ESURA 37

Nganabatizibawe?

Gora ni kwenene kutse si kwenene okwa binywe ebiri ahikwa hano:

Abakristayo batholere ibabatizibwa.

□ Ni kwenene

□ Si kwenene

Ekighendererwa kikulhu ky’eribatizibwa ly’erikutheya okw’iwa omwa kibi.

□ Ni kwenene

□ Si kwenene

Eribatizibwa likaleka iwabya iwukendi syalhamibwa.

□ Ni kwenene

□ Si kwenene

Wamabya isiwubatizibirwe, isiwuli kw’olhubanza embere sya Nyamuhanga busana n’ebya wukakolha.

□ Ni kwenene

□ Si kwenene

Banywani bawu bamabya ibanemubatizibwa, ekyo kikamanyisaya kithi nawu wamabiritholera eribatizibwa.

□ Ni kwenene

□ Si kwenene

WAMABYA iwunemughendera okwa bihano bya Nyamuhanga, erikulha-kulhania obunywani na Nyamuhanga n’eribwira abandi okwa bya wikirirye, iwukendilhuaho iwalengekania okw’ibatizibwa. Aliwe wukaminya wuthi nga wanamabiritholera eribatizibwa? Erikuwathikya erisubirya okwa kibulyo ekyo, leka thulebaye emyatsi eya ni kwenene-kutse-si kwenene eyiri ahighulhu.

● Abakristayo batholere ibabatizibwa.

Ni kwenene. Yesu mwalhaghira athi abigha biwe batholere ibabatizibwa. (Matayo 28:19, 20) Erithwalira haghuma, Yesu iyuwene-wene mwabatizibwa. Erithoka erikwama Kristo, wutholere iwabatizibwa wabirikulha okwa lhulengo lhw’eribya iwangana yithwiramu erikolha ekyo kandi iwune n’eriyisunza ly’okwenene ery’erikolha ekyo.

● Ekighendererwa kikulhu ky’eribatizibwa ly’erikutheya okw’iwa omwa kibi.

Si kwenene. Olhubatizo ni kangania ngoku wabiriyihayo oku Yehova. Eriyihayo lyawu si ndaghane eyikakukakiraya okw’ikolha ebindu ebya wanganzire erikolha bubiso-biso. Omwakanya k’ekyo, wukahayo engebe yawu oku Yehova kundi wanzire erighendera okwa bihano biwe.

● Eribatizibwa likaleka iwabya iwukendi syalhamibwa.

Ni kwenene. E Biblia yikabugha yithi olhubatizo ni kiika kikulhu ky’eribaniramo omulhamu. (1 Petero 3:21) Aliwe eribatizibwa sibuthekwa-buthekwa indi wukendi syabana omulhamu. Siwutholere wukabatizibwa kundi wanzire erisyalhamibwa aliwe kundi wanzire Yehova kandi wanzire erimukolera kera na kera omwa ngebe yawu yosi.​—Mariko 12:29, 30.

● Wamabya isiwubatizibirwe, isiwuli kw’olhubanza embere sya Nyamuhanga busana n’ebya wukakolha.

Si kwenene. Yakobo 4:17 hakabugha hathi: “Omundu oyo wasi ekibuya ekyo angakolha, nikwa syali kolhakyo, omundu oyo ali n’omusango w’ebibi”​—mbulha wubatizibirwe kutse eyihi. Neryo kwesi wamabya iwunasi ekihikire kandi iwunakulire erithoka erilengekania okwa ngebe yawu, obundi obu bw’obuthuku bw’erikania oko mwatsi oyu n’ababuthi bawu kutse owundi Mukristayo oyukulire bunyakirimu. Omwa nzira eyo, iwukendi minya ngoku wanga kulha-kulhana erihika okw’ibatizibwa.

● Banywani bawu bamabya ibanemubatizibwa, ekyo kikamanyisaya kithi nawu wamabiritholera eribatizibwa.

