Wanamalhangira abalhume abali omwa kisasani?— Ni Matayo, Mariko, Luka, Yoane, Petero, Yakobo, Yuda, na Paulo. Abalhume abosi aba babyaho okwa buthuku bwa Yesu, kandi mubahandika ebihambire oku Yesu. Thuth’igha bingyi ebibahambireko.

Abasathu b’okw’ibo babya bakwenda ababya bakathulira haghuma na Yesu. Wunasi abasathu abo nga ni bahi?— Matayo, Yoane, na Petero. Abakwenda iya Matayo na Yoane babya basi Yesu ya ndeke, kandi obuli mughuma mwahandika  ekitabu ekikakanaya oku Yesu. Omukwenda Yoane mwahandika n’ekitabu ekikahulhawa mwa Eribisulirwa n’esyobaruha isathu esikahulhawa mwa Yoane w’Erimbere, Yoane Owakabiri, na Yoane Owakasathu. Omukwenda Petero mwahandika esyobaruha ibiri omwa Biblia. Sikahulhawa mwa Petero w’Erimbere na Petero Owakabiri. Omwa baruha eyakabiri, Petero mwahandika ebihambire okwa buthuku Yehova abugha iniane elhubulha oku Yesu athi: ‘Oyu ni mughalha waghe. Ngamwanzire, kandi akanyitsemesaya.’

N’abandi balhume abali omwa kisasani nabu bakathweghesaya ebihambire oku Yesu omwa bitabu ebya bahandika. Omughuma w’okw’ibo ni Mariko. Anganabya inianabyaho Yesu akahambwa neryo amalhangira ebyosi ebyabya. N’owundi ni Luka. Abya dokita neryo mwabya Mukrisitayo obundi Yesu iniamabiriholha.

Abandi ababiri abahandika okwa Biblia abawulhangire omwa kisasani babya baghalha babu Yesu abalere. Wunasi amena wabu?— Abya ini Yakobo na Yuda. Okwa kubanza, mubathikirirya Yesu. Nibya mubalengekania bathi alinga ni musire. Aliriryo enyuma waho mubikirirya Yesu neryo bamabya Bakristayo.

Erighunzerera, owundi oyuwamalhangira omwa kisasani oyuwahandika okwa Biblia ni Paulo. Athalyabya Mukrisitayo, abya in’iyo Saulo. Abya aponire Abakrisitayo kandi iniakabakolha nabi kutsibu. Wunasi ekyaleka Paulo inianza eribya Mukrisitayo?— Kiro kighuma Paulo iniane mughenda, mwakwama kyowa omundu akabugha nayu erilhua elhubulha. Abya ini Yesu! Mwabulya Paulo athi: ‘Busana naki abanyikirirye iwabakolha nabi wuthya?’ Neryo enyuma waho Paulo mwabya Mukrisitayo. Paulo mwahandika ebitabu 14 omwa Biblia, eritsuka okwa ky’Abanya Roma erihika okwa ky’Abaebrania.

Thukasoma e Biblia buli kiro, kwa bithe?— Omwʼisoma e Biblia, thukʼigha binene ebihambire oku Yesu. Wunanzire erigha binene oku Yesu?—