ERISOMO 2
Rebeka Mwanza Eritsemesya Yehova
Rebeka abya mukali oyuwabya anzire Yehova. Mwira wiwe abya in’iyo Isaka. Nayu abya anzire Yehova. Rebeka abanangana athi na Isaka? Rebeka mwakangania athi ngoku abya anzire eritsemesya Yehova? Leka thuthatsuka erigha oku Isaka, mwira wa Rebeka.
Ababuthi ba Isaka babya ini Abrahamu na Sara. Babya bikere omwa kihugho kye Kanana, omwabya abandu abatheramaya Yehova. Aliriryo Abrahamu aby’anzire mughalha wiwe iniathahya omukali oyukaramaya Yehova. Neryo mwathuma omughombe wiwe, obundi iya Elieza, eriyasonderya Isaka y’omukali omwa kitsweka ekikahulhawa mwa Harani, eyabya yikere abandi bahughu ba Abrahamu.
Rebeka mwaligha erikolha kutsibu erithehera esyongamiya sy’amaghetse
Elieza mwaghenda n’abandi baghombe ba Abrahamu. Lhwabya lhughendo lhuuli. Mubahongoka n’esyongamiya ikumi isinahekire ebyalya n’ebisembo. Elieza angaminyire athi omukali ow’erisombolera Isaka? Omughulhu Elieza n’abandi baghombe bahika e Harani, mubimana okwa kithehero kundi Elieza abya inianasi ngoku abandu babya ibakisiya ibasyatheha amaghetse. Mwasaba Yehova athi: ‘Namasaba omusika y’amaghetse neryo akambagho n’erinywisya esyongamiya syaghe, iningendi minya ngoku y’omukali oyuwamasombolha.’
Neryo omumbesa, ya Rebeka mwasa okwa kithehero. E Biblia yikabugha yithi abya mubuya kutsibu. Elieza mwamusaba amaghetse w’erinywa neryo nayu mwabugha athi: ‘Aho sihali butsibu. Ngendi kuha amaghetse, kandi ngendi yathehera n’esyongamiya syawu.’ Thalengekania! Esyongamiya esikwire enyotha sikanywa kutsibu, neryo Rebeka mwasuba okwa kithehero mirundi minene akasinywisya. Wanamalhangira omwa kisasani ngoku anemukolha kutsibu?— Elieza mwasweka kutsibu erilhangira ngoku Yehova amasubirya omusabe wiwe.
Elieza mwaha Rebeka y’ebisembo bingyi ebyuwene. Neryo Rebeka mwabwira Elieza n’abandi baghombe ababya haghuma nayu athi baye ewabu. Elieza mwasoborera ekyaleka Abrahamu iniamuthumayo kandi ngoku Yehova asubiraya emisabe yiwe. Ab’ewobu Rebeka mubamulighira erithahibwa na Isaka.
Rebeka mwaghenda e Kanana na Elieza, amayathahibwa na Isaka
Aliriryo wukalengekanaya Rebeka anabya anzire iniathahibwa na Isaka?— Rebeka mwaminya ngoku ni Yehova oyuwathuma Elieza. Neryo ab’ewobu Rebeka babere bamubulya ngananzire erighenda e Kanana eriyathahibwa na Isaka, mwasubirya athi: ‘Ee, nganzire ingaghenda.’ Neryo mwalhua iniaghenda na Elieza. Babere babirihika e Kanana, Isaka mwamuherukya.
Kundi Rebeka mwakolha ekya Yehova abya anzire iniakolha, Yehova mwamutsumulha. Habere hahwa myaka minene, Yesu mwabuthirwa omwa lhughanda lhwiwe! Wamabya nga Rebeka kandi wukatsemesya Yehova, nawu Yehova iniakendi kutsumulha.
