Wangana minya nga ni Bwami bwahi obwa thukakanayako?— Kwenene, bw’Obwami bwa Nyamuhanga, obwami obukendi syaleka ekihugho ikyabya paradiso. Wunanzire erigha bingyi oko Bwami obo?—

Obwami bwosi-bwosi bukabya n’omwami. Kandi omwami akathabalha okwa bandu abali omwa kihugho kiwe. Wunasi Omwami w’Obwami bwa Nyamuhanga nga nindi?— Ni Yesu Kristo. Ikere elhubulha. Akisiya iniabya Mwami w’obuli mundu okwa kihugho! Wukalengekanaya thunemwendi syatsema Yesu akathabalha ng’Omwami w’ekihugho kyosi?—

Thukendi syatsema kutsibu! Omwa Paradiso, abandu sibendi syasalhwa kandi sihendi syasabya esyonyuhi. Abandu abosi bakendi syanzana. Sihendi syasabya oyukalhwalha kutse eriholha. Abandu ndimethime basyalhangira, abatsiha basyowa, n’abalema basyathoka erithibitha n’eriyisumba. Obuli mundu akendisyabya n’eky’erirya. Kandi ebisoro byasyabya bughuma n’ebindi bisoro haghuma nethu. Ababiriholha bakendi syalhubuka. Abalhume n’abakali bangyi abawabir’ighako omwa katabu kano nga Rebeka, Rahabu, Dawudi na Eliya nabu bakendi syalhubuka! Wunanzire erisyabalholhako bakalhubuka?—

 Yehova akwanzire kandi anzire nawu iwabana etseme. Wamalholha embere erigha oku Yehova n’erimwowa, iwukendi syabyaho kera na kera omwa paradiso eyuwene kutsibu! Mbwino ekyo kya wunanzire?—