Si kwenene. Erithwamu eribatizibwa kitholere ikyalhua okwa muthima wawu. (Esyonyimbo 110:3) Wutholere iwabatizibwa iwamabiriminya ndeke ekya kikamanyisaya eribya mughuma w’okwa Bema ba Yehova kandi iwunakakasirye ngoku wunayitheghekire eriberererya olhukwamirwa olhu.​—Omugambuli 5:4, 5.

Embinduka Nene Omwa Ngebe

Olhubatizo ni mbinduka nene omwa ngebe eyikakolhaya okwa mighisa mingyi. Neryo kandi, ni lhukwamirwa olhulithohire​—olhw’eriberererya eriyihayo lyethu oku Yehova.

Mbwino wukisiya iwayihayo? Kyamabya ikwa kiri kithya, wuwithe nzumwa mbuya y’eritsema. Ekya wulindirire lhw’olhusunzo lhunene kutsibu​—olhw’erikolera Yehova n’omuthima wawu wosi n’eribyaho omwa ngebe eyikakanganaya ngoku kwenene wabiriyihayo okw’iyo.​—Matayo 22:36, 37.

ERISAKO LIKULHU

“Muyihe oku Nyamuhanga ng’obuhere obuliho, kandi obubuyirire, obukamutsemesaya.”​—Abanya Roma 12:1.

AMENGE

Omw’iwathikibwa n’ababuthi bawu, sondaya omwa kithunga mw’omundu oyuwanga kuwathikya erikulha-kulhana bunyakirimu.​—Emibiri 16:1-3.

WUNALHUE WASI . . .

Eribatizibwa ni kitsweka kikulhu ky’okwa “kiminyikalho” ekikaleka iwabya iwangana syabana omulhamu.​—Ezekieli 9:4-6.

EKYA NGENDI KOLHA!

Erithoka erikulha-kulhana erihika okw’ibatizibwa, ngendyongera eriyitheghererya esyongangirirya sye Biblia hino: ․․․․․

Ngendi bulya ababuthi baghe ebihambire oko mwatsi ono ․․․․․

WUKALENGEKANAYA WUTHIKI?

● Busana naki eribatizibwa ni kiika kikulhu?

● Ni byahi ebyanga leka omulere iniahika lhuba okwa kiika ky’eribatizibwa?

● Ni nzumwa yahi eyanga leka omulere iniayowa athi syanga yihayo n’eribatizibwa?

[Eblabbu]

Eriminya ngoku munabatizibwa kikangwathikaya erithwamu ndeke kandi ikyaleka ingathakwama enzira eyanga lhwiririremu ebithuwene.’’​—Holly

[Akasanduko/​Ekisasani]

Ebibulyo Ebikabera Eribulibwa Ebihambire okw’Ibatizibwa

Eribatizibwa lik’imaniraki? Erilubbwa n’erilhua omwa maghetse bikamanyisaya bithi wamaleka eriyisonderya ebyawu n’eritsuka eribyaho omw’ikolha erisonda lya Yehova.

Kikamanyisayaki eriyihayo oku Yehova? Kikamanyisaya erithendi thasyayithungako buthoki, erilhagha Nyamuhanga ngoku erikolha erisonda liwe kya kikendibya embere okwa buli kindu. (Matayo 16:24) Wutholere iwayihayo oku Yehova erilhabira omwa musabe buthuku bulebe wuthe wabatizibwa.

Ni byahi ebya wutholere iwabya iwunemukolha omwa ngebe yawu wuthe wabatizibwa? Wutholere iwabya iwune mughenda-ghendania n’Ekinywe kya Nyamuhanga n’eribwira abandi okwa bya w’ikirirye. Wutholere iwabya iwunemukulha-kulhania obunywani na Nyamuhanga omw’isaba n’erigha Ekinywe kiwe. Wutholere iwabya iwunemukolera Yehova kundi muwathwamu erikolha ekyo​—butsira kundi abandi mubakuhathikana.

