omundu w’omughaso omwa kihugho kyosi, mukyanyibunzulha.

Ingane w’emyaka 11, munasuba omwa tawuni y’ewethu namay’ikalha na mukulhu waghe oyuwabya mughalha wa thatha. Mubanyitsomana kinyamubiri, aliwe isihali oyukanyitsomana omw’iyowa. Ihakanayira ingalira, ingalhakira Nyamuhanga indi: “Ni kyahi ekyaleka mama waghe iniaholha? Busana naki munabya ndimethime?” Abandu ibakambwira bathi ebitsibu ebi lyaby’isonda lya Nyamuhanga. Munaghunzirera indi Nyamuhanga atholere eribya isyalitsomana kandi isyawithe obulingirirania. Ekindu ekyaleka ingathayitha kyabya kithi isingawithe ngoku nangakolha ekyo.

Eribya ndimethime mukyaleka ingabya isinangayilhwirako. Ingye ng’omulhwana, munakolhwako eby’obuthundirya ngendo nyingyi. Isindithulhagho​—iningalengekanaya indi sihali oyuwanga nyitsomana. Abandu ibakabugha naghe ighuma-ighuma, neryo isingawithe ow’erikanirania nayu. Munayisolholha, namabbunika muthima, kandi isindiyikethera owosi-wosi.

Omo myaka yaghe y’obulengwa, Abema ba Yehova babiri (abathahenie) mubanyihikako okwa sukuru okwa ndambi y’erilhuhuka. Omughuma w’okwa bahalimu baghe oyukanyikwira obulighe yuwababwira athi banyihikeko. Mubambwia oko mulhaghe we Biblia ngoku abaholi bakendi syalhubuka kandi ngoku kiro kighuma esyondimethime sikendi syalhangira. (Isaya 35:5; Yoane 5:28, 29) Munanza ebya banyikangiriraya, aliwe mukyanyikalira erikania nabu, kundi sinabya ngabeghere erikania. Nomwabine, nomunanabya mukuthu, omwa lhukeri n’omw’ighumisirizya mubalholha embere erinyibungira nuku banyikangiriraye ebihambire okwa Biblia. Abathahenie aba ibakaghenda esyokilomita esilhabire oku 10 erilenga okwa kithwe erinyihikako.

Mukulhu waghe iniakambwira athi bakambalha ndeke aliwe si bawithe bindu binene. Nomwabine, mughulhu wosi ibakanyitsomana n’erinyirethera ehihembo. Munayowa indi Abakristayo b’okwenene basa babanga kangania eriyihayo ng’eryo.

Mun’igha e Biblia omw’ikolesya ebitabu by’esyondimethime. Nomwakine indi iningayitheghereraya ebya nabya ng’igha, aliwe omw’iyowa ikikanyikalira eriligha ebindi bindu. Ng’eky’erileberyako, mukyanyikalira eriligha ngoku Nyamuhanga angananzomana ingye ng’ingye kandi ngoku abandi bangana nyikangania eriyowa eriri ng’erya Nyamuhanga. Munayitheghererya ekikaleka Yehova inialekereraho obubi habw’akathuku kake, aliwe mukyanyikalira erimulhangira kwenene nga Thatha w’olhwanzo.

Lyolho-lyolho, ebya n’igha omwa Masako mubyangwathikya erihindulha amalengekania waghe. Ng’eky’erileberyako, mun’igha ngoku Nyamuhanga akayowa nabi busana n’abakaghalhawa. Okwa baramya biwe abakolhawa nabi, Nyamuhanga mwabugha athi: “Kwenene nabirilhangira amalighe w’abandu baghe . . . nyinasi amalighe wabu.” (Eriluayo 3:7) Nabere nabiriminya emibere mibuyanga ya Yehova, munathwamu eriyihayo okw’iyo. Omwa 1998, munabatizibwa ng’Omwema wa Yehova.

Enyuma w’omwaka nga mughuma ngali batizibirwe, munaghenda okwa sukuru y’esyondimethime hakuhi n’etawuni ye Escuintla. Omusyakulhu omwa kithunga mwaminya ebitsibu ebya ngalhabamu erilhua omwa tawuni y’ewethu eryasa okwa mihindano. Ingawithe erilhaba okwa kithwe ekya mughalha wethu na mukali wiwe ababya bakasyanyighesya babya bakalhabako erihika okwa kithunga ekyabya hakuhi, neryo okw’ingye ikinyikalire. Erithoka erinyiwathikya, omusyakulhu oyo mwabana eka nguma y’Abema e Escuintla ababya ibanayitheghekire erikalha naghe n’erinyiwathikya erihindana okwa mihindano. Erihika namunabwire, banemunyitsomana ng’ow’okw’ibo.

Nangana hulha eby’erileberyako bingyi eby’olhwanzo lhw’okwenene ebyo ab’omwa kithunga babirinyikolera. Erithwalira haghuma, ebya nabiriyilhangirira ebi bikanyilighisaya ngoku ng’omughuma w’okwa Bema ba Yehova, ngali omwa Bakristayo ab’okwenene.​—Yoane 13:34, 35.

Singakiyowa mo wa bbule kandi ng’oyuthawithe maha. Lino engebe yaghe yiwithe ekighendererwa. Ingye ng’Omwema wa Yehova kandi ng’omutemburi, ngahweraya amalengekania waghe okw’ikangirirya abandi b’ekwenene y’obughuli ye Biblia omwakanya k’erihweryagho okwa bulema bwaghe. Kandi ngawithe olhusunzo lhw’erikolha ng’omusyakulhu w’ekithunga n’olhw’erilhabya emikania y’abandu bosi omwa bithunga bingyi. Nabirithunga n’olhusunzo lhw’erilhabya emikania eyiseghemere okwa Biblia okwa lhuhindano lhw’erijoni olhukabya kw’abandu bangyi.

Omwa 2010, munasomire okwa Sukuru y’Abasyakulhu n’Abaghombe Abawathikya (lino eyikahulhawamo e Sukuru y’Abathuliri b’Obwami) eyabya e El Salvador. E sukuru eyi muyanyithegheka erikolha ndeke esyongwamirwa syaghe omwa kithunga. Erithendeka eri mulyaleka ingayowa ingali w’omughaso n’oyuwanzibirwe na Yehova Nyamuhanga, oyuwangaleka iwatholera busana n’omubiiri wiwe.

Yesu mwabugha athi: “Erihithya likaletha obutseme kwilhaba erihebwa.” (Emibiri 20:35) Omu kwenene, lino ngatsemire, kandi nomwakine indi kera isindilengekanaya indi ikyathokekana, lino ngayowa inangana wathikya abandi.