Thalebya omwana oyuli omwa kisasani. Akabya ng’ali iyuwene kandi ng’akwire obuba, kwa bithe? Wune wathayowa wuthya?— Obuli mundu hakanayira iniayowa athya. E Biblia yikakanaya okwa banywani ba Yehova abayowa nabu ibali ibibene kandi ibakwire obuba. Omughuma w’okw’ibo abya ini Eliya. Thutha mw’ighako.

Eliya abya ikere e Israeli kera, Yesu athali abuthwa. Ahabu, oyuwabya mwami we Israeli omwa buthuku obo, abya isyaliramaya Nyamuhanga w’ekwenene, Yehova. Ahabu na mukali wiwe, Yezebeli, babya bakaramya Baali, enyamuhanga y’amabehi. Neryo abandu bangyi omwa Israeli mubatsuka eriramya Baali. Omwami-kali Yezebeli abya mubi kutsibu kandi mwanza er’itha abandu ababya bakaramya Yehova, imwamuli Eliya! Wunasi ekya Eliya aby’akolire?—

Eliya mwathibitha! Mwaghenda omwa mbwarara mwa hali n’eriyabisama omwa  mwangalhu. Wukalengekanaya ekyaleka iniakolha ekyo niki?— Ly’eribya imwakwa obuba. Aliriryo Eliya syabya atholere akakwa obuba. Busana naki? Kundi abya inianasi ngoku Yehova angana muwathikya. Eliya abya iniabiriyilhangirira akaghalha ka Yehova. Kiro kighuma, Yehova mwanowa erisaba lya Eliya neryo amathuma omuliro erilhua elhubulha. Kwesi obo Yehova syanga lemirwe eriwathikya Eliya okwa ndambi eyo!

Eliya abere iniane omwa mwangalhu, Yehova mwamubulya athi: ‘Wukakolha hano haki?’ Eliya mwasubamu athi: ‘Ninangye musa oyukinakuramaya. Indi ingyuwene, kandi nabirikwa obuba indi bakendi nyitha.’ Eliya mwalengekania athi abandi ababya bakaramya Yehova babya ibabir’ithibwa. Aliriryo Yehova mwabwira Eliya athi: ‘Eyihi, ekyo si kwenene. Hane abandi bandu 7,000 abakinanyiramaya. Leka erikwa obuba. Ngakinakuwithire owundi mubiiri w’erinyikolera!’ Wukalengekanaya Eliya mwanatsema akowa ekyo?—

Ebyabya oku Eliya bikakweghesayaki?— Siwutholere wukayowa nga wuli iwuwene n’erikwa obuba. Wunawithe abanywani abanzire Yehova kandi abakwanzire. N’ekindi, Yehova awithe akaghalha kanene, kandi akendisyabya inianemukuwathikya! Wanamatsema eriminya kwa wuthe wangabya iwuwene?—