Wune wathalengekania okw’isoma e Biblia neryo iwabikyako busana n’eriyowa eriri ng’eriri ahighulhu eri? Okwa bangyi, bakalhangira erisoma e Biblia nga ni mubiiri owakalire. Aliwe ibbwa wamaminya ngoku e Biblia yangana kuwathikya eribana etseme n’engebe eyuwene? Kandi ibbwa wamaminya ngoku hane esyonzira esy’erisomeramu e Biblia esyanga kuhira mw’omuhwa w’erisomayo? Iwunemwendyanza eriminya ebya Biblia yanga kuha erikuwathikya?

Thalhangira ebighuma by’okwa byabughawa n’abaghasirawa busana n’eritsuka erisoma e Biblia.

Ezekiel, oyuwamatsuka emyaka eya 20, akabugha athi: “Kera, nabya ng’omundu oyukaghendaya ematoka isyasi aho akaya. Aliwe erisoma e Biblia kyabirileka ingabya n’engebe eyiwithe ekighendererwa. Muli amenge agho nanga kolesya buli kiro.”

Frieda, nayu oyuli omo myaka eya 20, akabugha athi: “Iningahithana lhuba-lhuba. Aliwe busana n’erisoma e Biblia, nabirigha eriyikakirya. Eki kyabiryolhobera abandi erikolongana naghe, neryo lino ngwithe abanywani banene.”

Omukali oyuli omo myaka eya 50 oyukahulhawamo Eunice akabugha bino okwa Biblia, “Yinemunyiwathikya eribya mundu mubuya, erihindulha emibere yaghe eyithuwene.”

Ngoku abasomi abo n’abandi bangyi babirilhangira, erisoma e Biblia kyanga kuwathikya eribya n’engebe eyuwenenga. (Isaya 48:17, 18) Yangana kuwathikya (1) erithwamu ndeke, (2) eribana abanywani b’okwenene, (3) erighumira amaghaniryo, na (4) ekikulhu kutsibu, erigha ekwenene eyihambire oku Nyamuhanga. Erihabulha lye Biblia likalhua oku Nyamuhanga, neryo iwukendi ghasirwa wamaghendera kulyo. Nyamuhanga syaliha erihabulha erithuwene.

Ekikulhu ly’erilhangira wuthi wukatsuka erisomayo. Ni menge wahi awanga kuwathikya eritsuka erisoma e Biblia n’eryongera eritsemerayo?