Ni menge wahi awanga kuwathikya eritsemera erisoma e Biblia n’erighasirwa muyo? Lhangira ebindu bithano ebya biriwathikya abangyi.

Sondaya emibere eyuwene ey’erisomeramu. Lengaho erisondya omwanya owathekene. Yihihule okwa byanga kulengemerya erithoka erihwerya amalengekania okwa ebya wukasoma. Ekyakakalha n’embehu eyuwene byangana kuwathikya erighasirwa ndeke omw’isoma lyawu.

Ibya n’amalengekania awatholere. Kundi e Biblia yikalhua oku Thatha wethu w’elhubulha, iwukendi ghasirwa ndeke wamabya n’amalengekania awali ng’ow’omwana oyukabya inianayitheghekire erighira okwa mubuthi wiwe ow’olhwanzo. Wamabya iwuwithe amalengekania awathatholere okwa Biblia, lengaho eriyiha ghomo nuku Nyamuhanga anga kukangirirya.​—Esyonyimbo 25:4.

Saba wuthe wasoma. E Biblia yiri mw’amalengekania wa Nyamuhanga, neryo sikiriswekaya eribya ithukayithagha obuwathikya bwiwe erithoka eriyitheghereryayo. Nyamuhanga akalhaghanisaya “eriha omulimu abuyirire oko bakamubulhaya.” (Luka 11:13) Omulimu wa Nyamuhanga angana kuwathikya eriyitheghererya amalengekania wa Nyamuhanga. Endambi yikendihika, iniakyungulha amalengekania wawu iwathoka eriminya “nibya n’emyatsi ya Nyamuhanga ey’omwakathi.”​—1 Abanya Korinto 2:10, NWT.

Soma busana n’erianza eriyitheghererya. Isiwasoma habw’erithanza erighunza omwatsi. Lengekanaya kutsibu okwa bya wukasoma. Yibulhaye ebibulyo nga bino: ‘Ni mibere yahi eya ngalhangira omwa mundu oyo ngasomako? Nangakolesya indi eki omwa ngebe yaghe?’

Yihirireho ebilhubirirwa. Erithoka erighasirwa omw’isoma e Biblia, ithwamu erigha ekindu kirebe ekikendi kughasira omwa ngebe. Iwangana hiraho ebilhubirirwa nga bino: ‘Nganzire erigha bingyi oku Nyamuhanga iyuwene-wene.’ ‘Nganzire eribya mundu mubuya, iba kutse mukali muthahibwa mubya.’ Neryo sombolha ebitsweka birebe bye Biblia ebikendi kuthokesya eriberererya ebilhubirirwa ebyo. *

Ebindu bithano ebi bikendi kuwathikya eritsuka. Aliwe wangakolhaki erilhangira wuthi erisoma e Biblia lik’ongera eritsemesya? Omwatsi ow’akakwamako akendiha amenge.