Mbwino hane emyaka mirebe eya wutholere iwatsuka erihikako imuwabatizibwa? Emyaka si kya kindu kikulhu. Nomwabine, wutholere iwabya iwunakulire​—kandi iwunakulire ndeke—​erithoka eriyitheghererya ekya kikamanyisaya eriyihayo.

Kandi ibbwa wamanza eribatizibwa aliwe ababuthi bawu ibabugha bathi wuthasyalinda? Obundi banganabya ibanzire iwathasyaminya bingyi okwa ngebe y’Abakristayo. Lhangira erihabulha lyabu mwa likulhu, kandi kolesaya obuthuku obo eryongera obunywani bwawu na Yehova.​—1 Samweli 2:26.

[Akasanduko]

Olhupapura lhw‘Erikolerako

wunemulengekania okw’ibatizibwa?

Lebaya erikulha-kulhana lyawu omw’ilengekania okwa bibulyo n’emyatsi ebiri ahikwa hano. Lhangira wuthi wukatsuka erisoma amasako awakanganibwe wuthe wahandika eby’erisubirya byawu.

Lino wunemukangania wuthi ku wuyikethere Yehova?​—Esyonyimbo 71:5. ․․․․․

Wabirikangania wuthi ngoku amaaka w’obulengekania wawu abirithendekwa erighabulha ekibuya n’ekibi?​—Abaebrania 5:14. ․․․․․

Wukasaba mirundi mingahi? ․․․․․

Ni byahi ebya wukasaba, kandi bikabisulhaki oko lhwanzo olhwa wuwithire Yehova?​—Esyonyimbo 17:6. ․․․․․

Ahikwa hano handikaho ekilhubirirwa kyosi-kyosi ekya wanganza erihiraho bikahika okwa misabe yawu. ․․․․․

Erigha lyawu lye Biblia liri lithi?​—Yosua 1:8. ․․․․․

Ni byahi ebya wukayeghesayako? ․․․․․

Ahikwa hano handikaho ekilhubirirwa kyosi-kyosi ekya wanganza erihiraho bikahika okw’iyeghesya lyawu. ․․․․․

Erithulira lyawu liri lithi? (Ng’eky’erileberyako: Wangana soborera abandi esyongangirirya sy’omusingyi esye Biblia? Wukanasubayo okwa bakanzisibawa? Wakanalengaho eribana omwigha we Biblia?)

□ Ee □ Eyihi

Wukanasangira omw’ithulira ababuthi bawu nomubangabya isibathaghendamu?​—Emibiri 5:42.

□ Ee □ Eyihi

Ahikwa hano handikaho ekilhubirirwa kyosi-kyosi ekya wanganza erihiraho bikahika okw’ithulira lyawu.​—2 Timoteo 2:15. ․․․․․

Iwanayikaniako ng’oyukahindana mughulhu wosi kutse ighuma-ighuma?​—Abaebrania 10:25. ․․․․․

Wukasangira omwa mihindano omwa nzira syahi? ․․․․․

Wukanahindana ababuthi bawu nomubangabya isibendi hindana (wamabya iwunalighirwe erikolha ekyo)?

□ Ee □ Eyihi

Wangana bugha wuthi kwenene wanzire erikolha erisonda lya Nyamuhanga?​—Esyonyimbo 40:8.

□ Ee □ Eyihi

Wangana handika emibere mirebe eyo waghaniramu akahathikano?​—Abanya Roma 12:2. ․․․․․

Wutheghekire erikolhaki erilholha embere iwunawithire Yehova y’olhwanzo olhukamathire?​—Yuda 20, 21. ․․․․․

Wangana kolera Yehova ababuthi bawu n’abanywani nomubanga leka erimukolera?​—Matayo 10:36, 37.

□ Ee □ Eyihi

[Ekisasani]

Ng’obutheke, eribatizibwa ni mbinduka nene omwa ngebe​—ni y’erilengekaniako kutsibu