Thuthabya nga thuli omwa tawuni ye Yeriko. Etawuni eyi yiri omwa kihugho kye Kanana, eyiri abandu abatheramaya Yehova. Omukali oyukahulhawa mwa Rahabu ikereyo.

Omughulhu Rahabu abya iniakine musika mulere, mwowa emyatsi ngoku Musa athulha omwa Ngetse y’Engulha mw’enzira n’erisondolha Abaisraeli erilhua e Misiri. Kandi mwowa ngoku Yehova abawathikaya erisinga amalhwa w’esyonzighu syabu. Neryo hathya akowa ngoku babiriyisorokerya hakuhi ne Yeriko!

Erigholho-gholho lighuma, abalhume babiri Abaisraeli bakaghenda bubiso-biso eriyalebya etawuni eyo. Bakahulhawa mwa balingyi. Bakahika okwa nyumba ya Rahabu. Akabathangirira n’eribabwira athi base babye omwiwe. Omwa kiro, omwami we Yeriko akaminya ngoku abalhume babiri aba bane omwa tawuni kandi ngoku bali ewa Rahabu. Neryo omwami akathuma abalhume biwe eriyabahamba. Rahabu akabisa abalhume Abaisraeli babiri abo eyighulhu okwa nyumba yiwe n’eribwira abalhume b’omwami athi: ‘Banalhue hano, aliriryo babirighenda sibakiri omwa tawuni muno. Mwamabakwama esaha eno, imwangana beya!’ Wunasi ekikaleka Rahabu iniabisa Abalingyi abo?— Kundi ikirirye Yehova kandi anasi ngoku akendiha Abaisraeli b’ekihugho kye Kanana.

Abalingyi bakabya bathe balhua ewa Rahabu, bakamulhaghanisaya bathi iyo haghuma n’ab’okw’iyo bakendi syalhama e Yeriko yikathoghothibwa. Wunasi nga bakamubwira ambuki?— Bakabugha bathi: ‘Imaya akakoba k’omusasi aka, wukalerembaye omw’idirisa lyawu. Wamakolha ekyo, obuli mundu oyuli omwa nyumba yawu asyalhamibwa.’ Rahabu akakolha ekya banamamubwira. Neryo wunasi ekikathasyabya?—

Hakabya hahwa biro bike, Abaisraeli bakathimba okwa tawuni eyo bukuthu-kuthu. Biro mukagha ibane muthimba okwa tawuni eyo, murundi mughuma buli kiro. Aliriryo okwa kiro ky’omusanju, bakathimba kuyo mirundi musanju. Abosi bakathera etoko nene. Neryo Yehova akatheraya olhughuthu olhuthimbire okwa tawuni eyosi.  Aliriryo enyumba eyiri kw’akakoba k’omusasi akalerembire omw’idirisa siyithathera! Wanamalhangirayo omwa kisasani?— Rahabu n’ab’okw’iyo bakalhamibawa!

Ni kyahi ekya wuk’ighira oku Rahabu?— Rahabu mwikirirya Yehova busana n’eby’eriswekya ebyosi eby’owa oku Yehova. Nawu wunemw’igha eby’eriswekya bingyi ebihambire oku Yehova. Wunamwikirirye nga Rahabu?— Thunasi ngoku wunamwikirirye!