Nabuthirawa e Paddington, ekihugho ekyoswire mw’abandu e London, e Bwengereza. Nabya ng’ikere na mama waghe n’abali bethu abakulhu basathu. Thatha waghe ini munyu w’obwabu neryo isyali bera eribya eka.

Ingakine mulere, mama waghe mwanyikangirirya erisaba obuli omwa kiro. Nabya ngwithe aka Biblia kake akali mw’ekitabu ky’Esyonyimbo kisa, neryo ebinywe byomo munabiha emirenge nuku nangabya ingimbabyo. Ng’ibuka ingasoma ebinywe birebe omwa kitabu kyaghe ky’ekihugho ebya kwama kyabya omwa bulengekania bwaghe bino: “Ekiro kikendi syahika ihabya isihali omungya.” Ebinywe byo mubyaleka ingathaghotsera ingalengekania okwa buthuku obukasa. Munalengekania indi, ‘Ahathe erithika-thika engebe yitholere iyabya iyinawithe ekighendererwa. Busana naki ngwithe engebe?’ Mwindanza eriholha!

Munanza kutsibu eriminya ebihambire okwa by’obukumu. Munalengaho erikanirania n’abaholi, erighenda n’abanya-sukuru banywani baghe eyiri amalimbo, n’erilebya haghuma nabu esyofilimu esikubahisaya. Ithukalengekanaya thuthi sikatsemesaya kandi isyitha n’obuba.

Nabere ingahikya emyaka ikumi buyira munatsuka eritsanda. Munatsuka erinywa ethaba, neryo amalhuaho iniabya mutse waghe. Enyuma waho, munatsuka eribya inganywa ebbangyi. Aho nahikiraya emyaka 11, nabya ingali okw’ilengesya erinywa obwabu. Nomwakine indi mundabwanza, munanza ebikalhwiririra omw’ithamira. Kandi munanza omuziki n’erihotholha. Iningaghenda omwa bididi n’omwa disiko namathoka. Ingabeghere eritswa omwa kiro n’erisubulha buthe bwakya. Busana n’erilhuha ekiro ekikakwamako isingali ghenda okwa sukuru. Inamaghenda okwa sukuru, mughulhu mungyi ininganywa obwabu ithunemusoma.

Munathalhaba ndeke ebizamu byaghe by’omwaka w’erighunzerera ow’esukuru. Kundi mama waghe syabya asi ku nabiritsanda, mwapona kandi mwahithana. Muthwatoka, neryo munathibitha namayilhuira eka. Munay’ikalha na munywani waghe omwojo oyuwabya Murasta, ya Tony, habw’obuthuku. Abya mwibi kandi iniakaghulhaya ebibatsi ebikathamiraya kandi ini mutsurumi kutsibu. Buthuku buke munabya mukule ingane w’emyaka 16 misa, munabutha omwana w’obulhume.

Nabana Abema ba Yehova omurundi waghe w’erimbere ingane eya bakalemberera abamama abathathahibwe n’abaana babu. Ab’obuthoki babya ibabirinyihayo ekisenge. Abema babiri abakali ibakabya ibanemubungira abandi bamama abalere. Kiro kighuma munayinyunga okw’ibo bak’igha. Munanza erikangania ngoku Abema bawire. Aliwe mubasubirya obuli kibulyo kyaghe ky’okwa bibulyo bingyi ebyo nabulhaya ibanathekene kandi ndeke omw’ikolesya e Biblia. Ini b’olhukeri kandi bolho, emibere eyanyitsemesaya kutsibu. Neryo munaligha ibo erinyeghesya e Biblia ingye ahabwaghe.

Buthuku buke, mun’igha omwa Biblia mw’ekindu ekyahindulha engebe yaghe. Eritsuka bulere, ingasaghire eriholha. Lero lino munaminya engangirirya ya Yesu eyihambire okw’ilhubuka! (Yoane 5:28, 29) Kandi munaminya ngoku Nyamuhanga anyitsomene ingye ng’ingye. (1 Petero 5:7) Ebinywe ebiri omu Yeremia 29:11 mubyanyihambako kutsibu, ebikabugha bithi: “Omwami Mukulhu athi, Nyinasi amalengekania agho ngalengekanaya busana nenyu, amalengekania w’obuholho, si w’ekibi, eribaha amaha oko biro byenyu ebikasa.” Munatsuka eriligha ngoku nanganabya n’amaha w’erisyabya omwa kihugho Paradiso kera na kera.​—Esyonyimbo 37:29.

