E Biblia si kitabu buyira. Yiri mw’erihabulha erikalhua okwa Muhangiki wethu. (2 Timoteo 3:16) Omwatsi owalimu angana hindulha kutsibu engebe yethu. Kundi nibya e Biblia yikabugha yithi: “Ekinywe kya Nyamuhanga kiriho, kandi kinemukolha omubiiri.” (Abaebrania 4:12) Yiwithe amaaka w’eryuwania engebe yethu omo nzira ibiri ngulhu-ngulhu​—erithusondolha omo ngebe yethu lino n’erithuwathikya eriminya Nyamuhanga n’emilhaghe yiwe.​—1 Timoteo 4:8; Yakobo 4:8.

Eryuwania engebe yawu lino. E Biblia yangana kuwathikya omo ngebe yawu. Yikahabulha okwa bino.

• Obughuma bwethu n’abandi.​—Abanya Efeso 4:31, 32; 5:22, 25, 28, 33.

• Eriyowa n’amaghalha.​—Esyonyimbo 37:8; Emisyo 17:22.

• Eby’esyongeso.​—1 Abanya Korinto 6:9, 10.

• Eby’esyosente.​—Emisyo 10:4; 28:19; Abanya Efeso 4:28. *

Omulhume na mukali wiwe abalere abe Asia mubasima kutsibu omughaso w’erihabulha lye Biblia. Ng’abandi abahyaka bangyi omwa butheke, nabu mukyabakalira erighumira emibere y’obuli mughuma n’erithunga erikanirania. Aliwe mubatsuka eribya bakaghendera okwa bya bak’igha omwa Biblia. Mumwalhwiririraki? Omulhume, ya Vicent, akabugha athi: “Ebya nasoma omwa Biblia mubyangwathikya erirwanisya ebitsibu by’omwa butheke omwa nzira y’olhwanzo. Erighendera okwa biri omwa Biblia kyabirileka ithwabya n’engebe eyuwene.” Mukali wiwe ya Annalou, akaligha athi: “Erisoma okwa by’erileberyako by’omwa Biblia mukyathuwathikya. Lino ngatsemire kandi ngatsemera obutheke bwethu n’ebilhubirirwa byethu omo ngebe.”

Eriminya Nyamuhanga. Eryongera okwa by’akabugha okwa butheke bwiwe, Vicent akabugha athi: “Omw’isoma e Biblia, ngayowa ingali hakuhi-kuhi na Yehova kwilhaba kera.” Ebya Vicent akabugha bikahira omuwatho okwa nzumwa ngulhu eno​—e Biblia yangana kuwathikya eribya munywani wa Nyamuhanga. Omw’ikolha ekyo, isiwendi subulira okw’ighasirwa omw’ihabulha liwe aliwe kandi iwukendi lhangira ngoku wangana muminya ng’omunywani. Kandi wukendi lhangira ngoku akabisulha ebihambire okwa ngebe ey’obuthuku obukasa obuwene, omughulhu thukendi syabana engebe eyiri “ngebe kundu”​—eyikendi syabya ya kera na kera. (1 Timoteo 6:19) Ekyo ni kindu ekithe kyangabanika omwa kindi kitabu.

Wamathwamu erisoma e Biblia kandi wukalholha embere, nawu iwangana bana emighisa eyo​—eryuwania engebe yawu lino n’eriminya Nyamuhanga. Aliwe wukasoma e Biblia, hane ebibulyo bingyi ebya wanga lengekaniako. Kandi wukakolha ekyo, ambi iwibuka eky’erileberyako ekyuwene eky’Omuetiopia oyuwabyaho myaka 2,000 kera. Aby’awithe ebibulyo bingyi ebihambire okwa Biblia. Abere akabulibwa ng’anemuyitheghererya eby’abya akasoma, mwasubirya athi: “Nangaminya nyithi ndawithe oyukanyowisayabyo kwehi?” Neryo n’omuhwa munene mwaligha obuwathikya bw’owundi mundu oyuwabya inianasi erikangirirya ndeke e Biblia, ya Filipo, omwigha owa Yesu. (Emibiri 8:30, 31, 34) Omwa menge iwanayo, wamabya iwunanzire eriminya bingyi okwa Biblia, thukakukokaya erithuma erisaba lyawu okwa Intaneti okwa www.pr418.com kutse erihandikira engangirira eyiri hakuhi nawu, ngoku kiri omwa gazeti eno. Kandi iwangana bana Abema ba Yehova abali hakuhi nawu kutse iwaghenda okwa Kisenge ky’Obwami ekiri omwa bulhambu bwenyu. Busana naki iwuthimya e Biblia munabwire n’erilighirayo erikusondolha erikukolya okwa ngebe eyuwene?