ESURA 35

Nangabya Indi Munywani wa Nyamuhanga?

Jeremy abere babiribana ekitsibu mwaminya omughaso w’eribya n’obunywani na Nyamuhanga. Akabugha athi, “Ingane w’emyaka 12, thatha waghe mwathusighania. Kiro kighuma ingane omo ngyingo yaghe munasaba, erilemba-lemba Yehova indi awathikaye thatha waghe asube eka.”

Omwa bulighe obo, Jeremy mwatsuka eribya akasoma e Biblia. Abere akasoma Esyonyimbo 10:14, mwatsema kutsibu. Omulhondo oyo akabugha athya oku Yehova: “Omuhanya akayikethere iwe; kandi wuli muwathikya w’esyongubi.” Jeremy akabugha athi: “Munayowa Yehova iniakakanaya naghe kandi inianzire ingaminya ngoku ni muwathikya waghe; ni Thatha waghe. Ni thatha wundi wahi omubuya oyo nanga thunga athe in’iyo?”

MBULHA wuli omwa mibere eyiri ng’eya Jeremy kutse eyihi, e Biblia yikakanganaya ngoku Yehova anzire iwabya munywani wiwe. Nibya e Biblia yikabugha yithi: “Muyithunde hakuhi na Nyamuhanga, nayu akendi yithunda hakuhi nenyu.” (Yakobo 4:8) Thalengekania ebinywe ebyo nga bikamanyisayaki: Nomwakine indi siwanga mulhangira​—kandi si w’olhulengo lhwawu​—Yehova Nyamuhanga akakukokaya eribya munywani wiwe!

Aliwe eribya munywani wa Nyamuhanga kikendi kuyithaghako erihiraho akaghalha. Ng’eky’erileberyako: Wamabya iwuwithe ekimole kyawu eky’omwa nyumba, wunasi ngoku si kyanga kulha ahabwakyo. Ikyo erikulha wutholere iwabya wukakyuthangirira mughulhu wosi kandi ikyabya ikine omwa mwanya owuwene. Kwa bine bithya n’okwa bunywani na Nyamuhanga. Wanga kolhaki nuku obunywani ng’obo bukulha-kulhane?

Omughaso w’Eriyeghesya

Obunywani bukayithagha inywe bosi babiri eribya imunemukanirania​—erihulikirira n’erikania. Kwa bine bithya n’okwa bunywani na Nyamuhanga. Erisoma n’eriyeghesya y’enzira ey’erihulikiriramo ebya Nyamuhanga akathubwira.​—Esyonyimbo 1:2, 3.

Ni kwenene, wanganabya isi wuli tsemera eriyeghesya. Eminyethu mingyi iyo yikanza erilebya TV, erisatha emisathu, kutse eribya n’abanywani babu. Aliwe wamabya wanzire eribya munywani wa Nyamuhanga, sihali eyindi nzira nyolho. Ikikendi kuyithaghisya erimuhulikirira omw’iyeghesya Ekinywe kiwe.

Aliwe isiwakwa obuba. Erigha e Biblia isyabya muheke. Wangana tsemera erisomayo​—nomuwangabya iwukayilhangira ng’omundu oyuthyanza erisoma. Ekindu ky’erimbere ekyo wanga kolha ly’erihiraho endambi ey’eriyegheseryamu e Biblia. Omusika oyukahulhawamo Lais akabugha athi, “Ngwithe endegheka. Obuli ngyakya ngasoma esura nguma omwa Biblia.” Maria, ow’emyaka 15, awithe endegheka ey’embaghane. Akabugha athi, “Ngasoma bike omwa Biblia obuli mwa kiro inde nakesya.”

Iwe erithoka eritsuka endegheka yawu y’eriyeghesya, lebaya  akasanduko okwa lhupapura 292. Neryo, ahikwa, handikaho endambi eyo wanga ghunziramo, nga dakika 30 kutse kwilhaba aho wukayeghesya Ekinywe kya Nyamuhanga.

․․․․․

Erithahiraho endambi ni tsuka buyira. Wamabiritsuka eribya wukayeghesya, iwangana minya ngoku mughulhu wosi si kyolho erisoma e Biblia. Iwangana lighirana na Jezreel ow’emyaka 11, oyuwabugha ndeke-ndeke athi, “Ebindi bitsweka bye Biblia bikayithagha eriyithendyako ndeke kandi sibiritsemesaya.” Wamayowa wuthya, isiwabikyako. Mughulhu wosi lhangira eriyeghesya e Biblia ng’endambi y’erihulikirira Yehova Nyamuhanga, omunywani wawu. Erighunzerera, wukendibya wunemuhiraho akaghalha, wukendi lhangira ngoku eriyeghesya e Biblia likatsemesaya kandi iwaghasirwa mulyo!

