OMWATSI W’OKWA KIDIPA | NGOKU WANGA GHASIRWA NDEKE OMWÆISOMA E BIBLIA
Ni Kyahi Ekikendi Leka Iryatsemesya?
Mbwino yikitha bulhundu? Kutse yikatsemesaya? Erisoma e Biblia likendi kuwathikya lithi? Kutsibu-tsibu kikasighikira okwa mibere yawu y’erisoma. Thulebaye ebyo wanga kolha eryongera erianzisibwa n’eritsemerayo.
Sombolha embindulha ey’eriyikethera, eyiri mw’omubughe owamunabwire. Wamasoma ekitabu ekiri mw’emyatsi mingyi eyikalire n’ebinywe bya kera ebyo wuthasi, iwangana ghana eritsemera erisomakyo. Neryo kolesaya e Biblia eyikakolesaya ebinywe ebyolhobire eriyitheghererya ebikendi hamba okwa muthima wawu. Aliwe kandi, yitholere iyabya imuyahindulhwa omw’iyitheya kandi ndeke. *
Kolesaya e tekinologia. Munabwire e Biblia siyiri omwa mulingo w’esyombapura musa, aliwe yine n’omwa mulingo w’ekielekitroniki. Esyo Biblia ndebe wangana sisomera okwa Intaneti kutse erikimibwa okwa kombyuta, etableti, kutse esimu busana n’endegheka yawu ey’erisoma. Esyombindulha ndebe sye Biblia siri mw’ebindi bindu ebyangana kuwathikya eribana eyindi milhondo ye Biblia oko mwatsi mughumerere kutse nibya iwalinganisya n’esindi mbindulha muthina-muthina. Wamabya iwanzire erihulikirira omwakanya k’erisoma, e Biblia yineho n’omwa mulingo w’omulenge. Abandi bangyi bakatsemera erihulikirira ibane omwa lhughendo omwa syomatoka, bakakolha emibiiri y’eka, kutse bakakolha eyindi mibiiri eyikabalighira erihulikirira. Busana naki iwuthalengesya enzira eyanga kwolhobera?
Kolesaya eby’erikolesya erigha e Biblia. Eby’erikolesya erigha e Biblia byangana kuwathikya eriminya bingyi omw’isoma lyawu. Hane esyomapu sy’ebihugho by’omwa Biblia esyanga kuwathikya eriminya ahali ekihugho ekya wukabana wukasoma neryo iwalhangira ndeke ebyabya. Emyatsi ng’eyiri omwa syogazeti kutse omwa akatsweka “Esyongangirirya sye Biblia” akali okwa muthahulha we jw.org byangana kuwathikya eriminya ebya bitsweka bingyi bye Biblia bikamanyisaya.
Kolesaya esyonzira muthina-muthina. Kyamabya ikik’itha obuba erisoma e Biblia eritsuka okwa nzuko erihika okw’ighunzerera, busana naki iwuthatsuka n’ebitsweka birebe bye Biblia ebikakutsemesaya? Wamabya iwanzire erigha okwa bandu abasibwe kutsibu ab’omwa Biblia, wangana soma okwa bandu abo. Eky’erileberyako kine omwa kasanduko “ Sekulhaya Omwa Biblia Eriminya Abandu Abalimu.” Kutse wanzire erisoma e Biblia mwatsi okwa mwatsi kutse ngoku ebyabya bithondekenie. Busana naki iwuthalengesya enguma y’okwa syonzira esi?
^ Abangyi babiriminya ngoku e New World Translation of the Holy Scriptures yihikire, ni y’eriyikethera, kandi yolhobire erisoma. E Biblia eyi, yahulhukibawa n’Abema ba Yehova, yineho omwa mibughe eyilhabire omu 130. Wangana kimya ekopi yawu okwa muthahulha we jw.org kutse kimaya e JW Library app. Kutse wamanza, Abema ba Yehova ibangana kuha ekopi yawu iwune eka wawu.