Abema ba Yehova mubanyikangania olhwanzo lhw’okwenene. Nabere ingahindana okwa mihindano yabu omurundi w’erimbere, obuli mundu mwanyangirira inianatsemire kandi ibakayihira okwa bandu! (Yoane 13:34, 35) Eyo yabya mbaghane nene okwa mibere eyo nalhangira omwa kanisa yethu. Abema mubanyangirira nomunanabya ngawithe emibere eyithuwene. Mubanyiha obuthuku, bamanyitsomana, n’erinyihulikirira, kuthya n’erinyiha obuwathikya. Munayowa nga ngali mughuma w’okw’eka nene, ey’olhwanzo.

Omw’igha lyaghe lye Biblia, munaminya ngoku ngatholere ingakolha esyombinduka omwa ngebe yaghe erithoka erighendera okwa bihano bya Nyamuhanga eby’esyongeso. Mukithanyolhobera erileka erinywa ethaba. Kandi munaminya ngoku emiziki mirebe yik’ongera engumbu yaghe y’erinywa ebbangyi, neryo munahindulha emiziki eyanga hulikirira. Erithoka erileka erithamira, munaleka eribya ingaya omwa bididi n’omwa syodisiko kundi eyo inangananza erithamira. Kandi munasondya abanywani bahyaka abanga nyiwathikya omwa ngebe yaghe mbyaka.​—Emisyo 13:20.

Ebyo bine aho, Tony nayu abya inianemw’igha e Biblia n’Abema ba Yehova. Abema babere banemusubirya ebibulyo biwe omw’ikolesya e Biblia, nayu mwaligha ngoku eby’ak’igha ni kwenene. Mwakolha esyombinduka nene-nene omwa ngebe yiwe: mwaleka abanywani biwe abatsurumi, amaleka emibiiri yiwe y’obwibi, n’erileka erinywa ebbangyi. Erithoka eritsemesya Yehova ya ndeke, ithwe bosi kandi muthwalhangira ekiyithawa ky’erileka engebe yethu y’obutswatswa n’erilhangira thuthi omwana wethu akakulibawa ndeke. Muthwaherukania omwa 1982.

Ng’ibuka ingasekulya omwa gazeti y’Akaleberyo n’eya Awake! * mw’eriyikaniako ly’abandu abathoka ndeke erikolha esyombinduka esyonabya nganzire erikolha. Eby’erileberyako byabu mubyanyihambako! Munayowa ingamahirwa mw’omuhwa w’erilholha embere erilengaho n’ow’erithendi bikyako. Munalholha embere erisaba Yehova indi isyanyilekeranaya. Ingye na Tony muthwabatizibwa ng’Abema ba Yehova omo Kwomusanju 1982.

Eribya n’obunywani na Yehova mukyalhamya engebe yaghe. Kandi ingye na Tony muthwayilhangirira obuwathikya bwa Yehova omwa buthuku obukalire. Thwabirigha eriyikethera Yehova omwa bitsibu, kandi thukayowa iniabiriwathikya eka yethu ya kutsibu.​—Esyonyimbo 55:22.

Nabirilengaho eriwathikya mughalha waghe na mwali waghe eriminya Yehova ng’ingye. Kikanyitsemesaya lino ingalhangira n’abaana babu bakalholha embere eriminya Nyamuhanga.

Singakibulha othulho habw’erilengekania okwa buthuku obukasa kutse okwa lhuholho. Ingye na Tony thunemuyihwerya omwa mubiiri w’eribalhamira ebithunga by’Abema ba Yehova muthina-muthina obuli wiki eribahimba. Thukayiyunga okw’ibo omweghesya abandi thuthi bam’ikirirya omu Yesu, nabu ibangana syabana engebe y’erikotha.