Ni Kikulhu Erisaba

Erisaba y’enzira y’erikaniryamu na Nyamuhanga. Thalengekania okwa kihembo kibuyanga eky’omusabe! Wangana saba Yehova Nyamuhanga okwa ndambi yosi-yosi omwa musibo kutse omwa kiro. Akabya inianayitheghekire erihulikirira. Eryongera okw’ekyo, anzire iniowa ebya wukasaba. Ky’ekikaleka e Biblia iyakuhira mw’omuhwa yithi: ‘Omo buli mwatsi wubwire Nyamuhanga obwagha bwawu, iwukamusaba n’erimuhathikana, iwunemuha ewasingya.’​—Abanya Filipi 4:6.

Ngoku erisako eri likakanganaya, ni bindu bingyi ebya thwanga bwirako Yehova. Ebi mwangabya imwamuli ebitsibu byawu n’erihangya-hangya lyawu. Kandi mwanganabya ebya wukasima. Omo kwenene, siwuli yisanga iwabirisima munywani wawu busana n’ebibuya ebyabirikukolera? Wangana kolha ekiri ng’ekyo oku Yehova, oyuwabirikukolera bingyi kwilhaba owundi munywani wawu wosi-wosi.​—Esyonyimbo 106:1.

Ahikwa hano, handikaho ebya wanga simirako Yehova.

․․․․․

Ahathe erithika-thika hane ebikakwitha obuba n’ebikakulethera amaghaniryo ebikabya ibinemukulyambya. Esyonyimbo 55:22 hakabugha hathi: “Wughusire Omwami Mukulhu y’amalighe wawu, nayu akendi kuhanganira; syendi syaleka omundu mubuya akakindwa na kera.”

Okwa milayini eyiri ahikwa hano, handikaho ekyosi-kyosi ekikakulyambaya ekya wanzire erihira omwa musabe.

․․․․․

Ekya Walhabiremo

Hane ekindi kindu ekihambire okwa bunywani bwawu na Nyamuhanga ekya wuthatholere erigheghena. Omuhandiki w’esyonyimbo ya Dawudi mwahandika athi: “Wulenge, wulebaye Omwami Mukulhu kwali mubuya!” (Esyonyimbo 34:8) Dawudi abere akakolha Olhwimbo olhwa 34, abya iniamabirilhaba omwa kitsibu ekikubahisaya. Abya iniakathibitha eriyibalya oko mwithi Omwami Saulo​—ekitsibu ekikalyambaya kutsibu. Aliwe neryo mwabya w’eribana obusaghiro omwa syonzighu siwe Abafilisitini. Ahathe erithika-thika aho Dawudi abya w’eriholha, aliwe mwayikolha ng’omusire neryo amathoka eritswa.​—1 Samweli 21:10-15.

Dawudi mwathalengekania athi iyo erithoka eritswa abya maaka wiwe. Omwakanya k’ekyo, mwabugha athi Yehova yulyakolha ekyo. Ahanyuma omwa olhwimbo olhu, mwahandika athi: “Munasaba Omwami Mukulhu, nayu mwanyisubirya; nayu mwanyilhamya oko buba bwaghe bwosi.” (Esyonyimbo 34:4) Kwesi erikwamana n’ebya Dawudi alhabamo, ky’ekyaleka iniahira omwa bandi mw’omuhwa ono athi, “wulenge, wulebaye Omwami Mukulhu kwali mubuya!” *

Wangana lengekania okwa ekya wabirilhabamo ekya wayilhangiriramo eritsomana lya Yehova? Wamabya iwunakiwithe, kihandike ahikwa hano. Minya kino: Si bugha ambu ekya walhabiremo kitholere ikyabya kinene kutsibu. Lengaho erilengekania okwa mighisa mike-mike eya buli kiro, eyindi y’okw’iyo thwanganabya ithukanagheghenayo.

․․․․․

Obundi ababuthi bawu babirikukangirirya okwa Biblia. Kyamabya ikwakiri kithya, oyo ni mughisa. Nomwabine, wutholere iwakulha-kulhania obughuma na Nyamuhanga iwe ahabwawu. Wamabya isiwuli wakolha ekyo, wangana kolesaya omwatsi owali omwa sura eno erikuwathikya eritsukiraho. Yehova akendi tsumulha akaghalha akawukahiraho. E Biblia yikabugha yithi: “Mubulhaye, mwasyahabwakyo, musonda-sondaye, neryo mwasyabanakyo.”​—Matayo 7:7.

[Omwatsi ahikwa]

ERISAKO LIKULHU

“Obutseme buli oko basi ko bali n’obwagha bwa Nyamuhanga.”​—Matayo 5:3.

