Wukakolhaki ekindu kyamakwitha obuba?— Obundi wukathibitha eyiri mama wawu kutse thatha wawu nuku anga kuwathikya. Aliwe hane n’owundi oyuwanga kuwathikya. Awithe akaghalha kanene kwilhaba owundi mundu wosi-wosi. Wunasi nga nindi?— Kwenene, ni Yehova Nyamuhanga. Thuthakania okwa mulhwana mulere oyuli omwa Biblia oyukahulhawa mwa Dawudi. Mwaminya ngoku Yehova akamuwathikaya, neryo isyali sagha.

Erilhua omwa bulere bwa Dawudi, ababuthi biwe ibakamukangiriraya erianza Yehova. Eki mukyawathikya Dawudi erithendi sagha nomwangabana ebikamwitha buba. Mwaminya ngoku Yehova ni munywani wiwe kandi ngoku angamuwathikirye. Kiro kighuma, Dawudi iniane mulisya esyombuli, endale nene muyasa n’erisyaheka embuli! Wunasi ekya Dawudi aby’akolire? Mwathibitha okwa ndale eyo n’erithayo isyawithe n’okuki! Kandi n’edubu yabere yikasira esyombuli siwe, Dawudi mwithayo! Wukalengekanaya nindi oyuwabya akawathikya Dawudi?— Kwenene, abya ini Yehova.

Lero ibbwano hane n’obundi buthuku obwa Dawudi akanganirayamu obuthubaha. Abaisraeli babya ibanemulhwa n’abandu abakahulhawa mwa Abafilisitini. Omughuma w’okw’abasirikali Abafilisitini kyabya kilhume kiri-kiri kandi kinene kutsibu! Kyabya kikahulhwa mwa Goliata. Ekilhume eki ikikasekereraya abasirikali Abaisraeli na Yehova. Mukyabwira abasirikali Abaisraeli kithi ibanathapima erisyalhwa nakyu. Aliriryo Abaisraeli abosi mubasagha kutsibu erilhwa nakyu. Dawudi abere akowa eki, mwabwira Goliata athi: ‘Ngendilhwa nawu! Yehova akendi nyiwathikya, kandi ngendi kusinga!’ Mbwino Dawudi mwana sagha?— Eyihi, mwathasagha nahake. Wunanzire eriminya ekya kwamako?

Dawudi mwimya omunzeledi wiwe n’amabwe athano awakomire ndeke, neryo amayalhwa n’ekilhume ky’amani ekyo. Goliata abere alhangira Dawudi ngoku ali, mwamusekerera! Aliriryo Dawudi mwamubwira athi: ‘Wukanyasira n’omuyali, aliwe ingye ngakwasira omwa lina lya Yehova!’  Neryo mwahira eribwe ly’omwa munzeledi, amathibitha eyiri Goliata, n’erimughusa ly’oko. Eribwe eryo mulyaswirya embumo ya Goliata! Neryo amayithinira ahisi, amaholha! Abafilisitini mubakwa buba bunene kutsibu neryo bamathibitha. Omulhwana mulere nga Dawudi mwathoka athi er’itha ekilhume ky’amani manene?— Yehova mwamuwathikya, kandi Yehova abya n’akaghalha kanene kwilhaba ekilhume ekyo!

Omwatsi wa Dawudi oyu akathweghesayaki?— Yehova awithe akaghalha kanene kwilhaba owundi mundu wosi-wosi. Kandi ni munywani wawu. Neryo wamathasyabana ekikakwitha obuba, wibuke ngoku Yehova angana kuwathikya iwaghana erisagha!