AMENGE

Soma esyosura isathu sye Biblia erihika okw’ithano obuli kiro, neryo iwukendi ghunzayo omo mwaka mughuma.

WUNALHUE WASI . . . 

Iwe eribya iwunemw’igha e Biblia n’erighendera okw’ihabulha lyayo kikakanganaya ngoku Yehova akutsomene.​—Yoane 6:44.

EKY’ERIKOLHA!

Erighasirwa omw’iyeghesya lyaghe, ngendi ․․․․․

Erithoka erisaba mughulhu wosi, ngendi ․․․․․

Ebya nganzire eribulya ababuthi baghe oko mwatsi oyu bya bino ․․․․․

WUKALENGEKANAYA WUTHIKI?

● Wanga kolhaki erilhangira wuthi wuk’ongera eritsemera eriyeghesya e Biblia?

● Busana naki Yehova anzire erihulikirira emisabe y’abandu abathahikene?

● Wang’uwania wuthi emisabe yawu?

[Eblabbu]

Ingakine mulere, iningasubirira omwa binywe bighumerere ingasaba. Lino ngalengaho erisaba busana n’ebibuya n’ebithuwene ebyo ngabana obuli kiro. Kundi obuli kiro na byakyo, eki kikaleka ingathasubirira omwa binywe bighumerere.’’​—Eve

[Akasanduko/​Ekisasani]

Bumbura ebiri omwa Biblia Yawu

1. Sombolha mwatsi mulebe omwa Biblia ogho wanzire iwasoma. Saba Nyamuhanga akuhe amenge w’eriyitheghererya omwatsi oyo.

  2. Yithendaye oko mwatsi oyo. Isiwaharabana. Wukasoma, thera akasasani omwa bulengekania. Thabya nga wanabyaho: Lengaho erilhangira ebyabya, owa emirenge y’abakanibweko, beherawa embeho, gheraya ebyalya, n’ebindi n’ebindi. Ibya nga wunalhangire ebyabya!

3. Lengekanaya okwa bya wamasoma. Yibulhaye bibulyo nga bino:

● Busana naki Yehova mwahira omwatsi oyu omwa Kinywe kiwe?

● Ni bahi abali omwa Biblia abangatholere erigherererya, kandi ni bahi abali ky’erileberyako ekithuwene?

● Ni masomo wahi agho nang’igha omo mwatsi oyu?

● Omwatsi oyu akanyeghesayaki oku Yehova n’emibere akakoleramo emyatsi?

4. Saba omusabe mukuhi. Mubwire ebya wamigha omw’iyeghesya lyawu kandi ngoku wanga ghendera kubyo omwa ngebe yawu. Mughulhu wosi sima Yehova busana n’ekihembo ekyo abirikuha​—Ekinywe kiwe, e Biblia!

[Ekisasani]

“Ekinywe kyawu ni tara y’erinyisondolha, ni kyakakalha busana n’enzira yaghe.”​—Esyonyimbo 119:105.

[Akasanduko/​Ekisasani]

Hira Ebikulhu by’Embere

Wukanayowa isiwuwithe endambi y’erisaba? Endambi y’eriyeghesya? Mughulhu mungyi, eki kikasighikira okwa bya wukahira embere.

Lengesaya kino: Imaya embaketi, hiramo amabwe amanene-manene. Neryo hiramo omuseghe​—usulhayayo. Iwukendi thunga embaketi eyoswire mw’amabwe n’omuseghe.

Neryo ibbwa bungulha embaketi, theka omuseghe n’amabwe ayo waho. Neryo lero kolha wuthya: Tsuka omwa mbaketi mw’omuseghe, n’enyuma waho hiramo amabwe. Mukine omwanya w’amabwe wosi? Eki kyamabya kithya kundi muwukatsukamo omuseghe.

Enzumwa ni yahi? E Biblia yikabugha yithi: “Minya ndeke ebikulhu kutsibu.” (Abanya Filipi 1:10, NWT) Wamahira ehindu hike-hike ng’eriyitsemesya hy’embere, isiwendi bana omwanya w’erihiramo ebindu ebinene-binene​—eby’obunyakirimu. Aliwe wamaghendera okw’ihabulha lye Biblia, iwukendi lhangira ngoku wunawithe omwanya w’eby’obunyakirimu n’ow’eby’eriyitsemesaya okwa lhulengo lhulebe. Eki kikathokekana erikwamana n’ebya wamatsuka erihira omwa mbaketi yawu!

[Ekisasani]

Ng’ekimole ky’omwa nyumba, obunywani bwawu na Nyamuhanga bukayithagha eritsomanwa bwamabya bw’erikulha-kulhana